Ɖɛhan 150 - MAWUXÓWÉMA

¹ Mi kpa Mawu Mavɔmavɔ! Mi kpa susu nú Mawu ɖo nɔtɛn mímɛ́ tɔn. Mi kpa susu n'i ɖo jǐxwé, fí e hlɔ̌nhlɔ́n tɔn ɖo azɔ̌ wa ɖe wɛ é.

² Mi kpa susu n'i ɖó nǔ ɖaxó ɖaxó e é bló lɛ́ɛ tamɛ. Mi kpa susu n'i ɖó lě e é xɔ susu sɔ é tamɛ.

³ Mi kún lanzo dó kpa susu n'i, mi xo kanhún kanwǒnɔ kpó kantántɔnnɔ kpó dó kpa susu n'i.

⁴ Mi xo hǔnví bó ɖú we dó kpa susu n'i, mi xo kanhún dó kpa susu n'i. Mi kún kpete dó kpa susu n'i.

⁵ Mi xo gan e ɖi gbe ganjí é dó kpa susu n'i. Mi xo gan sú dó kpa susu n'i.

⁶ Nǔ e ɖó funfún é bǐ ní kpa susu nú Mawu Mavɔmavɔ. Mi kpa Mawu Mavɔmavɔ!