Ɖɛhan 125 - MAWUXÓWÉMA

¹ È ɖo kpó fán wɛ xwe Mawu xwé ɖo Jeluzalɛ́mu ɔ́ wɛ è nɔ ji han élɔ́. Mɛ e ɖeji dó Mawu Mavɔmavɔ wú lɛ́ɛ cí Sinyɔ́ɔ só ɖɔhun: é nɔ́ dán wǔ gbeɖé ǎ, é dó ɖɔ do bó ná nɔ mɔ̌ káká sɔ́yi.

² Só lɛ́ lɛ̌ dó Jeluzalɛ́mu toxo ɔ́, mɔ̌ wɛ Mawu Mavɔmavɔ lɛ́ lɛ̌ dó togun tɔn gbɔn sín din káká sɔ́yi.

³ Acɛkpikpa e nɔ xo adǎka é sixú nɔ mɛ e nɔ wa nǔ ɖó sɛ́nxwi jí lɛ́ɛ sín tomɛ ǎ; é má nyí mɔ̌ ǎ ɔ́, yě lɔ táá wá jɛ nǔ nyanya dó sin jí.

⁴ Mawu Mavɔmavɔ, wa ɖagbe nú gbɛtɔ́ ɖagbe lɛ́ɛ, wa ɖagbe nú ayijlɔ́jlɔ́nɔ lɛ́ɛ!

⁵ Lo ɔ́, mɛ e ɖo ali gɔ́ndɔ́n gɔ́ndɔ́n jí lɛ́ɛ ɔ́, Mawu Mavɔmavɔ, za yě kpó mɛ e nɔ wa nǔ nyanya lɛ́ɛ kpó. Mawu Mavɔmavɔ ní ná fífá Izlayɛ́li!