Ɖɛhan 3 - MAWUXÓWÉMA

Kɛntɔ́ lɛ́ lɛ̌ dó mì

¹ Han élɔ́ ɔ́, Davídi wɛ ji hwenu e é ɖo hinhɔn ɖo vǐ tɔn Abusalɔ́mu nukɔn wɛ é.

² Mawu Mavɔmavɔ, kɛntɔ́ ce lɛ́ɛ sukpɔ́ mɛ nya! Mɛ e sí te dó jǐ ce lɛ́ɛ sukpɔ́ lóóo!

³ Yě ɖo kpɔ́ gégé, yě nɔ́ ɖɔ dó wǔ ce ɖɔ: “Hwlɛngán ɖokpó ná gosín Mawu gɔ́n wá n'i ǎ.” Agbɔ̌n

⁴ Amɔ̌, hwɛ Mawu Mavɔmavɔ ɔ́, hwi wɛ nyí gǎglónú ce. Hwi wɛ nyí susu ce, hwi wɛ nɔ ná akɔ́nkpinkpan mì.

⁵ Un nɔ sú xó ylɔ́ Mawu Mavɔmavɔ, bɔ é nɔ́ yí gbe nú mì sín só mímɛ́ tɔn jí. Agbɔ̌n

⁶ Un nɔ mlɔ́ ayǐ, bó nɔ́ dɔ́ amlɔ bó nɔ́ fɔ́n, ɖó Mawu Mavɔmavɔ wɛ ɖo hinhɛn mì wɛ.

⁷ Un ɖi xɛsi nú mɛ wɔ̌buwɔ́bú e ján go dó mì lɛ́ɛ ǎ.

⁸ Mawu Mavɔmavɔ, Mawu ce, sí te, hwlɛ̌n mì, ɖó hwi wɛ nɔ xo tómɛ nú kɛntɔ́ ce lɛ́ɛ, hwi wɛ nɔ wɛ́n aɖǔ mɛdídá lɛ́ɛ.

⁹ Mawu Mavɔmavɔ, hwi sí wɛ hwlɛngán ɔ́ ɖe, ɖɛ towe ní nɔ togun towe jí. Agbɔ̌n