Ɖɛhan 114 - MAWUXÓWÉMA

¹ Hwenu e Izlayɛ́li tɔ́n sín Ejípu ɔ́, hwenu e Jakɔ́bu ví lɛ́ɛ gosín akɔta e nɔ flán gbe é mɛ ɔ́,

² Judáa to ɔ́ húzú Tɛn mímɛ́ Mawu tɔn, Izlayɛ́li to ɔ́ húzú ayǐkúngban tɔn.

³ Xu mɔ Izlayɛ́li ví lɛ́ɛ bó hɔn, Judɛ́ɛn tɔ ɔ́ mɔ yě bó jó agɔ yi gǔdo,

⁴ só lɛ́ɛ lɔ́n agbo ɖɔhun, só kpɛví kpɛví lɛ́ɛ lɔ́n lɛ̌ngbɔ́ví ɖɔhun.

⁵ Xu, nɛ̌ ka gbɔn nú we bɔ a hɔn? Judɛ́ɛn tɔ, nɛ̌ ka gbɔn nú we bɔ a jǒ agɔ yi gǔdo?

⁶ Só lɛ́ɛ mi, nɛ̌ ka gbɔn nú mi bɔ mi lɔ́n agbo ɖɔhun? Só kpɛví kpɛví e mi, étɛ́ ká wa mi bɔ mi lɔ́n lɛ̌ngbɔ́ví ɖɔhun?

⁷ Ayǐkúngban, hwɛ ɔ́, dǎn wǔ ɖo Aklúnɔ nukɔn, dǎn wǔ ɖo Mawu Jakɔ́bu tɔn nukɔn.

⁸ É wɛ sɔ́ só dó húzú tán, é wɛ sɔ́ awǐnnya dó húzú tɔjɔtɛn.