Ɖɛhan 119 - MAWUXÓWÉMA

¹ Nǔ nyɔ́ nú mɛ e nǔɖé má jɛ do ɖo walɔ yětɔn wú ǎ lɛ́ɛ, mɛ e nɔ xwedó Mawu Mavɔmavɔ sɛ́n ɔ́ dó wa nǔ lɛ́ɛ.

² Nǔ nyɔ́ nú mɛ e nɔ nyi sɛ́n tɔn lɛ́ɛ, mɛ e nɔ ba ɛ kpó ayi yětɔn bǐ kpó lɛ́ɛ.

³ Mɛ énɛ́ lɛ́ɛ ɔ́, yě nɔ́ wa nǔ agɔ ǎ, ali Mawu tɔn jí wɛ yě nɔ́ gbɔn.

⁴ Mawu, hwɛ ɔ́, a nǎ sɛ́n towe lɛ́ɛ, bónú è nǎ kpé nukún yě wú bó nyi ganjí tɔn.

⁵ Walɔ ce lɛ́ɛ ní lí dǒ bó xwetɛ́, bónú má xwedó tito towe lɛ́ɛ.

⁶ Énɛ́ ɔ́, nú un wá ɖo nǔ e a zɔ́n lɛ́ɛ xa wɛ ɔ́, winnyá sɔ́ ná hu mì ǎ.

⁷ Un ɖo gbeta e a ɖe tɔ́n bɔ é sɔgbe lɛ́ɛ ɔ́ kplɔ́n wɛ ɔ́, un ná sɔ́ ayi ɖó wɛn bó ná mlá we.

⁸ Un ná ɖó kan dó jlǒ towe wú bó wa, ma jó mì dó gbeɖé ó.

⁹ Mawu, è ɖo wǐnnyáwínnyá mɛ ɔ́, nɛ̌ è ka sixú bló gbɔn bó ná nɔ́ zán gbɛ ɖagbe? Xó towe jɛ́n è nǎ nɔ́ xwedó dó wa nǔ.

¹⁰ Un ɖo biba we wɛ kpó ayi ce bǐ kpó. Ma jó mì dó nú un nɔ zɔ nú nǔ e a zɔ̌n lɛ́ɛ, bó bú ali ó.

¹¹ Un hɛn nǔ e a ɖɔ lɛ́ɛ ayi mɛ, bó ma wá hu hwɛ dó we ó.

¹² Jɛlijɛli nú we Mawu Mavɔmavɔ. Kplɔ́n tito towe lɛ́ɛ mì.

¹³ Un sɔ́ nu ce dó xa gbeta e tɔ́n sín nu towe mɛ lɛ́ɛ bǐ.

¹⁴ Sɛ́n towe nyinyi nɔ́ dó xomɛhunhun nú mì, dɔkun ɖaxó ɖé wɛ un jɛ ɖɔhun.

¹⁵ Un ná lin tamɛ dó sɛ́n towe lɛ́ɛ wú, un ná kpɔ́n ali e a ɖe lɛ́ɛ.

¹⁶ Tito e a ɖǒ ayǐ lɛ́ɛ xwedó mɛ wɛ un ná mɔ gbɛ víví ɖe, un ná wɔn xó towe ǎ.

¹⁷ Wa ɖagbe nú nyi mɛsɛntɔ́ towe, bónú ma nɔ gbɛ bó ná xwedó xó towe.

¹⁸ Hun nukún nú mì, bónú má mɔ nǔjíwǔ e ɖo sɛ́n towe mɛ lɛ́ɛ ganjí.

¹⁹ Jǒnɔ kpowun wɛ un nyí ɖo ayǐkúngban jí fí; ma sɔ́ nǔ e a zɔ̌n lɛ́ɛ hwlá dó mì ó.

²⁰ Gbeta towe lɛ́ɛ tunwuntunwun sín akpakpa nɔ sɔ́ mì hwebǐnu.

²¹ A nɔ gblɔ́n adǎn nú gbɛtɔ́ goyítɔ́, yě mɛ e gbɛ́ nǔ e a zɔ̌n lɛ́ɛ bló lɛ́ɛ, ali bú wɛ yě ɖe; yě wɛ a dǒ nu.

²² Đe hɛ̌ngban e ɖo ta ce é síin, ɖe mì sín winnyá mɛ, ɖó un nɔ nyi sɛ́n towe lɛ́ɛ.

²³ Gǎn lɛ́ɛ ɖo sé ce blá wɛ, nǔ ɖo mɔ̌ có un ɖo tamɛ lin dó tito towe lɛ́ɛ wú wɛ, ɖó mɛsɛntɔ́ towe wɛ un nyí.

