Ɖɛhan 130 - MAWUXÓWÉMA

¹ È ɖo kpó fán wɛ xwe Mawu xwé ɖo Jeluzalɛ́mu ɔ́ wɛ è nɔ ji han élɔ́. Mawu Mavɔmavɔ, adǎn wɛ ɖo gbigbo mì wɛ bɔ un dán ɖě wa gbɔn, bó ɖo xó sú ylɔ́ we wɛ.

² Aklúnɔ, se xó e sú ylɔ́ we wɛ un ɖe ɔ́! Đǒtó vo e sa nú we wɛ un ɖe ɔ́!

³ Mawu Mavɔmavɔ, ényí a nǎ kpɔ́n dó hwɛ e mǐ nɔ́ hu lɛ́ɛ wú ɔ́, mɛ̌ ká ná gán ɖ'é mɛ?

⁴ Amɔ̌, hwɛsɔ́kɛ ɔ́, hwi gɔ́n wɛ è nɔ mɔ ɖe, énɛ́ wú wɛ è ɖǒ ná ɖó sísí nú we.

⁵ Mawu Mavɔmavɔ wɛ un ɖo te kpɔ́n, é ɖó nukún wɛ un ɖe kpó ayi ce bǐ kpó, un ɖeji dó xó tɔn wú.

⁶ Un ɖo te kpɔ́n Aklúnɔ; lě e un ɖo te kpɔ́n ɛ gbɔn ɔ́ syɛ́n hú te e zǎncɔ́tɔ́ nɔ́ nɔ kpɔ́n ayǐhínhɔ́n é.

⁷ Izlayɛ́li, gǎn jɛ Mawu Mavɔmavɔ wú, ɖó Mawu Mavɔmavɔ nyɔ́ xomɛ, lě e é ná bló gbɔn bó hwlɛ́n we gán ɔ́ sukpɔ́ ɖo así tɔn.

⁸ Mawu Mavɔmavɔ wɛ ná hwlɛ́n Izlayɛ́li gán ɖo hwɛ tɔn lɛ́ɛ bǐ mɛ.