Ɖɛhan 27 - MAWUXÓWÉMA

Un ɖo Mawu xwé gbe ɔ́, ji nɔ ɖe mì

¹ Davídi sín han. Mawu Mavɔmavɔ wɛ nyí wěziza ce, bó nyí mɛhwlɛ́ngántɔ́ ce; mɛ̌ un ka ná ɖi xɛsi ná? Mawu Mavɔmavɔ lɔmɛ wɛ gbɛ ce ɖe; mɛ̌ un ka ná hɔn ná?

² Ényí nǔnyanyawatɔ́ lɛ́ɛ kplɔ́ dó mì, adǎnkanlin ɖɔhun ɔ́, yě mɛ kɛntɔ́ ce énɛ́ lɛ́ɛ wɛ nɔ́ j'ayǐ.

³ Ahwanfuntɔ́ lɛ́ɛ ná bó d'ahwan gbě bó ján go dó mì ɔ́, xɛsi nɔ ɖi mì ǎ; è tɔ́n ahwan mì ɔ́, hwenɛ́nu wɛ ji nɔ lɛ́ ɖe mì.

⁴ Nǔ ɖokpó géé wɛ un nɔ byɔ́ Mawu Mavɔmavɔ, bɔ é ká myá nukún nú mì ɖésú; é wɛ nyí ɖɔ má nɔ́ nɔ xwé tɔn gbe nú gbɛ hwenu ce bǐ, bó ná nɔ́ kpɔ́n lě e é nyɔ́ xomɛ sɔ é, bó ná nɔ́ kpɔ́n lě e nɔtɛn tɔn nyɔ́ sɔ é.

⁵ Đó azǎn nyanya gbe ɔ́, é ná cyɔ́n alɔ jǐ ce ɖo xɔ tɔn sá, é ná sɔ́ mì hwlá ɖó goxɔ tɔn sá, é ná sɔ́ mì yi ɖó só jí aga, fí e è ma ná kpé wǔ ce ɖe ǎ é.

⁶ Énɛ́ ɔ́, un ná hú taga kɛntɔ́ e lɛ́ lɛ̌ dó mì lɛ́ɛ; un ná sá vɔ̌ n'i ɖo goxɔ tɔn mɛ kpó awǒbóbó kpó, un ná ji han nú Mawu Mavɔmavɔ, un ná ɖɔ xó lómílómí dó mlá nyǐkɔ tɔn dó han mɛ.

⁷ Mawu Mavɔmavɔ! Un ɖo ylɔ̌ylɔ́ we wɛ. Đǒtó gbe ce; kú nǔbláwǔ nú mì, yǐ gbe nú mì.

⁸ Un ɖo tamɛ lin dó xó e a ɖɔ ɔ́ wú wɛ; a ɖɔ: “Mi ba mì!” Din ɔ́, Mawu Mavɔmavɔ! Un ɖo biba we wɛ.

⁹ Ma sɔ́ hwiɖée hwlá dó mì ó. Ma nya nyɛ mɛsɛntɔ́ towe kpó xomɛsin kpó ó; hwi wɛ nyí gbɛ nú mì. Ma jó mì dó ó; ma ɖe alɔ sín kan ce mɛ ó, Mawu Mɛhwlɛ́ngántɔ́ ce!

¹⁰ Đó tɔ́ ce kpó nɔ ce kpó ná bó ɖe alɔ sín kan ce mɛ ɔ́, hwɛ Mawu Mavɔmavɔ ɔ́, a nǎ kɛ alɔ bo yí mì.

¹¹ Mawu Mavɔmavɔ! Xlɛ́ ali towe mì; kplá mì gbɔn ali ɖagbe jí ɖó kɛntɔ́ ce lɛ́ɛ wú.

¹² Ma jó mì dó nú kɛntɔ́ ní zé mì dó wa nǔ e jló e ɔ́ ná ó; ɖó kúnnu agɔɖetɔ́ lɛ́ɛ sí te dó jǐ ce, bó ɖo adǎn gblɔ́n nú mì wɛ.

¹³ Nú un ma ka gán jɛ wú ɖɔ un ná mɔ xomɛnyínyɔ́ Mawu Mavɔmavɔ tɔn ɖo ayǐkúngban jí fí ǎ ɔ́, nɛ̌ gbɛ ce ka ná cí?

¹⁴ Đǒ nukún Mawu Mavɔmavɔ, dǒ gǎn, kpan akɔ́n, ɖǒ nukún Mawu Mavɔmavɔ.