²⁴ Sɛ́n towe lɛ́ɛ xwedó wɛ nɔ́ víví nú mì, ɖó sɛ́n towe lɛ́ɛ wɛ nɔ́ kplɔ́n nǔ mì.

²⁵ Kpɔ́n, un ko jɛ ayǐ, gbɛ ce ko xo kɔ́; hɛn mì ɖó gbɛ lě e xó towe ɖɔ gbɔn é.

²⁶ Un ɖɔ lě e un zán gbɛ ce gbɔn ɔ́, bɔ a se; din ɔ́, kplɔ́n tito towe lɛ́ɛ mì.

²⁷ Tín nǔ e ɖɔ wɛ sɛ́n towe lɛ́ɛ ɖe ɔ́ mɛ nú mì, bónú ma lin tamɛ dó nǔjíwǔ e a nɔ wa lɛ́ɛ wú.

²⁸ Akpɔ nɔ dó avǐ nu nú mì, zě mì sí te lě e a ɖɔ gbɔn é.

²⁹ Đe mì sín ali e ma nyí ali ɖagbe ǎ é jí, bó jɔwǔ mì, nú ma sixú nyi sɛ́n towe.

³⁰ Gbejíninɔ sín ali ɔ́ wɛ un wlí, gbeta towe lɛ́ɛ wɛ un nɔ xwedó.

³¹ Un hɛn sɛ́n towe lɛ́ɛ syɛ́nsyɛ́n. Mawu Mavɔmavɔ, ma lɔn nú un ɖu winnyá ó.

³² Nǔ e a zɔ̌n lɛ́ɛ sín wezun jí wɛ un ɖe, ɖó a nǎ ɖo nukúnnú mɔ jɛ nǔ mɛ ná mì d'é jí wɛ.

³³ Mawu Mavɔmavɔ, xlɛ́ ali e un ɖó ná gbɔn é mì nú má mlɛ́, bó nɔ jí káká sɔ́yi.

³⁴ Nǎ nukúnnú mɔ jɛ nǔ mɛ mì, nú má hɛn sɛ́n towe bó nyi kpó ayi ce bǐ kpó.

³⁵ Kplá mì gbɔn nǔ e a zɔ̌n lɛ́ɛ sín ali jí, ɖó nǔ e a zɔ̌n lɛ́ɛ wiwa nɔ́ víví nú mì.

³⁶ Sɔ́ ayi ce ɖó sɛ́n towe lɛ́ɛ jí, ma sɔ́ ayi ce ɖó dɔkun jí ó.

³⁷ Đe nukún ce sín nǔ ma xɔ akwɛ́ lɛ́ɛ jí, bló bónú ma zán gbɛ ce lě e a jlǒ gbɔn é.

³⁸ Đe akpá e a dǒ nú nyɛ mɛsɛntɔ́ towe é, akpá e a dǒ nú mɛ e nɔ ɖó sísí nú we lɛ́ɛ.

³⁹ Ma lɔn nú un ɖu hɛ̌n ó, hɛ̌n ɖuɖu nɔ́ dó adohu nú mì, gbeta e a nɔ ɖe tɔ́n lɛ́ɛ wɛ nyɔ́.

⁴⁰ Kpɔ́n, sɛ́n towe lɛ́ɛ nyinyi sín kɔ ɖo xúxú mì wɛ; hɛn mì ɖó gbɛ, ɖó hwɛjijɔ e a nyǐ é wútu.

⁴¹ Mawu Mavɔmavɔ, xomɛnyínyɔ́ towe ní jɛ te dó jǐ ce, hwlɛ̌n mì gán lě e a dǒ akpá tɔn gbɔn é.

⁴² Énɛ́ ɔ́, un ná tunwun nu e un ná kɛ nú mɛ e nɔ zun mì lɛ́ɛ é, ɖó xó towe wú wɛ un ɖeji dó.

⁴³ Ma lɔn gbeɖé bónú un húzú nǔgbó ɔ́ xwe ó, ɖó hwɛgbigbo towe wɛ un ɖo te kpɔ́n.

⁴⁴ Un ná nyi sɛ́n towe hwebǐnu, un ná nyi káká yi káká sá.

⁴⁵ Énɛ́ ɔ́, un ná vo bó ɖo yiyi wɛ ɖo gbɛ ɔ́ mɛ, ɖó un nɔ xwedó sɛ́n towe lɛ́ɛ.

⁴⁶ Un ná ɖɔ sɛ́n towe lɛ́ɛ nú axɔ́sú lɛ́ɛ, winnyá ná hu mì ǎ.

⁴⁷ Nǔ e a zɔ̌n lɛ́ɛ wiwa wɛ nɔ́ víví nú mì, ɖó un yí wǎn nú nǔ e a zɔ̌n lɛ́ɛ;

⁴⁸ yě gɔ̌n ɖó nukún gǎnjɛwú sín wɛ un ɖe. Un yí wǎn nú nǔ e a zɔ̌n lɛ́ɛ, un ná lin tamɛ dó tito towe lɛ́ɛ wú.

