Ɖɛhan 145 - MAWUXÓWÉMA

Axɔ́súɖuɖu towe ɖo te tɛgbɛ

¹ Davídi sín han Mawu ce, axɔ́sú ce! Un ná nɔ́ mlá we, un ná nɔ́ dó kú nú we tɛgbɛ.

² Un ná dó kú nú we gbe bǐ gbe. Un ná nɔ́ mlá nyǐkɔ towe tɛgbɛ, bó ná mlá káká yi káká sá.

³ Mawu Mavɔmavɔ kló, susu jɛ xá ɛ ɖě ɖo ɖě jí. É kló bɔ é sixú jlɛ́ ǎ.

⁴ Gbɛtɔ́ lɛ́ɛ bǐ ní ɖɔ nǔ e Mawu bló lɛ́ɛ nú vǐ yětɔn, nú vǐ ná wá ɖɔ nú vǐ e yě ɖésúnɔ ná wá ji lɛ́ɛ é. Yě ní jlá nǔ ɖaxó ɖaxó e a blǒ lɛ́ɛ.

⁵ Un ná ɖɔ lě e a kpé nǔ wú gbɔn é, lě e a xɔ susu sɔ é, bó ɖɔ lě e a nyɔ̌ kpɔ́n sɔ é. Un ná lin tamɛ dó nǔ ɖagbe ɖagbe e a wa lɛ́ɛ wú.

⁶ Un ná ɖɔ lě e acɛkpikpa towe syɛ́n gbɔn é. Nyɛ ɔ́, un ná nɔ́ ɖɔ nǔ ɖaxó ɖaxó e a nɔ bló lɛ́ɛ.

⁷ Nǔ ɖagbe ɖagbe ɖaxó ɖaxó e a blǒ lɛ́ɛ ní jlá gbejíninɔ towe.

⁸ Mawu Mavɔmavɔ nyɔ́ xomɛ; mɛ nú nɔ́ blá wǔ n'i. É nɔ́ yá wǔ sin xomɛ ǎ; xomɛnyínyɔ́ tɔn d'agba.

⁹ Mawu Mavɔmavɔ nyɔ́ nú mɛ bǐ. Wǎn yíyí tɔn ɖo nǔ e è blǒ lɛ́ɛ bǐ jí.

¹⁰ Mawu Mavɔmavɔ! Nǔ e a blǒ lɛ́ɛ bǐ ná mlá we, bɔ mɛ e ɖo gbejí nú we lɛ́ɛ ná dó kú nú we.

¹¹ Yě ná ɖɔ lě e axɔ́súɖuɖu towe ɖó susu sɔ é, bó ná jlá lě e a kpé nǔ wú gbɔn é.

¹² Énɛ́ ɔ́, yě ná ɖɔ nǔ ɖaxó ɖaxó e a nɔ wa é nú gbɛtɔ́ lɛ́ɛ, bó ná ɖɔ lě e axɔ́súɖuɖu towe xɔ susu sɔ é nú yě.

¹³ Axɔ́súɖuɖu towe ɔ́, axɔ́súɖuɖu mavɔ mavɔ wɛ, bɔ gǎnhúnǔ towe ɖo te káká sɔ́yi.

¹⁴ Mawu Mavɔmavɔ nɔ dó alɔ mɛ e j'ayǐ lɛ́ɛ bǐ, bó nɔ́ jlɔ́ mɛ e ɖo tɔ́tɔ́ lɛ́ɛ.

¹⁵ Hwi lɔnu wɛ mɛ bǐ nɔ́ kpɔ́n, bɔ a nɔ ná nǔɖuɖu mɛ bǐ dó gan mɛ.

¹⁶ A nɔ hun alɔ bo nɔ ná nǔɖuɖu nǔ e kó sixú ɖo gbɛ é bǐ, bɔ yě nɔ́ ɖu nǔ gɔ́ xo.

¹⁷ È nɔ mɔ gbejíninɔ Mawu Mavɔmavɔ tɔn ɖo nǔ e é nɔ́ wa lɛ́ɛ bǐ mɛ. È nɔ mɔ lě e é nyɔ́ xomɛ gbɔn é gbɔn nǔ e é nɔ́ wa lɛ́ɛ bǐ mɛ.

¹⁸ Mawu Mavɔmavɔ ɖo kpɔ́ xá mɛ e nɔ sú xó ylɔ́ ɛ lɛ́ɛ bǐ; yě mɛ e nɔ ylɔ́ ɛ kpó ayi yětɔn bǐ kpó lɛ́ɛ.

¹⁹ Nǔɖé jló mɛ e ɖó sísí n'i lɛ́ɛ ɔ́, é nɔ́ bló nú yě. Yě sú xó ɔ́, é nɔ́ se, bó nɔ́ hwlɛ́n yě gán.

²⁰ Mawu Mavɔmavɔ nɔ hɛn mɛ e yí wǎn n'i lɛ́ɛ bǐ, bó nɔ́ vívá mɛdídá lɛ́ɛ bǐ sín kún.

²¹ Nu ce ní mlá Mawu Mavɔmavɔ, nǔ e ko sixú ɖo gbɛ é bǐ ní kpa susu n'i sín din káká sɔ́yi.