Ɖɛhan 29 - MAWUXÓWÉMA

Mawu Mavɔmavɔ sín gbe

¹ Davídi sín han. Wɛnsagun Mawu Mavɔmavɔ tɔn e ɖo jǐxwé lɛ́ɛ mi , mi wá sɔ́ Mawu Mavɔmavɔ su; mi wá kpa susu nú Mawu Mavɔmavɔ, mi wá kpa hlɔ̌nhlɔ́n tɔn.

² Mi kpa susu e jɛ xá nyǐkɔ tɔn é n'i. Mi ɖe kɔ́ n'i kpó acɔ́ɖónú sinsɛn tɔn lɛ́ɛ kpó.

³ Mawu Mavɔmavɔ nɔ dó gbe ɖo sin jí. Mawu susunɔ ɔ́ nɔ́ dó gbe. Mawu Mavɔmavɔ ɖo sin ɖaxó jí.

⁴ Mawu Mavɔmavɔ dó gbe kpó hlɔ̌nhlɔ́n kpó, Mawu Mavɔmavɔ dó gbe kpó acɛkpikpa kpó.

⁵ Mawu Mavɔmavɔ dó gbe, bɔ sɛ́dlutín lɛ́ɛ gba hánnyá, sɛ́dlutín Libáan tɔn lɛ́ɛ gba hánnyá.

⁶ Libáan só lɛ́ɛ nɔ́ lɔ́n nyibúví ɖɔhun, Ɛmɔ́ɔ só ɔ́ nɔ́ lɔ́n agbo wínnyáwínnyá ɖɔhun.

⁷ Mawu Mavɔmavɔ dó gbe bɔ myɔ xɔ hiwun.

⁸ Mawu Mavɔmavɔ dó gbe bɔ gbětótló húnhún, Mawu Mavɔmavɔ húnhún gbětótló Kadɛ́ci tɔn.

⁹ Mawu Mavɔmavɔ dó gbe bɔ zungbɔ́ lɛ́ɛ ji vǐ. É dó gbe bɔ zungbó lɛ́ɛ lúnlún ama. Nǔ e kó ɖo Mawu Mavɔmavɔ sín hɔnmɛ lɛ́ɛ bǐ nɔ́ sú xó ɖɔ: “Susu nú Mawu!”

¹⁰ Mawu Mavɔmavɔ ɖo axɔ́súzinkpo tɔn jí hwenu e tɔ gba gbɛ ɔ́ é; Mawu Mavɔmavɔ ná ɖu axɔ́sú káká sɔ́yi.

¹¹ Mawu Mavɔmavɔ ná ná hlɔ̌nhlɔ́n togun tɔn; Mawu Mavɔmavɔ ná xo ɖɛ dó jǐ tɔn bɔ é ná vo.