Ɖɛhan 35 - MAWUXÓWÉMA

Xomɛvɔ́nɔ ɖé sa vo nú Mawu

¹ Davídi sín han. Mawu Mavɔmavɔ, li za xá mɛ e ɖo za li xá mì wɛ lɛ́ɛ, fun ahwan xá mɛ e ɖo ahwan fun xá mì wɛ lɛ́ɛ.

² Zě gǎglónú kpɛví kpó ɖaxó kpó, sí te, bó wá gɔ́ alɔ nú mì.

³ Zě hwǎn kpó asyɔ́ví nuwenɔ kpó dó mɛ e ɖo ya dó nú mì wɛ lɛ́ɛ jí; ɖɔ nú mì ɖɔ: “Nyi wɛ nyí hwlɛngán towe.”

⁴ Mɛ e ɖo kú ce ba wɛ lɛ́ɛ ɔ́, wi yětɔn ní kɔ́n, yě ní ɖu winnyá. Mɛ e ɖo nyanya ce lin wɛ lɛ́ɛ ní ba nu tɔn kpo bo jó agɔ dó gǔdo.

⁵ Hwenu e wɛnsagun Mawu Mavɔmavɔ tɔn ná ɖo yě nya wɛ ɔ́, yě ní cí nǔywɛ́ e mɛ jɔhɔn d'alɔ, bó ɖo zǐzé kpé wɛ ɔ́ ɖɔhun.

⁶ Hwenu e wɛnsagun Mawu Mavɔmavɔ tɔn ná jɛ gǔdo yětɔn ɔ́, ali e jí yě ɖe ɔ́ ní d'ablu bo ɖíɖí.

⁷ Un wa nǔɖé nyi do nú yě ǎ, yě ká kun do ɖó alixo nú mì, bó sɔ́ nǔ nyi nu. Un jɛ agɔ ɖé dó yě ǎ, yě ká kun do bónú ma jɛ mɛ bó kú.

⁸ Adǎn ma ɖó nukún ní fyán yě, mɔ e yě ɖó nú mì ɔ́, yě ɖésú ní jɛ mɛ; yě ní jɛ yɔdo e yě kun ɖ'ayǐ nú mì ɔ́ mɛ.

⁹ Énɛ́ ɔ́, un ná j'awǎ ɖo Mawu Mavɔmavɔ mɛ, xomɛ ná hun mì ɖó é hwlɛ́n mì gán.

¹⁰ Un ná ɖɔ kpó ayi ce bǐ kpó ɖɔ: “Mɛ̌ ka sixú hwlɛ́n gbɛ̌dónɔ sín mɛ e hú gǎn ɛ ɔ́ lɔmɛ hwi ɖɔhun? A nɔ yí gbɛ̌dónɔ kpó wamamɔnɔ kpó sín mɛ e ɖo afú tá yě wɛ ɔ́ sí.”

¹¹ Kúnnu-agɔɖetɔ́ lɛ́ɛ sí te dó jǐ ce, yě nɔ́ kan nǔ byɔ́ mì dó nǔ e un ma mɔ do ná ǎ é wú.

¹² Yě nɔ́ sɔ́ nyanya dó sú ɖagbe xɔ́ mì; nyi ɖokpónɔ ɖíe wá kpo e.

¹³ Nyɛ ɔ́, hwenu e kɛntɔ́ ce lɛ́ɛ ɖo azɔn jɛ wɛ ɔ́, wǔ kú mì bɔ un sɔ́ caki dó, bó ɖe xlɛ́, un blá nu dó sɔ́ nyɛɖée hwe. Un xo ɖɛ ɔ́, un nɔ lɛ́ xo.

¹⁴ Un nɔ ɖo yiyi wɛ wǔbláwúblá, xɔ́ntɔn ce ɖé abǐ nɔví ce ɖé wɛ nǔ wa ɖɔhun. Un nɔ jɛ aluwɛ mɛ, bó nɔ ɖo yiyi wɛ, bó nɔ́ ɖo wǐwá wɛ nɔ ce wɛ kú ɖɔhun.

