Ɖɛhan 32 - MAWUXÓWÉMA

È sɔ́ hwɛ kɛ mɛɖé ɔ́, mɛ ɔ́ nɔ́ vo ɖo ayi mɛ

¹ È sɔ́ xó lómílómí dó han mɛ; Davídi sín han wɛ. Nǔ nyɔ́ nú mɛ e Mawu ɖe agɔ e é jɛ ɔ́ sín kɔ ná é; mɛ e Mawu sɔ́ nǔ e é wa nyi do ɔ́ kɛ é.

² Nǔ nyɔ́ nú mɛ e Mawu Mavɔmavɔ ma nɔ xa hwɛ dó kɔ ná ǎ é; mɛ e sín ayi mɛ ahizi ɖěbǔ ma ɖe ǎ é.

³ Agɔ e un jɛ dó Mawu Mavɔmavɔ ɔ́, nú un ma ko ɖɔ ǎ jɛ́n wɛ ɔ́, un nɔ ɖo gbɛ vo sa wɛ ayǐhɔ́ngbe ayǐhɔ́ngbe, káká bɔ gǎn e ɖo wǔ ce ɔ́ bǐ nɔ́ jɛ vivɔ jí.

⁴ Đó Mawu Mavɔmavɔ, zǎn kpó kéze kpó ɔ́, a nɔ ɖo nǔ dó sin xá mì wɛ, káká bɔ un xú dó te atín e alǔun hɛn ɔ́ ɖɔhun. Agbɔ̌n

⁵ Un ɖɔ dó ayi mɛ ɖɔ: “Un jɛ agɔ dó Mawu Mavɔmavɔ; un ná ɖɔ hwɛ ce lɛ́ɛ n'i.” Un ɖɔ hwɛ e un hu ɔ́ nú we, nǔ e un wa nyi do ɔ́, un hwlá dó we ǎ. Énɛ́ ɔ́, hwɛ ɔ́, a ɖe agɔ e un jɛ ɔ́ sín kɔ nú mì. Agbɔ̌n

⁶ Énɛ́ ɔ́ wú wɛ mɛ e ɖo gbejí nú we lɛ́ɛ wá tunwun ɖɔ émí hu hwɛ dó we ɔ́, émí ná nɔ́ xo ɖɛ sɛ́ dó we. Agbetawoyó na bo ɖi sin ɔ́, é nɔ́ yi yě gɔ́n ǎ.

⁷ Hwi wɛ nyí bibɛtɛn ce; a nɔ lɔn nú adǎn nɔ gbo mì ǎ; un ná sú xó bó j'awǎ, ɖó alɔ e a nɔ cyɔ́n jǐ ce ɔ́ wú. Agbɔ̌n

⁸ Mawu Mavɔmavɔ ɖɔ: un ná ná nukúnnú mɔ jɛ nǔ mɛ we, un ná xlɛ́ ali e a ɖǒ ná gbɔn ɔ́ we; un ná kplɔ́n nǔ we; nukún ce ná ɖo jǐ towe:

⁹ Mi ma jɔ xlo sɔ́ abǐ tócí ɖɔhun ó; ɖó gan kpó kpo kpó wɛ è nɔ dó nu nú yě, cóbɔ yě nɔ́ se gbe; énɛ́ ɔ́, nǔɖé ná wa we ǎ.

¹⁰ Wǔvɛ́ gěgé wɛ ɖo te kpɔ́n mɛdídá. Lo ɔ́, mɛ e ɖeji dó Mawu Mavɔmavɔ wú ɔ́, xomɛnyínyɔ́ Mawu Mavɔmavɔ tɔn wɛ nɔ lɛ́ lɛ̌ dó e.

¹¹ Gbejínɔtɔ́ lɛ́ɛ mi, Mawu Mavɔmavɔ ní nyí awǎjijɛ mitɔn! Ayijlɔ́jlɔ́nɔ lɛ́ɛ mi, mi hun xomɛ; mi sú xó dó ɖe awǎjijɛ mitɔn xlɛ́.