Ɖɛhan 139 - MAWUXÓWÉMA

Mawu, a tunwun mì bǐ

¹ Hanjigbɛ́gán ɔ́ sín Ɖɛhanwéma mɛ wɛ han élɔ́ ɖe. Davídi sín han wɛ. Mawu Mavɔmavɔ, a mɔ nukúnnú jɛ ayi ce mɛ, a tunwun mì bǐ.

² A nɔ tunwun hwenu e un nɔ jínjɔ́n ayǐ é, bó nɔ́ tunwun hwenu e un nɔ sí te é. Un ɖo nǔɖé lin wɛ ɔ́, a nɔ ko mɔ sɛ́ dó.

³ A nɔ tunwun hwenu e un nɔ ɖi zɔnlin é, bó nɔ́ tunwun hwenu e un nɔ mlɔ́ ayǐ é. A nɔ tunwun nǔ e un nɔ wa lɛ́ɛ bǐ.

⁴ Mawu Mavɔmavɔ, xó ɔ́ nɔ́ kó tɔ́n sín nu ce mɛ, cóbónú a nɔ ko tunwun xó e ɖɔ gbé un ja é bǐ ǎ.

⁵ A ɖo nukɔn ce, a ɖo gǔdo ce, a lɛ́ lɛ̌ dó mì bǐ, alɔ towe ɖo jǐ ce.

⁶ Káká bǎ e mɛ a tunwun mì yi jɛ ɔ́ kpácá mì, un tunwun lě e un ná jlɛ́ gbɔn ɔ́ lɔ ǎ.

⁷ Fítɛ́ un ka sixú yi bɔ a ma sixú yi ǎ? Fítɛ́ un ka sixú hɔn yi bɔ a ma sixú mɔ mì ǎ?

⁸ Un yi jǐxwé ɔ́, a ɖo dɔ̌n. Un yi kútomɛ ɔ́, a ɖo dɔ̌n.

⁹ Un na bo zɔn xɛ ɖɔhun, bó yi cí fí e hwe nɔ tɔ́n sín é, abǐ fí e hwe nɔ yi xɔ ɖe ɔ́,

¹⁰ a ɖo fínɛ́ lɔmɔ̌, bó ná kplá mì, aɖisí lɔ towe ná hɛn mì.

¹¹ Ényí un ɖɔ: “Ablu ní cyɔ́n mì, kéze ní húzú zǎn lɛ́ lɛ̌ dó mì.”

¹² Nú un ɖɔ mɔ̌ ɔ́, ablu ɔ́ nɔ́ lɛ́ húzú wěziza nú hwɛ, zǎn nɔ́ lɛ́ za wě kéze ɖɔhun; zǐnflú kpó wěziza kpó ɔ́, nǔ ɖokpó ɔ́ wɛ yě nyí nú hwɛ.

¹³ Hwi wɛ bló ayi e ɖo xo ce mɛ é, hwi wɛ ján mì ɖo nɔ ce xo mɛ.

¹⁴ Un dó kú nú we ɖó a blǒ mì bɔ un nyɔ́ kpɔ́n ɖésú. Nǔ e a blǒ lɛ́ɛ bǐ nyɔ́ kpɔ́n, un tunwun ganjí.

¹⁵ Hwenu e a ɖo blǒbló mì wɛ ɖo nǔglɔ́ ɔ́, hwenu e a ɖo jǐnján mì wɛ ɖo nɔ ce xomɛ ɔ́, agbaza ce sixú hwlá nǔ ɖěbǔ dó we ǎ.

¹⁶ Hwenu e kɛ́n jɛ nɔ ce wú é jɛ́n a ko mɔ mì, a ko wlán azǎn nabí e un ná nɔ gbɛ xɔ é dó wěma towe mɛ, có azǎn énɛ́ lɛ́ɛ ɖokpó ká kó wá ǎ.

¹⁷ Mawu, nǔ e ɖo ayi towe mɛ lɛ́ɛ ɔ́, un sixú mɔ nǔ jɛ wú gbeɖé ǎ; nǔ e ɖo ayi towe mɛ lɛ́ɛ sukpɔ́ lóóo!

¹⁸ Un sixú xa bǐ ǎ; yě sukpɔ́ hú kɔ́ e ɖo xuta é. Un na bo kpé wú bó xa bǐ ɔ́, un ná sixú mɔ nukúnnú jɛ wǔ we yi kpé ǎ.

¹⁹ Mawu ce, nú a hu mɛdídá lɛ́ɛ ɔ́, nú a sɛ mɛhutɔ́ énɛ́ lɛ́ɛ dó zɔ nú mì ɔ́, é ná nyɔ́ mɛ!

²⁰ Kɛntɔ́ towe lɛ́ɛ nɔ́ sɔ́ nyǐkɔ towe dó blɛ́ mɛ, yě nɔ́ sɔ́ nyǐkɔ towe ɖó nu dó xo dǎka.

²¹ Mawu Mavɔmavɔ, nɛ̌ un ma ka ná gbɛ́ wǎn nú mɛ e gbɛ́ wǎn nú we lɛ́ɛ ǎ gbɔn? Mɛ e nɔ tɔ́n ahwan we lɛ́ɛ ɔ́, un mɔ yě ɔ́, nǔ yětɔn ma ná vɛ́ wǔ ce ǎ gbɔn?

²² Un gbɛ́ wǎn nú yě titewungbe, kɛntɔ́ wɛ un sɔ́ yě dó ɖó.

²³ Mawu ce, kpɔ́n xo ce mɛ bǐ! Kpɔ́n lě e un ɖe é, kpɔ́n nǔ e ɖo gbigbo mì wɛ ɖo ayi mɛ é!

²⁴ Kpɔ́n ɖɔ ali nyanya wɛ un wlí a jí, bó dɔn mì ɖó ali e nyí towe é jí, ali e nyí towe káká sɔ́yi é jí.