Ɖɛhan 26 - MAWUXÓWÉMA

Xomɛvɔ́nɔ ɖé ylɔ́ Mawu

¹ Davídi sín han. Mawu Mavɔmavɔ, gbo hwɛ nú mì, ɖó gbɛ ɖagbe wɛ un nɔ zán. Hwi wɛ un kpɛn zɔn.

² Mawu Mavɔmavɔ, tɛ́n mì kpɔ́n, ba do nú mì; ba do nú nǔ e ɖo xo ce mɛ é; gbějé ayi ce kpɔ́n.

³ Un hɛn xomɛnyínyɔ́ towe dó ayi mɛ, gbejíninɔ towe nɔ́ xlɛ́ ali mì ɖo gbɛ ce mɛ.

⁴ Un nɔ dó gbɛtɔ́ nuwenɔgbɛ́ ǎ, un nɔ zɔn xá gbɛtɔ́ yɛmɛnúwatɔ́ ǎ.

⁵ Un gbɛ́ wǎn nú gbɛ̌ dó xá dǎkaxotɔ́ lɛ́ɛ; un nɔ jínjɔ́n ayǐ xá mɛdídá lɛ́ɛ ǎ.

⁶ Mawu Mavɔmavɔ, un klɔ́ alɔ ce, dó ɖe xlɛ́ ɖɔ xomɛvɔ́nɔ wɛ un nyí; Mawu Mavɔmavɔ, un ná lɛ́ lɛ̌ dó vɔ̌sákpe towe,

⁷ bó sɔ́ gbe d'aga dó dó nǔ e a wa nú mì ɔ́ sín kú nú we, dó ɖɔ nǔjíwǔ e a wa lɛ́ɛ é bǐ.

⁸ Mawu Mavɔmavɔ, un yí wǎn nú xwé e gbe a ɖe é, fí e susu towe ɖe é.

⁹ Ma wa nǔ xá mì hwɛhutɔ́ ɖɔhun ó, ma hu mì mɛhutɔ́ ɖɔhun ó.

¹⁰ Yě mɛ énɛ́ lɛ́ɛ ɔ́, wunhínhɔ́nnú wɛ yě wa, nǔ yí ɖu dó nǔ wɛ gɔ́ alɔ yětɔn.

¹¹ Nyɛ ɔ́, gbɛ ɖagbe wɛ un nɔ zán; hwlɛ̌n mì, kú nǔbláwǔ nú mì.

¹² Afɔ ce ló dǒ ɖo ali jlɔ́jlɔ́ jí. Un ná kpa susu nú Mawu Mavɔmavɔ hwenu e togun ɔ́ ná kplé é.