Ɖɛhan 105 - MAWUXÓWÉMA

¹ Mi kpa Mawu Mavɔmavɔ, mi sú xó bó ɖɔ é wɛ nyí Mawu. Mi jlá nǔ ɖaxó ɖaxó e é bló lɛ́ɛ nú togun lɛ́ɛ.

² Mi ji han, mi ɖɔ xó lómílómí dó kpa susu n'i, mi ɖɔ nǔ ɖagbe ɖagbe e é bló lɛ́ɛ bǐ.

³ Mi sɔ́ nyǐkɔ mímɛ́ tɔn dó xɔ susu. Mɛ e ɖo Mawu Mavɔmavɔ ba wɛ lɛ́ɛ ní j'awǎ.

⁴ Mi hɔn yi su Mawu Mavɔmavɔ; Mawu Mavɔmavɔ ɖó hlɔ̌nhlɔ́n. Mi nɔ ba ná nɔ kpɔ́ xá ɛ hwebǐnu.

⁵ Mi flín nǔjíwǔ e é bló lɛ́ɛ, mi flín nǔ e é jlɛ́ lɛ́ɛ kpó hwɛ e é ɖɔ lɛ́ɛ kpó.

⁶ Mɛsɛntɔ́ tɔn Ablaxámu ví lɛ́ɛ mi, Jakɔ́bu ví e Mawu Mavɔmavɔ cyán lɛ́ɛ mi, mi flín nǔ énɛ́ lɛ́ɛ e é wa lɛ́ɛ.

⁷ Mawu Mavɔmavɔ wɛ nyí Mawu mǐtɔn. É wɛ nɔ́ ɖɔ hwɛ dó nǔ e ɖo ayǐkúngban jí lɛ́ɛ bǐ.

⁸ Akɔ e é jɛ xá togun tɔn ɔ́, é nɔ́ flín tɛgbɛ, mi nɔ́ flín akpá e é dó é káká nú jijimɛ afatɔ́n (1.000).

⁹ Mi flín akɔ e é jɛ xá Ablaxámu é, mi flín akpá e é dó nú Izáki é.

¹⁰ É lɛ́ vɔ́ tɛ ɖɛ̌ jí nú Jakɔ́bu, é wɛ nyí akɔ mavɔ mavɔ e é jɛ xá Izlayɛ́li é.

¹¹ Akɔ e é jɛ xá Izlayɛ́li bó ɖɔ n'i ɖɔ: “Un na ná Kanáa to ɔ́ we, bɔ é ná nyí towe, nǔ e un ná hwi kpó vǐ towe lɛ́ɛ kpó ɔ́ nɛ́.”

¹² Hwenɛ́nu ɔ́, yě ká sukpɔ́ ǎ. Yě sukpɔ́ ɖěbǔ ǎ, yě nyí jǒnɔ ɖo to ɔ́ mɛ,

¹³ yě gosín akɔta ɖě mɛ ɔ́, yě nɔ́ yi ɖěvo mɛ, yě gosín axɔ́súɖuto ɖě mɛ ɔ́, yě nɔ́ yi ɖěvo mɛ.

¹⁴ Mawu ka lɔn nú mɛɖé táfú yě ǎ, é dɔn tó nú axɔ́sú lɛ́ɛ ɖó yě wú,

¹⁵ bó ɖɔ nú yě ɖɔ: “Mi ma ɖó alɔ mɛ e un cyán lɛ́ɛ wú ó. Mi ma wa nǔ nyanya xá gbeyíɖɔ ce lɛ́ɛ ó.”

¹⁶ É sɛ́ adɔ dó to ɔ́ mɛ, é sú lě e yě ná wa gbɔn bó nɔ gbɛ ɔ́ bǐ sín ali dó yě.

¹⁷ É sɛ́ mɛ ɖokpó dó yě: Jozɛ́fu wɛ nyí mɛ e é sɛ́ dó é, è ka wa sa kannumɔ tɔn.

¹⁸ È dǒ gɛdɛ ɛ, è dǒ kan kɔ n'i,

¹⁹ káká jɛ hwenu e xó e é se ɖo Mawu Mavɔmavɔ nu é ná ɖe mɛ alɔkpa e é nyí é xlɛ́ é.

²⁰ Axɔ́sú ɔ́ ná gbe bