Ɖɛhan 38 - MAWUXÓWÉMA

Nya ɖé ɖo azɔn mɛ bo yí hwɛ tɔn gbe

¹ Davídi sín han; é nɔ́ ji bónú Mawu ná flín i.

² Mawu Mavɔmavɔ, ma ɖo xomɛsin jí bó dɔn tó nú mì ó; ma ɖo adǎn jí, bó ɖó hwɛ nú mì ó.

³ Gǎ towe lɛ́ɛ kó jɛ wǔ ce; alɔ towe ko jɛ wǔ ce.

⁴ Nǔ ɖěbǔ sɔ́ ɖo ganjí ɖo wǔ ce ǎ, ɖó xomɛsin e jí a ɖe é wú; nǔɖé sɔ́ ɖo ganjí ɖo xú ce lɛ́ɛ wú ǎ, ɖó hwɛ e un hu lɛ́ɛ wú.

⁵ Hwɛ ce lɛ́ɛ kplé káká bó yi jǐ hú mì; hwɛ ce lɛ́ɛ ɖo kpinkpɛn mì wɛ agban ɖɔhun.

⁶ Akpa e ɖo wǔtu ce lɛ́ɛ dó kpan bó vó, ɖó gǔgú ce wú.

⁷ Nyi ɖésúnɔ bǐ wɛ xá; adǎn wɛ ɖo gbigbo mì wɛ sɔ mɔ̌ nɛ́; un ko fɔ́n tɛgbɛ ɔ́, un nɔ ɖo yiyi wɛ wǔbláwúblá,

⁸ ɖó alin ce bǐ nɔ́ ɖo wlǐwlí wɛ; nǔɖé sɔ́ ɖo ganjí ɖo wǔ ce ǎ.

⁹ Gǎn ɖé sɔ́ ɖo wǔ ce ǎ; lan ce mɛ bǐ wɛ gba; wǔvɛ́ mɔ wɛ un nɔ ɖe ɖo ayi mɛ sɔ mɔ̌, bó gbɔ bó nɔ́ ɖo azɔn wɛn wɛ.

¹⁰ Nǔ e ɖo hǔn mɛ nú mì lɛ́ɛ ɔ́, Aklúnɔ, a mɔ nǔ jɛ bǐ wǔ. Azɔn e wɛn wɛ un ɖe ɔ́, a gɔn sise ǎ.

¹¹ Ayi ce ɖo jojo dán wɛ, hlɔ̌nhlɔ́n ce bǐ vɔ; nukún ce sɔ́ ɖo nǔ mɔ wɛ ǎ.

¹² Xɔ́ntɔn ce lɛ́ɛ kpó hǎgbɛ́ ce lɛ́ɛ kpó hɔn nú mì ɖó azɔn e jɛ wɛ un ɖe ɔ́ wú; mɛ e nyí mɛ ce lɛ́ɛ lɔmɔ̌ sɛ yi zɔ nú mì.

¹³ Mɛ e ɖo kú ce ba wɛ lɛ́ɛ nɔ́ ɖo mɔ ɖó nú mì wɛ; mɛ e ɖo nyanya ce ba wɛ lɛ́ɛ nɔ́ ɖo gbě ce blá wɛ, bó nɔ́ ɖo nǔ ce ɖɔ wɛ káká bɔ zǎn nɔ́ kú.

¹⁴ Nyɛ ɔ́, un ka cí tókúnɔ ɖɔhun; un nɔ se nǔ ǎ. Un cí mɛ e ɖɛ̌ tɔn kú ɔ́ ɖɔhun; un nɔ kɛ nu ǎ.

¹⁵ Un cí mɛ e ma nɔ se nǔ ǎ ɖɔhun; mɛ e ma nɔ gblɔ́n nú mɛ ǎ ɖɔhun.

¹⁶ Mawu Mavɔmavɔ, hwi ɖó nukún wɛ un ka ɖe; Aklúnɔ Mawu ce, hwi wɛ ná gblɔ́n nú yě.

¹⁷ Un ɖɔ: Ma lɔn nú nǔɖé wa mì, bónú yě ɖú ahwannɔwe ó; ma lɔn nú afɔ ce xo dɔjɔ, bónú yě mɔ ali dó wǔ ce ó;

¹⁸ ɖó din ɔ́, ɖibla j'ayǐ wɛ un ko ɖe, wǔvɛ́ e mɔ wɛ un ɖe ɔ́ ká kó xwɛ ǎ.

¹⁹ Un yí hwɛ ce lɛ́ɛ gbe. Xɛsi ɖo jǐ ce ɖó hwɛ e un hu lɛ́ɛ wú.

²⁰ Gbɛ ɖo kɛntɔ́ ce lɛ́ɛ wú ganjí; hlɔ̌nhlɔ́n ɖo yě wú ganjí. Mɛ e nɔ yǎyá bó gbɛ́ wǎn nú mì lɛ́ɛ sukpɔ́.

²¹ Nyanya wɛ yě nɔ́ dó sú ɖagbe xɔ́ mì; ɖagbe e un wa é wɛ nyí kɛn bɔ yě dó mì.

²² Mawu Mavɔmavɔ, ma jó mì dó ó; Mawu ce, ma nɔ zɔ nú mì ó.

²³ Aklúnɔ mɛhwlɛ́ngántɔ́ ce, yǎ wǔ wá gɔ́ alɔ nú mì!