Ɖɛhan 33 - MAWUXÓWÉMA

Mi kpa susu nú Mawu Gbɛɖótɔ́ Mɛhwlɛ́ngántɔ́ ɔ́

¹ Gbejínɔtɔ́ lɛ́ɛ mi, mi sú xó ylɔ́ Mawu Mavɔmavɔ dó ɖe awǎjijɛ mitɔn xlɛ́. Ayijlɔ́jlɔ́nɔ lɛ́ɛ mi, susu kpa nú Mawu Mavɔmavɔ ɔ́, midɛɛ lɛ́ɛ wɛ é jɛ xá.

² Mi xo agǐdigbo dó kpa susu nú Mawu Mavɔmavɔ; mi ɖɔ xó lómílómí dó mlá ɛ dó han mɛ, bó xo kanhún kanwǒnɔ d'é mɛ.

³ Mi ji han yɔ̌yɔ́ dó sɔ́ Mawu Mavɔmavɔ su; mi xo nǔ ní víví ganjí dó kpa awǒbóbó n'i,

⁴ ɖó xó e Mawu Mavɔmavɔ nɔ ɖɔ ɔ́ nɔ́ xwe ali, nǔ e Mawu Mavɔmavɔ nɔ bló ɔ́ bǐ nɔ́ ná jiɖiɖe.

⁵ Mawu Mavɔmavɔ yí wǎn nú hwɛjijɔ kpó nǔjlɔ́jlɔ́wiwa kpó. Xomɛnyínyɔ́ Mawu Mavɔmavɔ tɔn gba kpé gbɛ ɔ́ bǐ mɛ.

⁶ Xó wɛ Mawu Mavɔmavɔ dó bló jǐnukúnsin ná; gbe wɛ é ɖe bɔ nǔ tobutóbú e nɔ́ ná wěziza ɖo jǐnukúnsin lɛ́ɛ tíin.

⁷ É kplé sin lɛ́ɛ dó fí ɖokpó; é glɔ́n xusin lɛ́ɛ dó do ɖaxó ɖaxó mɛ.

⁸ Ayǐkúngban ɔ́ bǐ ní ɖó sísí nú Mawu Mavɔmavɔ; gbɛtɔ́ e ɖo gbɛ ɔ́ mɛ lɛ́ɛ bǐ ní sísɔ́ ɖo nukɔn tɔn;

⁹ ɖó é ɖɔ xó bɔ gbɛ ɔ́ tíin; é ɖe gbe bɔ nǔ lɛ́ɛ bǐ tɔ́n.

¹⁰ Mawu Mavɔmavɔ nɔ hɛn wě e ɖe wɛ akɔta lɛ́ɛ ɖe ɔ́ gblé, é nɔ́ glɔ́n ali nú togun lɛ́ɛ sín tito.

¹¹ Wě e Mawu Mavɔmavɔ nɔ́ ɖe ɔ́ nɔ́ nyí tɛgbɛ nú, tito tɔn lɛ́ɛ nɔ́ nyí wiwa, bɛ́ sín jijimɛ ɖě mɛ yi jɛ ɖěvo mɛ káká sɔ́yi.

¹² Nǔ nyɔ́ nú akɔta e nɔ sɛn Mawu Mavɔmavɔ ɖokpónɔ é; nǔ nyɔ́ nú togun e Mawu Mavɔmavɔ sɔ́ dó ɖó togun tɔn é.

¹³ Mawu Mavɔmavɔ ɖo nǔ kpɔ́n wɛ sín jǐxwé aga; é nɔ́ mɔ gbɛtɔ́ lɛ́ɛ bǐ.

¹⁴ Mawu Mavɔmavɔ ɖo nɔtɛn tɔn, bó nyi kɔ kpɔ́n mɛ e ɖo ayǐkúngban jí lɛ́ɛ bǐ.

¹⁵ É mɛ e bló ayi dó xomɛ nú yě bǐ ɔ́, é ɖo nǔ e wa wɛ yě ɖe lɛ́ɛ bǐ kpɔ́n wɛ tlítlí.

¹⁶ Ahwanfuntɔ́ gěgé wɛ nɔ́ zɔ́n bɔ axɔ́sú nɔ́ gán ɖo ahwangbénu ǎ; hlɔ̌nhlɔ́n ɖaxó wɛ nɔ́ hwlɛ́n súnnu glegbenu gán ǎ.

¹⁷ Sɔ́ hɛn yi ahwan fun gbé ɔ́, mɛɖée blɛ́blɛ́ wɛ; sɔ́ na bo dó hlɔ̌nhlɔ́n gbɔn ɖěbǔ ɔ́, é wɛ ná hwlɛ́n we ǎ.

¹⁸ Lo ɔ́, Mawu Mavɔmavɔ sín nukún nɔ́ ɖo mɛ e nɔ́ nɔ gbejí n'i lɛ́ɛ jí, mɛ e nɔ ɖó nukún xomɛnyínyɔ́ tɔn lɛ́ɛ,

¹⁹ bó ná dó hwlɛ́n yě sín kú sí; bɔ adɔ na bo tɔ́n ɔ́, é ná hɛn yě ɖó gbɛ.

²⁰ Mǐdɛɛ lɛ́ɛ ɔ́, Mawu Mavɔmavɔ wú wɛ mǐ gán jɛ; é wɛ nyí alɔdó mǐtɔn, bó nyí gǎglónú mǐtɔn.

²¹ É wɛ zɔ́n bɔ xomɛ mǐtɔn bǐ gba wɔ̌. Mǐdɛɛ lɛ́ɛ ɔ́, mǐ ɖeji dó Mawu mímɛ́ ɔ́ wú.

²² Mawu Mavɔmavɔ, xomɛnyínyɔ́ towe ní nɔ kpɔ́ xá mǐ, ɖó hwi wɛ mǐ ɖo te kpɔ́n.