⁴⁹ Flín xó e a ɖɔ nú nyɛ mɛsɛntɔ́ towe é, xó e a ɖɔ nú mì bɔ un ɖo te kpɔ́n é.

⁵⁰ Un ɖo ya ji wɛ, adɔ ka gbó mì, ɖó akpá e a dǒ nú mì ɔ́ wɛ nɔ́ ná gbɛ mì.

⁵¹ Mɛ e nɔ mɔ yěɖée lɛ́ɛ nɔ́ ɖo nyɔmɛ ɖɔ wǔ ce wɛ mɔ̌hunkɔ, nǔ ɖo mɔ̌ có, un jó sɛ́n towe dó ǎ.

⁵² Mawu Mavɔmavɔ, un flín hwɛ e a ɖɔ ɖ'ayǐ lɛ́ɛ ɔ́, adɔ nɔ gbó mì.

⁵³ Un mɔ mɛdídá lɛ́ɛ ɔ́, yě mɛ énɛ́ lɛ́ɛ e jó sɛ́n towe dó lɛ́ɛ ɔ́, xomɛ ɖaxó ɖé nɔ́ sin mì.

⁵⁴ Tito towe lɛ́ɛ wɛ nyí han ɖo nu ce ɖo gbɛgleta fí élɔ́ e un ɖe é.

⁵⁵ Mawu Mavɔmavɔ, zǎn mɛ ɔ́, un nɔ flín nyǐkɔ towe lobo nɔ́ nyi sɛ́n towe.

⁵⁶ Azɔ̌ e nyí ce tawun ɔ́ wɛ nyí ɖɔ má sɔ́ nǔ e a zɔ̌n lɛ́ɛ ylɔ́ ɖɔ nǔ.

⁵⁷ Mawu Mavɔmavɔ, un ɖɔ ɔ́, un nɔ ɖɔ: azɔ̌ e nyí azɔ̌ ce ɔ́ wɛ nyí ɖɔ má xwedó xó towe.

⁵⁸ Un jló ná nyɔ́ ɖo así we kpó xomɛ kpó; nyɔ̌ xomɛ dó wǔ ce lě e a dǒ akpá tɔn gbɔn é.

⁵⁹ Un lin tamɛ dó gbɛ e un zán é wú, bó jló ná lɛ́ jɛ sɛ́n towe lɛ́ɛ nyí jí.

⁶⁰ Un ɖo hwlɛndó jí bó ná bló nǔ e a zɔ̌n lɛ́ɛ, un zé ɖó nǎ mɛ ǎ.

⁶¹ Mɔ e mɛdídá lɛ́ɛ ɖó nú mì lɛ́ɛ lɛ́ lɛ̌ dó mì, un ka wɔn sɛ́n towe ǎ.

⁶² Un nɔ fɔ́n zǎnxwete bó nɔ́ mlá we, ɖó hwɛ e a ɖɔ bɔ é sɔgbe lɛ́ɛ wú.

⁶³ Mɛ e nɔ ɖó sísí nú we, bó nɔ́ nyi sɛ́n towe lɛ́ɛ bǐ kpó nyi kpó wɛ nyí xɔ́ntɔn.

⁶⁴ Mawu Mavɔmavɔ, xomɛnyínyɔ́ towe gba kpé gbɛ ɔ́ bǐ mɛ, kplɔ́n tito towe lɛ́ɛ mì.

⁶⁵ Mawu Mavɔmavɔ, a wa ɖagbe nú mɛsɛntɔ́ towe, lě e a dǒ akpá tɔn gbɔn é.

⁶⁶ Kplɔ́n lě e un ná ɖɔ hwɛ gbɔn é mì, kplɔ́n lě e un ná tunwun nǔ e a zɔn lɛ́ɛ gbɔn ɔ́ mì, ɖó yě wú wɛ un ɖeji dó.

⁶⁷ Cóbónú è nǎ sɔ́ mì hwe ɔ́, ali bú wɛ un ko ɖe; amɔ̌, din ɔ́, nǔ e a ɖɔ lɛ́ɛ wa wɛ un ɖe.

⁶⁸ A nyɔ̌, a nɔ wa ɖagbe nú mɛ, kplɔ́n tito towe lɛ́ɛ mì.

⁶⁹ Mɛ e nɔ mɔ ɖɔ émí sɔ lě lɛ́ɛ nɔ́ ɖó adingban dó nu ce dó hɛn mì blí, amɔ̌, nyɛ ɔ́, sɛ́n towe lɛ́ɛ nyinyi wɛ nɔ myá nukún nú mì.

