Ɖɛhan 28 - MAWUXÓWÉMA

Nya ɖé mɔ kú tɔn sɛ́ dó bó xo ɖɛ

¹ Davídi sín han. Mawu Mavɔmavɔ, hwi sú xó ylɔ́ wɛ un ɖe, só ce, ma tin dó mì ó, ɖó nú a dǒ tókúse xó e sú ylɔ́ we wɛ un ɖe ɔ́ mɛ ɔ́, gbɛ ce ná vɔ.

² Mawu Mavɔmavɔ, nú un dlɛ́n alɔ sɛ́ dó tɛn mímɛ́ bǐ e mɛ a ɖe ɔ́ hǔn, nú un sú xó ylɔ́ we ɖɔ hwi ní wá dó alɔ mì hǔn, ɖǒtó mì.

³ Ma xwe nyɛ kpó mɛdídá lɛ́ɛ kpó dó aja ɖokpó ɔ́ mɛ ó, ma xwe nyɛ kpó hwɛhutɔ́ lɛ́ɛ kpó dó aja ɖokpó ɔ́ mɛ ó. Yě nɔ́ ɖɔ xó víví nú nɔzo yětɔn lɛ́ɛ, lo ɔ́, adǎka kɛ́ɖɛ́ wɛ gɔ́ ayi yětɔn mɛ.

⁴ Wa nǔ xá yě lě e zǐnzán yětɔn byɔ́ gbɔn é, lě e nǔ nyanya e yě wa ɔ́ byɔ́ gbɔn é; wa nǔ xá yě lě e yě wa mɛ ɖě lɛ́ɛ nú gbɔn é, sú nǔ e yě ɖésúnɔ dó sin lɛ́ɛ sín axɔ́ yě.

⁵ Yě nɔ́ ké ya nú azɔ̌ e Mawu Mavɔmavɔ wa lɛ́ɛ ǎ, yě nɔ́ ké ya nú nǔ e é sɔ́ alɔ tɔn dó bló ná lɛ́ɛ é ǎ. Mawu Mavɔmavɔ ní zin yě dɛ́ bó ma sɔ́ sɔ́ yě sí te gbeɖé ó!

⁶ Susu nú Mawu Mavɔmavɔ, ɖó é ɖótó vo e sa wɛ un ɖe lɛ́ɛ.

⁷ Mawu Mavɔmavɔ wɛ nyí hlɔ̌nhlɔ́n ce, bó nyí gǎglónú ce. É wɛ un sɔ́ ayixa ce bǐ jó ná, bɔ é nɔ́ gɔ́ alɔ nú mì; xomɛ ɖo hunhun mì wɛ, bɔ un ɖo susu kpa n'i wɛ dó han mɛ.

⁸ Mawu Mavɔmavɔ wɛ nyí hlɔ̌nhlɔ́n nú togun tɔn. É wɛ nyí ahohó nú mɛ e é kɔn ami dó ta ná é.

⁹ Hwlɛ̌n togun towe gán, xo ɖɛ dó mɛ e nyí hwi ɖokpónɔ tɔn lɛ́ɛ jí! Nyǐ lɛ̌ngbɔ́nyitɔ́ yětɔn, bó nyí gǎnjɛwú yětɔn káká sɔ́yi.