Ɖɛhan 36 - MAWUXÓWÉMA

Mawu, hwi gɔ́n wɛ gbɛ ɔ́ jɔ sín

¹ Hanjigbɛ́gán ɔ́ sín hanjiwéma mɛ wɛ han élɔ́ ɖe. Davídi mɛsɛntɔ́ Mawu Mavɔmavɔ tɔn ɔ́ sín han wɛ.

² Xó ɖé ɖo xo ce mɛ bɔ un ná ɖɔ dó gǔ e mɛdídá nɔ́ fɔ́n é wú, é tunwun nǔ e é ná ɖó sísí nú Mawu dó wa ná é ǎ.

³ É nɔ́ mɔ ɖɔ émí kó nyɔ́ dín, bó sɔ́ nɔ́ mɔ nǔ e é nɔ́ wa nyi do é, bó ná gbɛ́ wǎn ná ǎ.

⁴ É kɛ nu ɔ́, adingban jɛ́n é nɔ́ ɖó; mɛ jɛ́n é nɔ́ blɛ́; é nɔ ba ná wa nǔ kpó nǔnywɛ́ kpó ǎ, é nɔ́ ba ná wa nǔ ɖagbe ɖě ǎ.

⁵ É mlɔ́ ayǐ ɔ́, nǔ ma sɔgbe kɛ́ɖɛ́ wɛ é nɔ́ lin, ali e ma nyí ali ɖagbe ǎ é wɛ é nɔ́ wlí, é nɔ́ hɔn nú nǔ nyanya wiwa ǎ.

⁶ Mawu Mavɔmavɔ, xomɛnyínyɔ́ towe d'agba káká yi jǐxwé, gbejíninɔ towe yi káká akpɔ́kpɔ́ lɛ́ɛ mɛ.

⁷ Hwɛjijɔ towe yi jǐ sɔ só e hú ga só lɛ́ɛ bǐ é, lě e a nɔ gbo hwɛ gbɔn ɔ́ yi do hú xu ɖaxó ɔ́ sín azan jí. Mawu Mavɔmavɔ, a nɔ hwlɛ́n gbɛtɔ́ kpó kanlin kpó.

⁸ Mawu ce, xomɛnyínyɔ́ towe xɔ akwɛ́ lóóo! Gbɛtɔ́ lɛ́ɛ nɔ hɔn hwlá cí awa towe lɛ́ɛ glɔ́.

⁹ Nǔɖuɖu ɖagbe ɖagbe e ɖo xwé towe gbe ɔ́ wɛ yě nɔ́ ɖu bó nɔ́ gɔ́ xo; xomɛnyínyɔ́ towe wɛ nyí tɔsisa bɔ yě nɔ́ nu.

¹⁰ Đó hwi gɔ́n wɛ gbɛ ɔ́ jɔ sín, wěziza towe wɛ nɔ́ ná wěziza mǐ.

¹¹ Ma gɔn xomɛnyínyɔ́ towe ɖe xlɛ́ mɛ e tunwun we lɛ́ɛ ó, ma gɔn gbejíninɔ towe ɖe xlɛ́ mɛ e ɖó ayijlɔ́jlɔ́ lɛ́ɛ ó.

¹² Afɔ e gbɛtɔ́ goyítɔ́ nyi dó mì ɔ́ ní má jɛ wǔ ce ó; mɛdídá lɛ́ɛ ní má nya mì dó wezun nu ó.

¹³ Dǎkaxotɔ́ lɛ́ɛ nɛ́ j'ayǐ nɛ́; yě j'ayǐ bɔ fínfɔ́n gló.