Ɖɛhan 144 - MAWUXÓWÉMA

Axɔ́sú ɖɛ

¹ Davídi sín han Susu nú Mawu Mavɔmavɔ, só ce e wú un gán jɛ é! É mɛ e nɔ kplɔ́n mì ahwanfunfun, bó nɔ́ kplɔ́n mì lě e è nɔ kpé hun xá mɛ gbɔn é.

² Đagbewatɔ́ ce ɔ́, ahohó ce ɔ́, bibɛtɛn ce ɔ́, hwɛnɖemɛtɔ́ ce ɔ́, é wɛ nyí gǎglónú ce e glɔ́ un nɔ bɛ ta dó é. É wɛ sɔ́ togun ce ɖó acɛ ce glɔ́.

³ Mawu Mavɔmavɔ, étɛ́ gbɛtɔ́ ka nyí lɔ tawun bɔ a ka ná tunwun i? Jinúkánɖutɔ́ alɔ atɔ́ɔ́n ɔ́, étɛ́ é ká nyí bɔ a ka ná flín i?

⁴ Gbɛtɔ́ ɔ́, jɔhɔn ɖɔhun kpowun wɛ wá yi; azǎn tɔn lɛ́ɛ nɔ́ dín wá yi léwún yɛ ɖɔhun.

⁵ Mawu Mavɔmavɔ, dɔn jǐnukúnsin wá do bo jɛ te. Đǒ alɔ só lɛ́ɛ wú bónú yě ní si azɔ.

⁶ Đe gbe nú jǐ ní kɛwun bo gba kɛntɔ́ ce lɛ́ɛ dó. Da gǎ dó fí e yě kplé ɖe é bónú wezun kan gǎn.

⁷ Dlɛ̌n alɔ towe lɛ́ɛ sín jǐ dɔ̌n bó hwlɛ́n mì gán. Yǐ mì sín tɔ e ɖi sin bó ɖo bǔbú mì wɛ lɛ́ɛ lɔ mɛ.

⁸ Xó jɔ xó ɖé ɖo yě nu ǎ, nǔ e yě dó akpá ɖɔ émí ná bló lɛ́ɛ ɔ́, yě nɔ́ bló ɖě ǎ.

⁹ Mawu ce, un ná ji han yɔ̌yɔ́ ɖokpó nú we. Un ná zé kanhún kanwǒnɔ dó ji han mlá we.

¹⁰ Hwi mɛ e nɔ hwlɛ́n axɔ́sú lɛ́ɛ gán ɔ́. Hwi mɛ e hwlɛ́n mɛsɛntɔ́ towe Davídi gán ɖo hwǐ ɖíɖá nu ɔ́.

¹¹ Wǎ hwlɛ́n mì gán; wǎ yǐ mì sín toɖévomɛnu lɛ́ɛ sí. Xójɔxó ɖé ɖo nu yětɔn ǎ. Nǔ e yě dó akpá tɔn ɖɔ émí ná wa lɛ́ɛ ɔ́, yě bló ɖě ǎ.

¹² Vǐ súnnu mǐtɔn lɛ́ɛ ní cí atín e ɖo vǔ, bɔ ayǐ nyɔ́ ná é ɖɔhun. Vǐ nyɔ̌nu mǐtɔn lɛ́ɛ cí dotín e wú è ɖe nǔ tɛnmɛ tɛnmɛ dó ɖo hɔnmɛ é ɖɔhun.

¹³ Agɔ̌ mǐtɔn lɛ́ɛ gɔ́, nǔ tɛnmɛ tɛnmɛ wɛ gɔ́ agɔ̌ mitɔn lɛ́ɛ. Gbɔ̌ mǐtɔn lɛ́ɛ ji gba; afatɔ́n (1.000) afatɔ́n wɛ yě nɔ́ ji, bó nɔ́ yi afatɔ́n afatɔ́n do wǒ wǒ gbɔn gle mǐtɔn lɛ́ɛ ta.

¹⁴ Nyibúkpó mǐtɔn lɛ́ɛ ní nɔ́ ɖo ada gbló wɛ; ahwan ma sɔ́ wá gba mǐ ɖě ó; è sɔ́ ná wlí mɛ ɖě yi kannumɔgbénu ǎ, mi ɖě sɔ́ ná ɖo xó sú gbɔn ali jí wɛ ɖo alě ná wɛ ǎ.

¹⁵ Nǔ nyɔ́ nú togun e nǔ ɖo mɔ̌ ná é. Nǔ nyɔ́ nú togun e sɔ́ Mawu Mavɔmavɔ dó ɖó Mawu é.