⁷⁰ Ayi yětɔn nɔ́ mɔ nǔ ǎ, amɔ̌, nyɛ ɔ́, sɛ́n towe lɛ́ɛ nyinyi wɛ nɔ víví nú mì.

⁷¹ Wǔvɛ́ e un mɔ é ɔ́, ɖagbe wɛ é nyí nú mì, énɛ́ wɛ zɔ́n bɔ un kplɔ́n tito towe lɛ́ɛ.

⁷² Sɛ́n e tɔ́n sín nu towe mɛ ɔ́ xɔ akwɛ́ nú mì hú nǔ e è sɔ́ siká abǐ kpatágan dó bló lɛ́ɛ afatɔ́n (1.000).

⁷³ Alɔ towe lɛ́ɛ wɛ bló mì bó hɛn mì ɖó te, nǎ nukúnnú mɔ jɛ nǔ mɛ mì, nú má kplɔ́n nǔ e a zɔ̌n lɛ́ɛ.

⁷⁴ Mɛ e ɖó sísí nú we lɛ́ɛ nɔ́ mɔ mì bó nɔ́ j'awǎ, ɖó un ɖo te kpɔ́n xó e a nǎ ɖɔ é.

⁷⁵ Mawu Mavɔmavɔ, un tunwun ɖɔ hwɛ e a nɔ ɖɔ lɛ́ɛ nɔ sɔgbe, nǔ e xó towe ɖɔ é wɛ a xwedó dó dɔn tó nú mì.

⁷⁶ Xomɛnyínyɔ́ towe ní súnsún ɖasin nú mì, lě e a dǒ akpá tɔn nú nyɛ mɛsɛntɔ́ towe gbɔn é.

⁷⁷ Xlɛ́ mì ɖɔ a yǐ wǎn nú mì, bónú má nɔ gbɛ, ɖó sɛ́n towe nyinyi wɛ nɔ víví nú mì.

⁷⁸ Yě mɛ e nɔ ɖo yěɖée mɔ wɛ, bó nɔ́ nɔ yǎyá bó nɔ́ ɖo ya dó nú mì wɛ lɛ́ɛ bǐ ní ɖu winnyá. Nyɛ ɔ́, sɛ́n towe lɛ́ɛ wú wɛ un nɔ lin tamɛ dó.

⁷⁹ Mɛ e nɔ ɖó sísí nú we lɛ́ɛ ní lɛ́ kɔ wá gɔ̌n ce, bó ná tunwun sɛ́n towe lɛ́ɛ.

⁸⁰ Má nɔ gbejí nú tito towe lɛ́ɛ, bó má wá ɖu winnyá ó.

⁸¹ Un ɖo hwlɛngán ba ɖo gɔ̌n towe wɛ káká bɔ agbɔ̌n kpé mì, un ɖo te kpɔ́n xó e a nǎ ɖɔ é.

⁸² Un ɖo nukún ɖó xó e ɖɔ wɛ a ɖe é káká bɔ nukún ce bó bɔ un ɖɔ: “Hwetɛ́nu a nǎ dó gbɔ nú mì dó?”

⁸³ Wǔtu ce bǐ wló anyǔglo e ɖo azɔ nu é ɖɔhun, có un wɔn tito towe lɛ́ɛ ǎ.

⁸⁴ Azǎn nabí ká kpo nú mì bɔ un ná nɔ gbɛ xɔ? Hwetɛ́nu a nǎ ɖó hwɛ nú mɛ e ɖo ya dó nú mì wɛ lɛ́ɛ?

⁸⁵ Goyítɔ́ lɛ́ɛ nɔ́ kun do ɖó nukɔn nú mì; yě nɔ́ wa nǔ lě e sɛ́n towe ɖɔ gbɔn é ǎ.

⁸⁶ Nǔ e a zɔ̌n lɛ́ɛ bǐ wɛ sɔgbe. Goyítɔ́ lɛ́ɛ nɔ́ nɔ yǎyá bó nɔ́ ɖo ya dó nú mì wɛ; wǎ dó alɔ mì.

⁸⁷ Kpɛɖé wɛ kpo bɔ yě ná hu mì; nyɛ ɔ́, un ka gɔn sɛ́n towe lɛ́ɛ nyi gbeɖé ǎ.

⁸⁸ Kpɔ́n dó xomɛnyínyɔ́ towe wú bó hɛn mì ɖó gbɛ, hɛn mì ɖó gbɛ, bónú má nɔ gbejí nú sɛ́n e tɔ́n sín nu towe mɛ lɛ́ɛ.

⁸⁹ Mawu Mavɔmavɔ, xó towe ná nɔ ayǐ káká sɔ́yi, tɛnmɛ tɔn ɖo sɛ́xwé tɛgbɛ.

