Ɖɛhan 141 - MAWUXÓWÉMA

¹ Davídi sín han wɛ Mawu Mavɔmavɔ, un ɖo xó sú ylɔ́ we wɛ, wǎ dó alɔ mì, hwlɛ̌n dó mì. Un ɖo xó sú ylɔ́ we wɛ hǔn, nɔ ɖótó mì.

² Un dlɛ́n alɔ sɛ́ dó we, ɖɛ e xo wɛ un ɖe ɔ́ ní wá gɔ̌n towe zǎlínkpɔ́n sín azɔ ɖɔhun; ɖɛ ce ní wá gɔ̌n towe gbada vɔ́ ɖɔhun.

³ Mawu Mavɔmavɔ, nɔ hɛn nu ce, cɔ́ nufló ce lɛ́ɛ sín hɔn.

⁴ Ma lɔn nú un ɖɔ xó nyanya ɖé, abǐ un wa nǔ baɖabaɖa ɖé mɛdídá lɛ́ɛ ɖɔhun ó. Ma lɔn nú un ɖu agɔ̌ xá yě ó.

⁵ Ayijlɔ́jlɔ́nɔ dɔn tó nú mì, abǐ é kɛ nu dó nǔɖé wú nú mì ɔ́, wǎn e é yí nú mì é wú wɛ; un sixú gbɛ́ ǎ. Mɛdídá lɛ́ɛ nɔ́ ɖo dǎka xo wɛ, nyɛ ka nɔ ɖo ɖɛ xo wɛ tɛgbɛ.

⁶ Un ɖo yɛ wa wɛ ǎ: kɛntɔ́ ce lɛ́ɛ ɔ́, nú è ko kpíkpé gǎn yětɔn lɛ́ɛ gba dó só wú ɔ́, yě ná tunwun nǔ e wú un ɖo xó ɖɔ wɛ é.

⁷ Lě e ayǐ nɔ́ kɛ nu ɔ́, mɔ̌ wɛ kútomɛ ná kɛ nu bó bɛ́ xú yětɔn e gbɔn tánmɛ tánmɛ é mi.

⁸ Mawu Mavɔmavɔ, Aklúnɔ ce, hwi ɖó nukún wɛ un ɖe; hwi wɛ un hɔn wá su; hɛn mì ɖó gbɛ.

⁹ Hwlɛ̌n mì ɖo mɔ e yě ɖó nú mì ɔ́ mɛ, hwlɛ̌n mì ɖo gɛ̌ e ɖó nú mì wɛ nǔnyanyawatɔ́ lɛ́ɛ nɔ́ ɖe é mɛ.

¹⁰ Dǎkaxotɔ́ lɛ́ɛ ní jɛ mɔ e yě ɖésú ɖó lɛ́ɛ mɛ, bónú nyɛ ná gán ɖ'é mɛ.