Ɖɛhan 147 - MAWUXÓWÉMA

¹ Mi kpa Mawu Mavɔmavɔ! É nyɔ́ bɔ mǐ nǎ ji han mlá Mawu mǐtɔn, ɖó susu kpa n'i nɔ́ nyɔ́ bó sɔgbe.

² Mawu Mavɔmavɔ vɔ́ Jeluzalɛ́mu toxo ɔ́ bló ɖó. É kplá Izlayɛ́li ví e ɖo gbějí lɛ́ɛ bǐ wá xwé.

³ É gbɔ azɔn nú mɛ e ayi yětɔn xo akpa lɛ́ɛ, bó súnsún ɖasin nú yě.

⁴ É xa sunví nabí e ɖo jǐ é, bó ná nyǐkɔ ɖokpó ɖokpó.

⁵ Mawu Mavɔmavɔ mǐtɔn kló, hlɔ̌nhlɔ́n tɔn d'agba. Nǔnywɛ́ tɔn ɖó dogbó ǎ.

⁶ Mawu Mavɔmavɔ nɔ dó alɔ mɛ e nɔ sɔ́ yěɖée hwe lɛ́ɛ bɔ yě nɔ́ sí te, bó ká nɔ́ sɔ́ mɛdídá lɛ́ɛ hwe káká bɔ yě nɔ́ j'ayǐ.

⁷ Mi ji han nú Mawu Mavɔmavɔ dó dó kú n'i. Mi sɔ́ kanhún dó mlá Mawu mǐtɔn.

⁸ É wɛ nɔ́ sɔ́ akpɔ́kpɔ́ dó bú jǐnukúnsin ná, é wɛ ɖó jǐ bɔ é nɔ́ ja dó ayǐkúngban jí. É wɛ ɖó gběhan bɔ é nɔ́ wú gbɔn só jí.

⁹ É nɔ́ ná nǔɖuɖu kanlin lɛ́ɛ. Avǔnsákɔwó lɛ́ɛ ɖo xovɛ́ ví ya wɛ ɔ́, é wɛ nɔ́ ná nǔɖuɖu yě.

¹⁰ Hlɔ̌nhlɔ́n e ɖo ahwan-yisɔ́sú wú é wɛ nyí nǔ e xɔ akwɛ́ nukún tɔn mɛ é ǎ. Hlɔ̌nhlɔ́n e ɖo ahwanfuntɔ́ syɛ́nsyɛ́n ɖé wú ɔ́ wɛ ka nyí nǔ e nɔ́ víví n'i é ǎ.

¹¹ Mɛ e sín nǔ nɔ́ nyɔ́ Mawu Mavɔmavɔ nukún mɛ é wɛ nyí mɛ e nɔ sí i lɛ́ɛ; yě mɛ e nɔ gán jɛ wǔ tɔn lɛ́ɛ.

¹² Jeluzalɛ́mu, mlǎ Mawu Mavɔmavɔ. Sinyɔ́ɔ, kpa susu nú Mawu towe,

¹³ ɖó é ná syɛ́nsyɛ́n nǔ e a nɔ dó sú hɔntogbó towe lɛ́ɛ é, bó xo ɖɛ dó vǐ towe lɛ́ɛ jí ɖo toxo towe mɛ.

¹⁴ É ná fífá we ɖo ayǐkúngban towe jí, bó ná jinukún e nyɔ́ ganjí lɛ́ɛ we bɔ a ɖu gɔ́ xo.

¹⁵ É nɔ́ ɖɔ xó nú ayǐkúngban ɔ́, bɔ nǔ e é zɔ́n wiwa lɛ́ɛ bǐ nɔ́ nyí wiwa bléwún.

¹⁶ É nɔ́ sɛ́ laglási dó bɔ é nɔ́ wé avɔkanfún ɖɔhun; laglási ɔ́ nɔ́ gba fo jí ɖɔhun.

¹⁷ Laglási jí ɔ́ nɔ́ ja, bó nɔ́ ná avuvɔ ɖésú. Mɛ̌ ka sixú nɔ te avuvɔ tɔn nukɔn?

¹⁸ É ká nɔ́ lɛ́ ɖɔ xó kpowun bɔ laglási ɔ́ bǐ nɔ́ sínsín. É nɔ́ sɛ́ jɔhɔn dó bɔ laglási ɔ́ bǐ nɔ́ húzú sin bó nɔ́ sa tɔ.

¹⁹ É ɖɔ xó tɔn nú togun tɔn Jakɔ́bu ví lɛ́ɛ. É ná sɛ́n tɔn lɛ́ɛ kpó gbeta tɔn lɛ́ɛ kpó Izlayɛ́li.

²⁰ É bló mɔ̌ nú akɔta ɖěvo, akɔta ɖěvo sɔ́ tunwun nǔ e é zɔ́n lɛ́ɛ ǎ. Mi kpa Mawu Mavɔmavɔ!