⁹⁰ Gbejíninɔ towe ná nɔ ayǐ káká yi káká sá. A lǐ ayǐkúngban ɔ́ bɔ é lí dǒ ganjí.

⁹¹ Gbeta towe e a ɖe tɔ́n lɛ́ɛ wú wɛ nǔ bǐ ɖo te káká wá jɛ égbé, ɖó nǔ bǐ wɛ ɖo acɛ towe glɔ́.

⁹² Ényí sɛ́n towe nyinyi má kó nɔ́ víví nú mì ǎ ɔ́, un ná kó kú dó ya ce mɛ.

⁹³ Un ná wɔn nǔ e a ɖɔ lɛ́ɛ gbeɖé ǎ, ɖó yě jí wɛ a nǎ gbɛ mì gbɔn.

⁹⁴ Towe wɛ un nyí, hwlɛ̌n mì, ɖó un ɖo sɛ́n towe lɛ́ɛ ba wɛ.

⁹⁵ Mɛdídá lɛ́ɛ ɖo te bó ná hu mì, lo ɔ́, ayi ce ɖo sɛ́n towe lɛ́ɛ jí.

⁹⁶ Un mɔ ɖɔ nǔ bǐ wɛ ɖó vivɔnu, lo ɔ́, nǔ e a zɔ̌n ɔ́ ɖó vivɔnu ǎ.

⁹⁷ Un yí wǎn nú sɛ́n towe lóóo. É wú wɛ un nɔ lin tamɛ dó hwebǐnu.

⁹⁸ Nǔ e a zɔ̌n ɔ́ wú wɛ un ɖó nǔnywɛ́ hú kɛntɔ́ ce lɛ́ɛ, ɖó é ná nɔ ayi ce mɛ káká sɔ́yi.

⁹⁹ Un tunwun nǔ hú mɛ̌si ce lɛ́ɛ bǐ, ɖó sɛ́n towe lɛ́ɛ wú wɛ un nɔ lin tamɛ dó.

¹⁰⁰ Un ɖó nukúnnú mɔ jɛ nǔ mɛ hú degénɔ kpikpoe lɛ́ɛ, ɖó sɛ́n towe lɛ́ɛ nyínyí nɔ́ myá nukún nú mì.

¹⁰¹ Un nɔ lɔn nú afɔ ce nɔ tɛ ali nyanya ɖé jí ǎ, bó ná dó sixú xwedó xó towe.

¹⁰² Un nɔ ɖó wǔ zɔ nú gbeta e a ɖe tɔ́n lɛ́ɛ ǎ, ɖó hwi wɛ ɖo nǔ kplɔ́n mì wɛ.

¹⁰³ Xó towe víví ɖo nu ce mɛ mɛ nya! É víví ɖo nu ce mɛ hú wǐin.

¹⁰⁴ Sɛ́n towe lɛ́ɛ wɛ nɔ́ ná nukúnnú mɔ jɛ nǔ mɛ mì; énɛ́ wú wɛ un gbɛ́ wǎn nú ahizi.

¹⁰⁵ Xó towe wɛ nyí zogbɛ́n e nɔ́ xlɛ́ fí e un ná tɛ afɔ é mì, é wɛ nyí wěziza ɖo ali ce jí.

¹⁰⁶ Un xwlé nǔ ɖɔ un ná xwedó gbeta towe lɛ́ɛ; gbeta towe lɛ́ɛ sɔgbe; un ná ɖe akpá e un dó é.

¹⁰⁷ Gbɛ ce blá wǔ mɛ nya! Mawu Mavɔmavɔ, hɛn mì ɖó gbɛ lě e a ɖɔ gbɔn é.

¹⁰⁸ Mawu Mavɔmavɔ, kɛnklɛ́n yí kú e dó nú we wɛ un ɖe gbɔn ɖɛ mɛ é; kplɔ́n gbeta towe lɛ́ɛ mì.

¹⁰⁹ Gbɛ ce ɔ́, agbǎgbáɖá jɛ́n é ɖe tɛgbɛ, có un ka wɔn sɛ́n towe gbeɖé ǎ.

¹¹⁰ Mɛdídá lɛ́ɛ nɔ́ ɖo mɔ ɖó nú mì wɛ, có un jó sɛ́n towe lɛ́ɛ dó ǎ.

¹¹¹ Sɛ́n towe lɛ́ɛ wɛ nyí dɔkun tɛgbɛ tɔn ɖo así ce, yě nɔ́ dó xomɛhunhun nú mì.

¹¹² Un zin alɔ dó akɔ́n bó ná xwedó tito towe lɛ́ɛ hwebǐnu, un ná xwedó káká sɔ́yi.

