Ɖɛhan 30 - MAWUXÓWÉMA

Mawu Mavɔmavɔ ɖe mì sín kútomɛ wá gbɛ

¹ Davídi sín han; hwenu e è hun Mawu xwé ɔ́ wɛ è ji.

² Mawu Mavɔmavɔ, un ɖo mlǎmlá we wɛ, ɖó a ɖe mì sín do gɔngɔn mɛ; a jlǒ ɖɔ kɛntɔ́ ce lɛ́ɛ ní ko mì ǎ.

³ Mawu Mavɔmavɔ, Mawu ce, un sú xó ylɔ́ we bɔ a gbɔ azɔn nú mì.

⁴ Mawu Mavɔmavɔ, a ɖe mì sín kútomɛ, bó lɛ́ sɔ́ mì wá gbɛ, bɔ un lín dó mɛ e ɖo yɔdo mɛ byɔ́ wɛ lɛ́ɛ.

⁵ Mi mɛ e ɖo gbejí nú Mawu Mavɔmavɔ lɛ́ɛ ɔ́, mi ɖɔ xó lómílómí dó mlá nyǐkɔ tɔn dó han mɛ. Mi sɔ́ nyǐkɔ mímɛ́ tɔn su.

⁶ Đó xomɛsin tɔn ɔ́, tɛndo ɖokpó mɛ nú wɛ. Đagbewiwa tɔn ɔ́, tɛgbɛ nú ka wɛ; a nǎ ya avǐ káká, bó ná yi xɔ d'é jí, amɔ̌, káká nú ayǐ ná hɔ́n ɔ́, a ko fɔ́n kpó awǎjijɛ kpó.

⁷ Un nɔ mɔ ɖɔ ayi ce ko j'ayǐ, bó nɔ́ ɖɔ: “Adǎn ɖě ná gbo mì gbeɖé ǎ.”

⁸ Mawu Mavɔmavɔ, ɖo xomɛnyínyɔ́ towe mɛ ɔ́, a sɔ́ mì jínjɔ́n ayǐ, bɔ un lí dǒ só ɖɔhun. A ka wá ɖe alɔ sín kan ce mɛ, bɔ gbɛ ce wá ɖo lě din.

⁹ Mawu Mavɔmavɔ, un sú xó ylɔ́ we, Aklúnɔ, un sa vo nú we bó ɖɔ:

¹⁰ Ényí a kɔn hun ce kɔn nyi ayǐ ɔ́, ényí a sɔ́ mì dó do gɔngɔn mɛ ɔ́, ani wɛ a nǎ mɔ ɖ'é mɛ? Kɔ́gúdu wɛ ná mlá we a? Kɔ́gúdu ná sixú ɖɔ gbejíninɔ towe a?

¹¹ Mawu Mavɔmavɔ, ɖǒtó mì, kú nǔbláwǔ nú mì. Mawu Mavɔmavɔ, wǎ hwlɛ́n mì.

¹² Ée un ɖɔ mɔ̌ é ɔ́, a sɔ́ aluwɛ e mɛ un ɖe ɔ́ dó húzú awǎjijɛ nú mì. A ɖe nǔwamɛwu sín kɔ nú mì, bó zé xwewu dó nú mì,

¹³ bónú má ɖɔ xó lómílómí dó mlá nyǐkɔ towe dó han mɛ; un ná nɔ abwɛ̌ gbeɖé ǎ. Mawu Mavɔmavɔ, Mawu ce, un ná mlá we káká sɔ́yi.