Ɖɛhan 143 - MAWUXÓWÉMA

¹ Davídi sín han Mawu Mavɔmavɔ, se ɖɛ ce, ɖǒtó vo e sa nú we wɛ un ɖe é. Hwɛjijɔnɔ wɛ a nyǐ, bó nyí gbejíninɔ; bo se ɖɛ ce!

² Ma ɖɔ émí ná ɖɔ hwɛ xá mɛsɛntɔ́ towe ó, ɖó mɛ e ɖo gbɛ mɛ fí é ɖěbǔ mɛ́ ɖo nukɔn towe ǎ.

³ Kɛntɔ́ ɖo gǔdo ce malɛ́málɛ́; é jló ná sɔ́ gbɛ ce xo kɔ́; é sɔ́ mì dó zǐnflú mɛ, mɛ e ko kú xóxó lɛ́ɛ ɖɔhun.

⁴ Wǔ kú mì bǐ, ayi ce bǐ gbadó ɖo xomɛ.

⁵ Un nɔ flín azǎn e ko wá yi lɛ́ɛ sɛ́ dó, bó nɔ́ lin tamɛ dó nǔ e a blǒ lɛ́ɛ é wú; un nɔ kpɔ́n nǔ e a zě alɔ towe dó bló lɛ́ɛ sɛ́ dó.

⁶ Un kɛ awa nú we vǐ ɖo anɔ̌nu ɖɔhun; kɔ towe nɔ xú mì ayǐkúngban e ba sin kpo é ɖɔhun. Agbɔ̌n

⁷ Mawu Mavɔmavɔ ce, kɛnklɛ́n yǎ wǔ se ɖɛ ce; un sɔ́ tunwun nǔ e ɖo wiwa mì wɛ é bǐ ǎ; ma ɖe kɔ dó mì ó, é má nyí mɔ̌ ǎ ɔ́, un táá cí mɛ e sɔ́ dó yɔdo mɛ wɛ è ɖe é ɖɔhun.

⁸ Ayǐ hɔ́n tlóló hǔn, nɔ ɖɔ lě e a nyɔ̌ xomɛ sɔ é nú mì, ɖó hwi wú wɛ un ɖeji dó; xlɛ́ ali e un ná gbɔn é mì, ɖó hwi ɖó nukún wɛ un ɖe.

⁹ Mawu Mavɔmavɔ, hwlɛ̌n mì gán ɖo kɛntɔ́ ce lɛ́ɛ bǐ sí; ɖó hwi gɔ́n wɛ un hɔn wá bɛ ɖe.

¹⁰ Kplɔ́n mì lě e un ná bló jlǒ towe gbɔn é, ɖó hwi wɛ nyí Mawu ce. Yɛ towe ɖagbe ɔ́ ní kplá mì gbɔn ali jlɔ́jlɔ́ jí.

¹¹ Mawu Mavɔmavɔ, nǎ gbɛ mì ɖó nyǐkɔ towe wú. Kpɔ́n dó hwɛjijɔ towe wú, bó hwlɛ́n mì sín adǎn e ɖo gbigbo mì wɛ lɛ́ɛ mɛ.

¹² Kpɔ́n dó xomɛnyínyɔ́ towe wú, bó vívá kɛntɔ́ ce lɛ́ɛ sín kún. Hu mɛ e ɖo ya dó nú mì wɛ lɛ́ɛ bǐ, ɖó mɛsɛntɔ́ towe wɛ un nyí.