Ɖɛhan 135 - MAWUXÓWÉMA

¹ Mi kpa Mawu Mavɔmavɔ! Mi mlá Mawu Mavɔmavɔ! Mi mɛsɛntɔ́ tɔn lɛ́ɛ mi, mi mlá ɛ!

² Mi mɛ e ɖo te ɖo Mawu Mavɔmavɔ xwé, ɖo Mawu Mavɔmavɔ, Mawu mitɔn sín sinsɛnxɔ mɛ lɛ́ɛ e mi, mi mlá ɛ!

³ Mi mlá Mawu Mavɔmavɔ, ɖó Mawu Mavɔmavɔ nyɔ́. Mi mlá ɛ dó han mɛ, ɖó é fá.

⁴ Mawu Mavɔmavɔ sɔ́ Jakɔ́bu bɔ é nyí étɔn; é sɔ́ Izlayɛ́li bɔ é nyí étɔn tunwuntunwun.

⁵ Un tunwun ɖɔ Mawu Mavɔmavɔ kló, Aklúnɔ mǐtɔn hú gǎn nǔmɛsɛn lɛ́ɛ bǐ.

⁶ Nǔ e jló Mawu Mavɔmavɔ é bǐ wɛ é nɔ́ bló. É nɔ́ bló ɖo jǐxwé, bó nɔ́ bló ɖo ayǐkúngban jí; é nɔ́ bló gbɔn xu lɛ́ɛ mɛ, bó nɔ́ bló ɖo ayǐkúngban glɔ́.

⁷ É nɔ́ sɔ́ akpɔ́kpɔ́ sí te sín fí e ayǐkúngban kponu ɖó lɛ́ɛ. É nɔ́ ɖɔ bɔ jǐ nɔ́ kɛ wun bó nɔ́ ja. É nɔ́ sɔ́ jɔhɔn e é hɛn ɖó te é sí te.

⁸ É hu nukɔngbéví lɛ́ɛ ɖo Ejípu, é hu nukɔngbéví gbɛtɔ́ lɛ́ɛ tɔn, é hu nukɔngbéví kanlin lɛ́ɛ tɔn.

⁹ Mawu ɖe wuntun tɛnmɛ tɛnmɛ xlɛ́, é jlɛ́ nǔ tɛnmɛ tɛnmɛ ɖo Ejípu; é wa nǔ xá Ejípu xɔ́sú ɔ́ kpó azaglɔ́gán tɔn lɛ́ɛ kpó.

¹⁰ É gba akɔta gěgé, é hu axɔ́sú syɛ́nsyɛ́n gěgé.

¹¹ É hu Sihɔ́ni, axɔ́sú Amɔliti lɛ́ɛ tɔn ɔ́, bó hu Ɔgu Basáni xɔ́sú ɔ́, bó hu Kanáa xɔ́sú lɛ́ɛ bǐ.

¹² É hu yě, bó sɔ́ to yětɔn jó nú togun Izlayɛ́li tɔn.

¹³ Mawu Mavɔmavɔ, nyǐkɔ towe ná nɔ ayǐ káká sɔ́yi. Mawu Mavɔmavɔ, mɛ e ná wá jɔ sɔ lɛ́ɛ bǐ ná tunwun we,

¹⁴ ɖó Mawu Mavɔmavɔ ná gbo hwɛ nú togun tɔn; mɛsɛntɔ́ tɔn lɛ́ɛ sín nǔ ná blá wǔ n'i.

¹⁵ Nǔ e akɔta lɛ́ɛ nɔ sɛn ɔ́, kpatágan kpó siká kpó wɛ è dǒ bló, gbɛtɔ́ núwiwa wɛ ká nyí nǔ nɛ́ lɛ́ɛ bǐ.

¹⁶ Yě ɖǒ nu, yě ká nɔ́ ɖɔ xó ǎ, yě ɖǒ nukún, yě ká nɔ́ mɔ nǔ ǎ,

¹⁷ yě ɖǒ tó, yě ká nɔ́ se nǔ ǎ, yě ɖǒ funfún ǎ.

¹⁸ Mɛ e bló nǔmɛsɛn énɛ́ lɛ́ɛ kpó mɛ e nɔ sɛn yě lɛ́ɛ kpó bǐ wɛ nyí nǔ ɖokpó ɔ́.

¹⁹ Izlayɛ́li ví lɛ́ɛ e mi, mi dó kú nú Mawu Mavɔmavɔ. Aalɔ́ɔn ví lɛ́ɛ e mi, mi dó kú nú Mawu Mavɔmavɔ.

²⁰ Levíi ví lɛ́ɛ e mi, mi dó kú nú Mawu Mavɔmavɔ. Mi mɛ e nɔ ɖó sísí nú Mawu Mavɔmavɔ lɛ́ɛ e mi, mi dó kú nú Mawu Mavɔmavɔ.

²¹ È nǐ dó kú ɖaxó ɖé nú Mawu Mavɔmavɔ sín Jeluzalɛ́mu. É ɖo Sinyɔ́ɔ só ɔ́ jí. È nǐ kpa susu nú Mawu Mavɔmavɔ.