¹¹³ Un gbɛ́ wǎn nú ɖɛ̌ we ɖiɖɔ, bó ka yí wǎn nú sɛ́n towe.

¹¹⁴ Hwi wɛ nyí bibɛtɛn ce, bó nyí gǎglónú ce, un ɖo te kpɔ́n xó e a nǎ ɖɔ é.

¹¹⁵ Mɛdídá lɛ́ɛ e mi, mi sɛ yi zɔ nú mì; mi yi zɔ bónú ma bló nǔ e Mawu ce zɔ́n lɛ́ɛ.

¹¹⁶ Mawu, hɛn mì lě e a ɖɔ gbɔn é, bónú ma nɔ gbɛ; un ɖo nukún ɖó we wɛ, ma dó winnyá mì ó.

¹¹⁷ Nyǐ gǎnjɛwú ce bónú ma gán, jlǒ towe wíwá ná nɔ́ myá nukún nú mì hwebǐnu.

¹¹⁸ A gbɛ̌ wǎn nú mɛ e jó tito towe lɛ́ɛ dó bó ɖo ali bǔ wɛ lɛ́ɛ, ɖó nǔ e yě nɔ́ lin é bǐ wɛ nyí adingban.

¹¹⁹ A nǎ kplɔ́ mɛdídá lɛ́ɛ bǐ sín ayǐkúngban ɔ́ jí zunkɔ́ ɖɔhun; énɛ́ ɔ́ wú wɛ un yí wǎn nú sɛ́n towe lɛ́ɛ.

¹²⁰ Un nɔ ɖo sísɔ́ sísɔ́ wɛ, ɖó a dǒ xɛsi, un nɔ ɖó sísí nú hwɛ e a nɔ ɖɔ lɛ́ɛ.

¹²¹ Un nɔ wa nǔ ɖó sɛ́nxwi jí bó nɔ́ zán hwɛjijɔ; ma jó mì nú mɛ e ɖo títáfú mì wɛ lɛ́ɛ ó.

¹²² Zin alɔ dó akɔ́n nú mì ɖɔ nǔ ce ná nyɔ́; ma jó mì dó nú goyítɔ́ táfú mì ó.

¹²³ Un ɖo nukún ɖó hwlɛngán towe wɛ káká bɔ nukún ce bo. Mɔ̌ ɖokpó ɔ́ wɛ un ɖo nukún ɖó hwɛjijɔ e sín akpá a dǒ é wɛ.

¹²⁴ Nyɔ̌ xomɛ dó wǔ ce, kplɔ́n tito towe lɛ́ɛ mì.

¹²⁵ Mɛsɛntɔ́ towe wɛ un nyí, nǎ nukúnnú mɔ jɛ nǔ mɛ mì, bónú ma mɔ nǔ jɛ sɛ́n towe lɛ́ɛ wú.

¹²⁶ Mawu Mavɔmavɔ, hwenu su bɔ a nǎ kɛ nu, ɖó è ɖo sɛ́n towe gba wɛ.

¹²⁷ Nyɛ ɔ́, un yí wǎn nú nǔ e a zɔ̌n lɛ́ɛ hú siká, un yí wǎn nú yě hú siká akú.

¹²⁸ Un mɔ ɖɔ sɛ́n towe lɛ́ɛ bǐ sɔgbe bɔ nǔ vɔ ɖ'é wú. Un gbɛ́ wǎn nú adingbanxó bǐ.

¹²⁹ Sɛ́n towe lɛ́ɛ nyɔ́ bɔ nǔ vɔ ɖ'é wú, énɛ́ wú wɛ un ɖó kan dó yě wú bó nyi.

¹³⁰ È tín xó towe mɛ nú mɛɖé ɔ́, mɛ ɔ́ nɔ́ mɔ wěziza; è tínmɛ nú xlonɔ ɔ́, é nɔ́ mɔ nukúnnú jɛ nǔ mɛ.

¹³¹ Un nɔ nu xó towe mɛ e kɔ xú é ɖɔhun, ɖó nǔ e a zɔ̌n lɛ́ɛ wíwá sín akpakpa nɔ sɔ́ mì.

¹³² Nyi kɔ kpɔ́n mì, nyɔ́ xomɛ dó wǔ ce, lě e a nɔ bló gbɔn nú mɛ e yí wǎn nú we lɛ́ɛ é.

¹³³ Sɔ́ xó towe dó hɛn mì ɖó te bónú má lí dǒ, ma lɔn nú nǔ nyanya ɖu ɖo jǐ ce ó.

¹³⁴ Hwlɛ̌n mì gán ɖo ya e dó nú mì wɛ gbɛtɔ́ lɛ́ɛ ɖe é mɛ, bónú má sixú nyi sɛ́n towe lɛ́ɛ.

