Ɖɛhan 12 - MAWUXÓWÉMA

Mawu Mavɔmavɔ, hwlɛ̌n mǐ

¹ Hanjigbɛ́gán ɔ́ sín hanjiwéma mɛ wɛ han élɔ́ ɖe. Davídi sín han wɛ; è nɔ ji bo nɔ xo kanhún kantántɔnnɔ d'é mɛ.

² Mawu Mavɔmavɔ, hwlɛ̌n mǐ, ɖó mɛ e nɔ wa nǔ ɖó sɛ́nxwi jí lɛ́ɛ ɖo vivɔ wɛ, mɛ e ɖo gbejí nú we lɛ́ɛ bǐ ɖo vivɔ wɛ ɖo gbɛtɔ́ lɛ́ɛ tɛ́ntin.

³ Mɛ ɖé sí te ɔ́, adingban jɛ́n é nɔ́ ɖó nú nɔzo tɔn, yě nɔ́ ɖo xó víví ɖɔ nú yěɖée wɛ, vo wɛ é ká ɖe ɖo xo yětɔn mɛ.

⁴ Mawu Mavɔmavɔ ní vívá kún nú mɛ e nɔ víví nu lɛ́ɛ, é ní vívá kún nú mɛ e nɔ dó jimakplɔ́ngbe lɛ́ɛ,

⁵ é ní vívá kún nú mɛ e nɔ ɖɔ: “Đɛ̌ bí nú mǐ, mǐ nyɔ̌ xó ɖɔ, mɛ̌ ka ná sixú kpa acɛ nú mǐ” lɛ́ɛ.

⁶ Mawu Mavɔmavɔ ɖɔ: “È ɖo mɛ ma ɖó mɛɖé lɛ́ɛ táfú wɛ, wamamɔnɔ lɛ́ɛ ɖo azɔn wɛn wɛ. Din ɔ́, un ná sí te. Un ná hwlɛ́n mɛ e xwe akpi dó wɛ è ɖe lɛ́ɛ gán.”

⁷ Xó e Mawu Mavɔmavɔ ɖɔ lɛ́ɛ ɔ́, xó mímɛ́ ɖésú wɛ; xó tɔn lɛ́ɛ cí kpatágan e è xo zo dó bó sínsín é ɖɔhun; azɔn tɛ́nwe wɛ è xo zo dó, bó ɖe nǔ kwíji bǐ sín mɛ bɔ é mɛ́.

⁸ Mawu Mavɔmavɔ, hwi wɛ ná cyɔ́n alɔ mǐ jí, hwi wɛ ná hwlɛ́n mǐ ɖo gbɛtɔ́ alɔkpa énɛ́ lɛ́ɛ sí káká sɔ́yi.

⁹ Gbɛtɔ́ dídá lɛ́ɛ gba kpé gbɛ ɔ́ bǐ mɛ, bɔ nǔ nyanya kpé tókɔ awɔnkɔ.