Ɖɛhan 113 - MAWUXÓWÉMA

¹ Mi kpa Mawu Mavɔmavɔ! Mi Mawu Mavɔmavɔ sɛn tɔ́ lɛ́ɛ mi, mi kpa Mawu Mavɔmavɔ! Mi sɔ́ nyǐkɔ Mawu Mavɔmavɔ tɔn su.

² È nǐ dó kú nú Mawu Mavɔmavɔ, sín din káká sɔ́yi.

³ È nǐ kpa susu nú Mawu Mavɔmavɔ sín zǎnzǎnhwe jí káká yi gbadahwe jí.

⁴ Mawu Mavɔmavɔ hú gǎn akɔta lɛ́ɛ bǐ; susu tɔn zɛ jǐxwé wú.

⁵ Mɛ̌ è ka sixú jlɛ́ dó Mawu Mavɔmavɔ, Mawu mǐtɔn wú? É ɖo axɔ́súzinkpo tɔn jí ɖo jǐ aga bǐ,

⁶ é nɔ nya bó nɔ́ kpɔ́n jǐxwé kpó ayǐkúngban kpán sɛ́ dó.

⁷ É nɔ́ sɔ́ wamamɔnɔ sí te sín kɔ́gúdu mɛ, é nɔ́ sɔ́ lelenɔ sí te sín zunkɔ́ta,

⁸ é nɔ́ sɔ́ ɛ jínjɔ́n mɛjɔmɛ lɛ́ɛ kpá, gbɛtɔ́ nukúnɖéjí e ɖo togun tɔn mɛ lɛ́ɛ é kpá.

⁹ É nɔ́ ná xwédo mɛ e nyí wɛnsinɔ é, bɔ é nɔ́ húzú nyɔ̌nánɔ ɖo vǐ tɔn lɛ́ɛ tɛ́ntin. Mi kpa Mawu Mavɔmavɔ!