Ɖɛhan 115 - MAWUXÓWÉMA

Mawu ɖokpónɔ wɛ susu jɛ xá

¹ Mawu Mavɔmavɔ, susu jɛ xá mǐ ǎ, é jɛ xá mǐ ǎ. Hwi wɛ susu jɛ xá, ɖó xomɛnyínyɔ́ towe wú, ɖó gbejíninɔ towe wú.

² Étɛ́wú akɔta lɛ́ɛ nɔ́ ɖɔ: “Fítɛ́ Mawu yětɔn ka ɖe?”

³ Mawu mǐtɔn ɖo sɛ́xwé; nǔ e jló e lɛ́ɛ bǐ wɛ é nɔ́ bló.

⁴ Amɔ̌, vodún yětɔn lɛ́ɛ ɔ́, siká kpó kpatágan kpó wɛ è nɔ dó bló yě; gbɛtɔ́ sín nǔwiwa kpowun wɛ.

⁵ Nu ɖo ta yětɔn wú, yě ká nɔ́ ɖɔ xó ǎ. Nukún ɖo ta yětɔn wú, yě ká nɔ́ mɔ nǔ ǎ.

⁶ Tó ɖo ta yětɔn wú, yě ká nɔ́ se nǔ ǎ. Awɔntín ɖo ta yětɔn wú, yě ká nɔ́ se nǔ wán ǎ.

⁷ Yě ɖó alɔ, yě ká nɔ́ sixú ɖó alɔ nǔɖé wú ǎ. Yě ɖó afɔ, yě ká nɔ́ sixú ɖi zɔnlin ǎ. Xó ɖé nɔ́ tɔ́n sín vɛ̌gokan yětɔn mɛ ǎ.

⁸ Mɛ e nɔ bló vodún énɛ́ lɛ́ɛ ní cí vodún e yě bló lɛ́ɛ ɖɔhun, mɛ e nɔ gán jɛ yě wú lɛ́ɛ ní cí yě ɖɔhun.

⁹ Izlayɛ́li ví lɛ́ɛ mi, mi jó miɖée dó nú Mawu Mavɔmavɔ. - É wɛ nyí alɔgɔ́númɛtɔ́ yětɔn, é wɛ nyí gǎglónú yětɔn.

¹⁰ Aalɔ́ɔn ví lɛ́ɛ mi, mi jó miɖée dó nú Mawu Mavɔmavɔ. - É wɛ nyí alɔgɔ́númɛtɔ́ yětɔn, é wɛ nyí gǎglónú yětɔn.

¹¹ Mi mɛ e nɔ ɖó sísí nú Mawu Mavɔmavɔ lɛ́ɛ mi, mi jó miɖée dó n'i. - É wɛ nyí alɔgɔ́númɛtɔ́ yětɔn, é wɛ nyí gǎglónú yětɔn.

¹² Mawu Mavɔmavɔ nɔ flín mǐ, é jló ná xo ɖɛ dó mǐ jí. É ná xo ɖɛ dó Jakɔ́bu ví lɛ́ɛ jí, é ná xo ɖɛ dó Aalɔ́ɔn ví lɛ́ɛ jí,

¹³ é ná xo ɖɛ dó mɛ e nɔ ɖó sísí n'i lɛ́ɛ jí, mɛxó kpó yɔkpɔ́vú kpó.

¹⁴ Mawu Mavɔmavɔ ní ná vǐ mi, bónú mi ji, é ní ná vǐ mitɔn lɛ́ɛ, bónú yě ji.

¹⁵ Mawu Mavɔmavɔ, jǐxwé kpó ayǐkúngban kpó ɖó tɔ́ ɔ́ ní xo ɖɛ dó mi jí.

¹⁶ Jǐxwé ɔ́, jǐxwé Mawu Mavɔmavɔ ɖokpónɔ géé tɔn wɛ, lo ɔ́, é ná ayǐkúngban ɔ́ gbɛtɔ́ lɛ́ɛ.

¹⁷ Mɛkúkú lɛ́ɛ wɛ nɔ́ kpa Mawu Mavɔmavɔ ǎ, mɛ e yi maɖɔnǔxwɛ lɛ́ɛ wɛ nɔ́ kpa ɛ ǎ.

¹⁸ Lo ɔ́, midɛɛ lɛ́ɛ wɛ ná ɖo susu kpa n'i wɛ sín din káká sɔ́yi. Mi kpa Mawu Mavɔmavɔ!