Ɖɛhan 20 - MAWUXÓWÉMA

È xo ɖɛ nú axɔ́sú ɔ́

¹ Hanjigbɛ́gán ɔ́ sín hanjiwéma mɛ wɛ han élɔ́ ɖe. Davídi sín han wɛ.

² Hwenu e adǎn ná ɖo gbigbo we wɛ ɔ́, Mawu Mavɔmavɔ ní yí ɖɛ towe; Mawu Jakɔ́bu tɔn ɖésú ní cyɔ́n alɔ jǐ towe.

³ É ní nɔ tɛn mímɛ́ tɔn mɛ dɔ̌n, bó sɛ́ alɔgɔ́ dó! É ní nɔ Sinyɔ́ɔ bó dó alɔ we!

⁴ É ní flín nǔ e a nǎ ɛ lɛ́ɛ bǐ, bó yí vɔ̌ e a nɔ dó zo lɛ́ɛ. Agbɔ̌n

⁵ É ní ná nǔ e jló we lɛ́ɛ we, bó bló bónú nǔ e a lin ná wa lɛ́ɛ bǐ ní nyí wiwa.

⁶ Mǐ nǎ kpa awǒbóbó ɖó alɔ e é dó we é wú; mǐ nǎ zé asyá dó jǐ dó kpa susu nú Mawu mǐtɔn. A byɔ̌ nǔɖé ɔ́, Mawu Mavɔmavɔ ná bló bǐ nú we.

⁷ Din ɔ́, un mɔ ɖɔ Mawu Mavɔmavɔ nɔ dó alɔ mɛ e é sɔ́ é. É nɔ́ se ɖɛ tɔn sín xwé tɔn gbe ɖo sɛ́xwé; é nɔ́ zán hlɔ̌nhlɔ́n tɔn dó wa nǔ ɖaxó ɖaxó dó hwlɛ́n ɛ gán.

⁸ Mɛ ɖé lɛ́ɛ nɔ́ gán jɛ ahwankɛkɛ́ yětɔn lɛ́ɛ wú, bɔ mɛɖé lɛ́ɛ nɔ́ gán jɛ sɔ́ yětɔn lɛ́ɛ wú. Amɔ̌, mǐdɛɛ lɛ́ɛ ɔ́, Mawu Mavɔmavɔ, Mawu mǐtɔn sín nyǐkɔ wú wɛ mǐ gán jɛ.

⁹ Mɛ ɖě lɛ́ɛ ɔ́, agbɔ̌n nɔ́ kpé yě, bɔ yě nɔ́ jɛ ayǐ, mǐdɛɛ lɛ́ɛ ká ɖo te bo syɛ́nlǐn.

¹⁰ Mawu Mavɔmavɔ, hwlɛ̌n axɔ́sú ɔ́ gán, énɛ́ ɔ́, nú mǐ ylɔ́ ɛ ɔ́, é ná nɔ́ gɔ́ alɔ nú mǐ.