Ɖɛhan 19 - MAWUXÓWÉMA

Susu Mawu tɔn ɖo wɛ̌kɛ́ ɔ́ kpó sɛ́n ɔ́ kpó mɛ

¹ Hanjigbɛ́gán ɔ́ sín hanjiwéma mɛ wɛ han élɔ́ ɖe. Davídi sín han wɛ.

² Jǐxwé ɖo Mawu sɔ́ su wɛ; jǐnukúnsin ɖo nǔwiwa Mawu tɔn lɛ́ɛ xlɛ́ wɛ.

³ Nǔ énɛ́ lɛ́ɛ ɔ́, kéze ɖě nɔ́ ɖɔ nú ɖě. Zǎn ɖě nɔ́ tínmɛ nú ɖě.

⁴ Xó wɛ yě nɔ́ ɖɔ bɔ è nɔ se ǎ; nu wɛ yě nɔ́ kɛ bó nɔ ɖɔ xó ǎ; tó wɛ nɔ́ se xó yětɔn ǎ.

⁵ Amɔ̌, nǔ e ɖɔ wɛ yě ɖe ɔ́, è mɔ gbɔn ayǐkúngban ɔ́ bǐ jí. È mɔ nǔ jɛ xó e ɖɔ wɛ yě ɖe ɔ́ wú gbɔn gbɛ ɔ́ bǐ mɛ. Jǐxwé dɔ̌n wɛ Mawu bló nɔtɛn nú hwe ɖó.

⁶ Zǎnzǎn ɔ́, hwe nɔ tɔ́n dɔ̌nkpɛvú e da asi yɔ̌yɔ́ ɔ́ tɔ́n sín xɔ mɛ ɖɔhun. A nǎ ɖɔ wezunnyɔ́kántɔ́ e zlɔ́n ɖidó kpó xomɛhunhun kpó ɔ́ wɛ.

⁷ Hwe nɔ tɔ́n sín akpá ɖě xwé ɖo jǐnukúnsin, bó nɔ́ yi xɔ dó akpá ɖěvo xwé. Yǒzo tɔn nɔ́ hwedó nǔ ɖěbǔ ǎ.

⁸ Sɛ́n Mawu Mavɔmavɔ tɔn ɔ́ sɔgbe bɔ nǔ bǐ vɔ ɖ'é wú; é nɔ́ ná hlɔ̌nhlɔ́n mɛ. Xó Mawu Mavɔmavɔ tɔn lɛ́ɛ ɖó gǎnjɛwú; yě nɔ́ ná nǔnywɛ́ mɛ e ma ɖó nǔnywɛ́ ɖé ǎ é.

⁹ Gbeta Mawu Mavɔmavɔ tɔn lɛ́ɛ nɔ́ xwe ali; yě nɔ́ dó xomɛhunhun nú mɛ. Nǔ e Mawu Mavɔmavɔ zɔ́n mɛ lɛ́ɛ ɖo wɛn; yě nɔ́ ná nukúnnú-mɔjɛnǔmɛ mɛ.

¹⁰ Sísí ɖó nú Mawu Mavɔmavɔ ɔ́, nǔ mímɛ́ wɛ; é ɖo ayǐ káká sɔ́yi. Gbeta e Mawu Mavɔmavɔ ɖe tɔ́n lɛ́ɛ bǐ wɛ nyí nǔgbó; bǐ wɛ sɔgbe,

¹¹ yě xɔ akwɛ́ hú siká; yě xɔ akwɛ́ hú siká akú, yě víví hú wǐin; yě víví hú wǐin akú.

¹² Mawu Mavɔmavɔ, nyɛ mɛsɛntɔ́ towe lɔ nɔ yí kplɔ́n ɖ'é mɛ; mɛ e nɔ xwedó nǔ e a ɖɔ lɛ́ɛ ɔ́, le e yě nɔ́ mɔ ɖ'é mɛ ɔ́ d'agba.

¹³ Hwɛ e è ɖo manywɛ́ mɛ bó hu ɔ́, è sixú tunwun a? Sɔ́ hwɛ e un ma tunwun ǎ bó hu lɛ́ɛ kɛ mì.

¹⁴ Hɛn mì ɖo goyíyí sí, ma nú goyíyí ɖu ɖo jǐ ce ó; énɛ́ ɔ́, un ná nɔ́ gbejí, un sɔ́ ná hu hwɛ ɖaxó ɖě ǎ.

¹⁵ Mawu Mavɔmavɔ, hwi mɛ e nyí sósyɛ́n ce, bó nyí mɛhwlɛ́ngántɔ́ ce ɔ́, xó e tɔ́n sín nu ce mɛ lɛ́ɛ ní nyɔ́ nukún towe mɛ, linlin e tɔ́n sín ayi ce mɛ lɛ́ɛ ní nyɔ́ nukún towe mɛ.