¹³⁵ Nukún towe mɛ ní za wě dó nyɛ mɛsɛntɔ́ towe jí; kplɔ́n tito towe lɛ́ɛ mì.

¹³⁶ Đasin nɔ sa sín nukún ce jí tɔ ɖɔhun, ɖó è sɔ́ nɔ́ nyi sɛ́n towe ǎ.

¹³⁷ Mawu Mavɔmavɔ, hwɛjijɔnɔ wɛ a nyǐ, hwɛ e a nɔ ɖɔ lɛ́ɛ nɔ́ sɔgbe.

¹³⁸ A nǎ sɛ́n towe lɛ́ɛ dó ɖe hwɛjijɔ towe ma ɖó blɔ̌ ɔ́ kpó gbejíninɔ towe ma ɖó blɔ̌ ɔ́ kpó xlɛ́.

¹³⁹ Kɛntɔ́ ce lɛ́ɛ sín aɖi nɔ ɖó mì káká, ɖó yě jǒ nǔ e a ɖɔ lɛ́ɛ dó.

¹⁴⁰ Xó towe nɔ wa azɔ̌ tɔn tɛgbɛ, nyɛ mɛsɛntɔ́ towe yí wǎn nú xó towe.

¹⁴¹ Gbɛ̌gɔ́nú wɛ un nyí; mɛɖé nɔ́ ké ya nú mì ǎ, có un ka wɔn sɛ́n towe gbeɖé ǎ.

¹⁴² Hwɛjijɔ towe ɔ́, hwɛjijɔ e ɖo ayǐ káká sɔ́yi ɔ́ wɛ, sɛ́n towe nɔ́ húzú gbeɖé ǎ.

¹⁴³ Aluwɛ kpó xɛsi kpó wá xwedó wǔ ce; amɔ̌, nǔ e a zɔ̌n lɛ́ɛ wíwá nɔ víví nú mì.

¹⁴⁴ Sɛ́n towe lɛ́ɛ ɔ́, hwɛjijɔ e ɖo ayǐ káká sɔ́yi ɔ́ wɛ, blǒ bónú má mɔ nǔ jɛ yě wú, bó ná nɔ gbɛ.

¹⁴⁵ Mawu Mavɔmavɔ, un ɖo xó sú ylɔ́ we wɛ kpó ayi ce bǐ kpó; sɔ nú mì, un jló ná xwedó tito towe lɛ́ɛ.

¹⁴⁶ Un ɖo xó sú ylɔ́ we wɛ, wǎ hwlɛ́n mì, un ná nyi sɛ́n towe lɛ́ɛ.

¹⁴⁷ Un nɔ ko ɖo xó sú ylɔ́ we wɛ có ayǐtéhɔ̌nnu nɔ su, un ɖo te kpɔ́n xó e a nǎ ɖɔ é.

¹⁴⁸ Un nɔ ko fɔ́n có ayǐ nɔ hɔ́n, bó nɔ́ ɖo tamɛ lin dó xó towe wú wɛ.

¹⁴⁹ Kpɔ́n dó xomɛnyínyɔ́ towe wú, bó ɖótó gbe ce. Mawu Mavɔmavɔ, hɛn mì ɖó gbɛ lě e a ɖɔ gbɔn é.

¹⁵⁰ Mɛ e adǎka xixo kɛ́ɖɛ́ nɔ́ myá nukún ná lɛ́ɛ ɖo sisɛwá wɛ, yě nɔ́ xwedó sɛ́n towe ǎ.

¹⁵¹ Amɔ̌, Mawu Mavɔmavɔ, hwɛ ɔ́, a ɖo akpá ce, nǔ e a zɔ̌n lɛ́ɛ bǐ wɛ nyí nǔgbó.

¹⁵² Sɛ́n towe lɛ́ɛ ɖo ayǐ káká sɔ́yi, un tunwun mɔ̌ din ɔ́ é kó lín.

¹⁵³ Kpɔ́n ya e mɛ un ɖe ɔ́ bó hwlɛ́n mì gán, ɖó un wɔn sɛ́n towe gbeɖé ǎ.

¹⁵⁴ Jɛ ahwan jǐ ce bó xɔ gbɛ nú mì, hɛn mì ɖó gbɛ lě e a dǒ akpá tɔn gbɔn é.

¹⁵⁵ Hwlɛngán ɔ́ lín dó mɛdídá lɛ́ɛ, ɖó yě sɔ́ tito towe lɛ́ɛ dó ylɔ́ nǔɖé ǎ.

¹⁵⁶ Mawu Mavɔmavɔ, nǔbláwǔ kú nú mɛ towe d'agba, hɛn mì ɖó gbɛ lě e a ɖɔ gbɔn é.

