Ɖɛhan 146 - MAWUXÓWÉMA

Mawu nɔ nya xɛ ɖo mɛ jí

¹ Mi kpa Mawu Mavɔmavɔ! Un ɖo susu kpa nú we wɛ Mawu Mavɔmavɔ!

² Un kpo ɖo gbɛ ɔ́, un ná kpa susu nú Mawu Mavɔmavɔ. Afɔ ce ɖo kɔ́ gbo wɛ ɔ́, un ná mlá Mawu ce dó han mɛ.

³ Mi ma gán jɛ gǎnhúnǔtɔ́ gbɛmɛ fí tɔn lɛ́ɛ wú ó. Gbɛtɔ́ wɛ yě nyí, yě kpé wú bó ná hwlɛ́n mɛ gán ǎ.

⁴ Funfún ná jó yě dó gbe ɖokpó, bɔ yě ná lɛ́ kɔ yi kɔ́ glɔ́, bɔ gbe nɛ́ ɔ́ gbe ɔ́, linnáwa yětɔn lɛ́ɛ ná fó ɖó fínɛ́.

⁵ Nǔ nyɔ́ nú mɛ e Mawu Jakɔ́bu tɔn nyí gǎnjɛwú ná é, mɛ e sɔ́ nukúnɖíɖó tɔn bǐ dó Mawu Mavɔmavɔ, Mawu tɔn jí é.

⁶ É wɛ bló jǐxwé kpó ayǐkúngban kpó, bó bló xu kpó nǔ e ɖ'é mɛ lɛ́ɛ kpó; é ɖo gbejí káká sɔ́yi.

⁷ É nɔ́ gbo hwɛ nú mɛ e è táfú lɛ́ɛ. É nɔ́ ná nǔɖuɖu mɛ e xovɛ́ sin lɛ́ɛ; Mawu Mavɔmavɔ nɔ ɖe mɛ e è wlǐ lɛ́ɛ nyi te.

⁸ Mawu Mavɔmavɔ nɔ hun nukún nú mɛ e tɔ́n nukún lɛ́ɛ. Mawu Mavɔmavɔ nɔ jlɔ́ mɛ e ɖo tɔ́tɔ́ lɛ́ɛ. Mawu Mavɔmavɔ nɔ yí wǎn nú hwɛjijɔnɔ lɛ́ɛ.

⁹ Mawu Mavɔmavɔ nɔ hɛn jǒnɔ lɛ́ɛ. Mawu Mavɔmavɔ nɔ nya xɛ ɖo tɔ́cyɔvǐ lɛ́ɛ kpó asúkúsi lɛ́ɛ kpó jí. Lo ɔ́, é nɔ́ gba tito mɛdídá tɔn lɛ́ɛ.

¹⁰ Mawu Mavɔmavɔ ɖu axɔ́sú káká sɔ́yi. Óo! Sinyɔ́ɔ, Mawu towe tíin káká sɔ́yi. Mi kpa Mawu Mavɔmavɔ!