Ɖɛhan 17 - MAWUXÓWÉMA

Xomɛvɔ́nɔ ɖé xo ɖɛ

¹ Davídi sín ɖɛ. Mawu Mavɔmavɔ, nǔ e byɔ́ we wɛ un ɖe ɔ́ sɔgbe, ɖǒtó, wlǐ tó vo e sa nú we wɛ un ɖe ɔ́ wú, se ɖɛ e xo wɛ un ɖe ɔ́ ganjí, un ɖo yɛ wa wɛ ǎ.

² Hwi gɔ́n wɛ hwɛ e è nǎ ɖɔ xá mì ɔ́ ɖó ná gosín. Hwi ɖésúnɔ ní kpɔ́n akpá e xwé nǔgbó ɔ́ ɖe é.

³ A kíjé ayi ce mɛ kpɔ́n, a ba jǒnɔ mì zǎn mɛ, a dǒ mì kpɔ́n, a ka mɔ nǔ ɖěbǔ ǎ. Un ɖo nǔ vo lin wɛ, bó ɖo vo ɖɔ wɛ ǎ.

⁴ Un nɔ wa nǔ mɛ ɖě lɛ́ɛ ɖɔhun ǎ; lo ɔ́, un bló lě e a ɖɔ gbɔn é; un mlɛ́ ali mɛdídá lɛ́ɛ tɔn ǎ.

⁵ Afɔ ce ló dǒ ɖo ali towe jí, afɔ ce nɔ xo dɔjɔ ǎ.

⁶ Mawu, un ɖo ylɔ̌ylɔ́ we wɛ, ɖó a nɔ yí ɖɛ ce, wlǐ tó xó e ɖɔ wɛ un ɖe ɔ́ wú, se xó ce.

⁷ Hwi mɛ e nɔ hwlɛ́n mɛ e hɔn wá su we lɛ́ɛ é, hwi mɛ e nɔ zé aɖisílɔ towe dó yí yě sín kɛntɔ́ sí ɔ́, ɖe xomɛnyínyɔ́ towe xlɛ́ mì.

⁸ Nya xɛ ɖo jǐ ce nukúnzin ɖɔhun, cyɔ́n awa towe jǐ ce;

⁹ ma lɔn nú mɛdídá e ɖo ya dó nú mì wɛ lɛ́ɛ kpé wǔ ce ó, ma lɔn nú kɛntɔ́ e lɛ́ lɛ̌ dó mì lɛ́ɛ kpé wǔ ce ó.

¹⁰ Yě nɔ́ kú nǔbláwǔ nú mɛ ǎ, goyíyí xó jɛ́n nɔ́ tɔ́n sín nu yětɔn mɛ.

¹¹ Yě ɖo afɔ xa nú mì wɛ, yě kó lɛ́ lɛ̌ dó mì, yě ɖo cícɔ́ mì wɛ, bó ná zin mì dɛ́.

¹² A mɔ yě ɔ́, a nǎ ɖɔ kinnikínní ví e ɖo lan ba ná vún ɖu ɔ́ wɛ.

¹³ Mawu Mavɔmavɔ, sí te, yi kpé yě, zin yě dɛ́. Sɔ́ hwǐ towe dó hwlɛ́n mì sín mɛdídá nɛ́ lɛ́ɛ sí.

¹⁴ Mawu Mavɔmavɔ, hwi ɖésú ní sú kún yětɔn dó, gbɛ yětɔn ní fó mɔ̌. Nǔ baɖabaɖa e a sɔ́ ɖó vo nú yě ɔ́, nǎ bǐ yě; yě ní ɖu bó zín hǔn; vǐ yětɔn lɛ́ɛ ní ɖu gɔ́ xo, bó kpo nú vǐvú yětɔn lɛ́ɛ.

¹⁵ Nyɛ ɔ́, un ná mɔ we, ɖó un wa nǔɖé nyi do ǎ. Un fɔ́n bó ɖo mimɔ we wɛ ɔ́, xomɛ nɔ hun mì.