¹⁵⁷ Mɛ e ɖo ya dó nú mì wɛ lɛ́ɛ kpó kɛntɔ́ ce lɛ́ɛ kpó sukpɔ́ ɖésú, un ka jó sɛ́n towe lɛ́ɛ dó ǎ.

¹⁵⁸ Un mɔ mɛsaɖutɔ́ lɛ́ɛ ɔ́, akpɔ yětɔn nɔ́ ɖó mì; un mɔ yě mɛ e ma nɔ xwedó xó towe ǎ lɛ́ɛ ɔ́, akpɔ yětɔn nɔ́ ɖó mì.

¹⁵⁹ Kpɔ́n lě e un yí wǎn nú sɛ́n towe lɛ́ɛ sɔ é, Mawu Mavɔmavɔ, kpɔ́n dó xomɛnyínyɔ́ towe wú bó hɛn mì ɖó gbɛ.

¹⁶⁰ Xó towe bǐ wɛ nyí nǔgbó, gbeta e a ɖe tɔ́n lɛ́ɛ bǐ wɛ sɔgbe, bǐ wɛ ɖo ayǐ káká sɔ́yi.

¹⁶¹ Gǎn lɛ́ɛ nɔ yǎyá bó jɛ ya dó nú mì jí, amɔ̌, xó towe lɛ́ɛ kɛ́ɖɛ́ jɛ́n nyí nǔ e nɔ́ dó xɛsi nú mì é.

¹⁶² Xó towe nɔ́ dó xomɛhunhun nú mì, dɔkun ɖaxó ɖé wɛ un jɛ ɖɔhun.

¹⁶³ Un gbɛ́ wǎn nú adingban, adingbanxó nɔ́ vɛ́ se nú mì, amɔ̌, un yí wǎn nú sɛ́n towe.

¹⁶⁴ Un nɔ xomlá we azɔn tɛ́nwe gbe ɖokpó, ɖó hwɛ jlɔ́jlɔ́ e a ɖɔ lɛ́ɛ wú.

¹⁶⁵ Sɛ́n towe ɔ́, mɛ e yí wǎn ná lɛ́ɛ ɔ́, fífá ɖaxó ɖé wɛ yě ɖó; afɔklɛ́nnú ɖěbǔ ɖe nú yě ǎ.

¹⁶⁶ Mawu Mavɔmavɔ, hwi ɖó nukún wɛ un ɖe bɔ a nǎ hwlɛ́n mì; énɛ́ ɔ́ wú wɛ un ɖo nǔ e a zɔ̌n lɛ́ɛ wa wɛ.

¹⁶⁷ Un nɔ nyi sɛ́n towe lɛ́ɛ kpó ayixa ce bǐ kpó, un yí wǎn nú sɛ́n towe lɛ́ɛ tawun.

¹⁶⁸ Un nɔ bló nǔ e a ɖɔ lɛ́ɛ, un nɔ nyi sɛ́n towe lɛ́ɛ; a mɔ nukúnnú jɛ nǔ e un nɔ bló lɛ́ɛ bǐ wú.

¹⁶⁹ Mawu Mavɔmavɔ, xó e sú wɛ un ɖe ɔ́ ní hun káká wá gɔ̌n towe. Nǎ nukúnnú mɔ jɛ nǔ mɛ mì lě e a dǒ akpá tɔn gbɔn é.

¹⁷⁰ Vo e sa wɛ un ɖe ɔ́ ní hun káká wá gɔ̌n towe; hwlɛ̌n mì lě e a ɖɔ gbɔn é.

¹⁷¹ Un ná sɔ́ nu ce dó mlá we, ɖó a nɔ kplɔ́n tito towe lɛ́ɛ mì.

¹⁷² Un ná sɔ́ ɖɛ̌ ce dó ɖɔ xó towe dó han mɛ, ɖó nǔ e a zɔ̌n lɛ́ɛ bǐ wɛ sɔgbe.

¹⁷³ Wǎ dó alɔ mì kpó alɔ towe kpó, ɖó sɛ́n towe lɛ́ɛ wɛ un sɔ́.

¹⁷⁴ Mawu Mavɔmavɔ, é jló mì tawun ɖɔ a nǐ hwlɛ́n mì; sɛ́n towe nyinyi wɛ nɔ́ víví nú mì.

¹⁷⁵ Mawu Mavɔmavɔ, má nɔ gbɛ, má nɔ mlá we, bónú gbeta e a ɖe tɔ́n lɛ́ɛ ní dó alɔ mì.

¹⁷⁶ Un ɖo flúflú wɛ lɛ̌ngbɔ́ e bú é ɖɔhun, wǎ ba nyɛ mɛsɛntɔ́ towe mɔ, ɖó un wɔn nǔ e a zɔ̌n lɛ́ɛ gbeɖé ǎ.