¹⁵ Nǔɖé ka wa nyɛ ɔ́, é nɔ́ víví nú akɔta ɖěvo mɛ nu lɛ́ɛ, yě mɛ e un ma tunwun ǎ lɛ́ɛ, bɔ yě nɔ́ sɛ yěɖée kplé; yě nɔ́ kpléta dó wǔ ce, bó ná wa nǔ xá mì, yě nɔ́ ɖo tagba dó nú mì wɛ hwebǐnu,

¹⁶ yě mɛ dǎkaxotɔ́ lɛ́ɛ kpó mɛcákotɔ́ lɛ́ɛ kpó; yě mɔ mì lě ɔ́, yě nɔ́ tɛ aɖǔma.

¹⁷ Aklúnɔ, káká jɛ hwetɛ́nu wɛ a nǎ tin kpɔ́n nǔ mɔ̌hun yi jɛ? Cyɔ́n alɔ jǐ ce, bó ɖe mì sín ya e dó nú mì wɛ yě ɖe é mɛ, hwlɛ̌n mì ɖo kinnikínní ví nɛ́ lɛ́ɛ sí.

¹⁸ Énɛ́ ɔ́, togun towe kplé ɔ́, un ná dó kú nú we, un ná kpa susu nú we ɖo ahwan wɔ̌buwɔ́bú énɛ́ mɛ.

¹⁹ Ma lɔn nú yě mɛ e nɔ yǎyá bó dó kɛn mì lɛ́ɛ ɖú ahwannɔwe ó. Yě mɛ e nɔ mɔ̌ kpowun bo gbɛ́ wǎn nú mì lɛ́ɛ ɔ́, ma lɔn nú yě ko mì ó.

²⁰ Đó xó e nɔ tɔ́n sín nu yětɔn mɛ lɛ́ɛ ɖě nɔ́ nyí xó e nɔ́ ná fífá mɛ é ǎ. Adingban wɛ yě nɔ́ ɖó dó mɛ e ma ɖo mɛɖé xó mɛ, ɖo to ɔ́ mɛ ǎ lɛ́ɛ nu.

²¹ Yě vlɔ́n vɛ̌gokan bó ɖɔ: “Wǒóo nú we! Mǐ ɖésú wɛ mɔ we ɖ'é kɔn!”

²² Mawu Mavɔmavɔ, a ka ɖo nǔ énɛ́ lɛ́ɛ mɔ wɛ mɛ! Ma tin dó ó. Aklúnɔ, ma nɔ zɔ nú mì ó.

²³ Mawu Mavɔmavɔ, sí te! Sí te bó wá ɖɔ hwɛjlɔ́jlɔ́ nú mì. Mawu ce, Aklúnɔ ce, wǎ jɛ ahwan jǐ ce.

²⁴ Mawu Mavɔmavɔ, Mawu ce, ɖɔ hwɛ ce ní sɔgbe xá lě e a nɔ ɖɔ hwɛ gbɔn é, nú yě má ɖú ahwannɔwe ó.

²⁵ Yě ní ma ɖɔ dó xo mɛ ɖɔ: “Acɔnkwín! Nǔ e ba wɛ mǐ ɖe ɔ́ nɛ́” ó. Yě ní má ɖɔ: “Mǐ wa xá ɛ nɛ́” ó.

²⁶ Yě mɛ e nǔ wa mì, bɔ é víví nú yě lɛ́ɛ bǐ ní flú bó ɖu winnyá. Yě mɛ e sí te dó jǐ ce lɛ́ɛ bǐ ní ɖu winnyá bó ɖu hɛ̌n.

²⁷ Amɔ̌, mɛ e ɖo te kpɔ́n ɖɔ è nǐ ɖe tɔ mì, ɖɔ xomɛvɔ́ wɛ un ɖe lɛ́ɛ ɔ́, yě ní kpa awǒbóbó bó j'awǎ. Yě ní nɔ ɖɔ hwebǐnu ɖɔ: “Susu nú Mawu Mavɔmavɔ e jló ɖɔ mɛsɛntɔ́ tɔn ní mɔ fífá é.”

²⁸ Énɛ́ ɔ́, un ná nɔ kpa nǔjlɔ́jlɔ́wiwa towe, bó ná nɔ́ kpa susu nú we ayǐhɔ́ngbe ayǐhɔ́ngbe.