Ɖɛhan 109 - MAWUXÓWÉMA

¹ Hanjigbɛ́gán ɔ́ sín hanjiwéma mɛ wɛ han élɔ́ ɖe. Davídi sín han wɛ. Mawu, hwi wɛ nyí mɛ e un nɔ kpa é; ma tin dó mì ó,

² ɖó gbɛtɔ́ nyanya, gbɛtɔ́ adingbannɔ lɛ́ɛ ɖo adǎn sin nú mì wɛ; xó e ɖɔ dó wǔ ce wɛ yě ɖe ɔ́ bǐ wɛ nyí adingban.

³ Xó nyanya kɛ́ɖɛ́ wɛ yě nɔ́ ɖɔ dó wǔ ce gbɔn aɖisí amyɔ, yě nɔ́ nɔ yǎyá bó nɔ́ tɔ́n ahwan mì.

⁴ Nyɛ ɖó wǎn yíyí nú yě, yědɛɛ lɛ́ɛ ka sɔ́ mì dó ɖó kɛntɔ́. Nǔ ka ɖo mɔ̌ có ɖɛ kɛ́ɖɛ́ jɛ́n un nɔ xo.

⁵ Un wa ɖagbe nú yě ɔ́, nyanya wɛ yě nɔ́ dó sú axɔ́ mì. Un yí wǎn nú yě, yě ká gbɛ́ wǎn nú nyɛ.

⁶ Nǔ e yě nɔ́ ɖɔ dó wǔtu ce é ɖíe: “Sɔ́ ɛ dó así nú mɛhutɔ́ ɖé, hwɛdómɛtɔ́ ɖokpó ní cí aɖisí tɔn xwé.

⁷ Hwenu e è nǎ ɖɔ hwɛ xá ɛ ɔ́, è nǐ ɖɔ é kú hwɛ, ɖɛ e xo wɛ é ɖe ɔ́ è nǐ mɔ dó mɔ hwɛhuhu.

⁸ Azǎn e é ná nɔ gbɛ ná é ní má sukpɔ́ ó, mɛ ɖěvo ní jɛ tɛn tɔn mɛ.

⁹ Vǐ tɔn lɛ́ɛ ní húzú tɔ́cyɔvǐ, asi tɔn ní húzú asúkúsi.

¹⁰ Vǐ tɔn lɛ́ɛ ní nɔ́ ɖo flúflú kpé wɛ, yě ní húzú nǔbyɔ́ɖutɔ́. Yě ní nɔ ɖo nǔ byɔ́ ɖu kpé wɛ gbɔn zɔzɔ nú xwé yětɔn e è gba lɛ́ɛ.

¹¹ Axɔ́tɔ́nɔ ní sá kan ɛ bó bɛ́ nǔ tɔn bǐ, to ɖěvo mɛ nu lɛ́ɛ ní bɛ́ nǔ e é jɛ dɛ̌n bó mɔ lɛ́ɛ.

¹² Mɛ ɖokpó má wa ɖagbe n'i ó. Vǐ tɔn e é jó dó lɛ́ɛ sín nǔ má blá wǔ nú mɛɖé ó.

¹³ È nǐ sú vǐ tɔn lɛ́ɛ sín kún dó, nyǐkɔ yětɔn ní bú ɖo vǐ e è nǎ wá ji sɔ gǔdo lɛ́ɛ mɛ.

¹⁴ Mawu Mavɔmavɔ ní ma wɔn nǔ e tɔ́gbó tɔn lɛ́ɛ wa nyi do lɛ́ɛ ó, nǔ ɖěbǔ ní ma súnsún hwɛ e nɔ tɔn hu lɛ́ɛ ó.

¹⁵ Mawu Mavɔmavɔ ní nɔ́ flín tɛgbɛ, é ní ɖe nyǐkɔ yětɔn sín gbɛ ɔ́ mɛ.

¹⁶ Nya énɛ́ nɔ lin ná wa ɖagbe nú mɛɖé ǎ, é dó ya nú gbɛtɔ́ wamamɔnɔ, lelenɔ, mɛ e gbɛ bú nu dó ɔ́ káká bó hu.

¹⁷ É yí wǎn nú nudómɛ káká, bɔ é flí jɛ jǐ tɔn. É gbɛ́ wǎn nú ɖɛ ɖagbe xo nú mɛ káká, bɔ ɖagbe sɛ yi zɔ n'i.

¹⁸ Nudómɛ ní nyí awu n'i, é ní byɔ́ xo tɔn mɛ sin ɖɔhun, é ní yi lanmɛ n'i ami ɖɔhun.

¹⁹ É ní nyí avɔ n'i, é ní nyí gǒjíblánú ɖo alin tɔn tɛgbɛ.”

²⁰ Axɔ́ e Mawu Mavɔmavɔ ná sú kɛntɔ́ ce lɛ́ɛ é nɛ́, axɔ́ e é ná sú mɛ e nɔ ɖɔ nǔ ce lɛ́ɛ é nɛ́.

²¹ Mawu Mavɔmavɔ, Aklúnɔ, gɔ̌ alɔ nú mì ɖó nyǐkɔ towe wú, hwlɛ̌n mì gán, ɖó xomɛnyínyɔ́ towe d'agba.

²² Lelenɔ wɛ un nyí, un ɖó nǔɖé ǎ, ayi ce bǐ wɛ xo akpa.

²³ Gbɛ ce ɖo yiyi wɛ gbadayɛ ɖɔhun. È ɖo fífɛ́ mì sín wǔ wɛ wɛn ɖɔhun.

²⁴ Un nɔ nǔ ma ɖu káká bɔ afɔ ce lɛ́ɛ nɔ́ xo dɔjɔ; énɛ́ ɔ́ zɔ́n bɔ un kpo xú kɛ́ɖɛ́.

²⁵ Un húzú nǔkiko nú mɛ lɛ́ɛ; yě nɔ́ kpɔ́n mì bó nɔ́ xwe akpi.

²⁶ Mawu Mavɔmavɔ, Mawu ce, wǎ gɔ́ alɔ nú mì; sɔ́ xomɛnyínyɔ́ towe dó hwlɛ́n mì gán.

²⁷ Énɛ́ ɔ́, kɛntɔ́ ce lɛ́ɛ ná tunwun ɖɔ nǔ towe wiwa wɛ, yě ná tunwun ɖɔ hwi Mawu Mavɔmavɔ wɛ bló mɔ̌.

²⁸ Nu wɛ yědɛɛ lɛ́ɛ nɔ́ dó mɛ, hwɛ ka nɔ xo ɖɛ dó mɛ jí. Nú yě sí te dó jǐ ce ɔ́, yě ná ɖu winnyá, bɔ nyɛ mɛsɛntɔ́ towe ná j'awǎ.

²⁹ Hɛ̌n ní nyí awu nú kɛntɔ́ ce lɛ́ɛ, winnyá ní nyí avɔ nú yě.

³⁰ Un ná sɔ́ gbe d'aga bó mlá Mawu Mavɔmavɔ; un ná kpa susu n'i ɖo togun mɛ,

³¹ ɖó é nɔ́ nɔ aɖisíxwé nú wamamɔnɔ, bó nɔ́ hwlɛ́n ɛ gán ɖo mɛ e ɖo hwɛ ɖó n'i wɛ lɛ́ɛ sí.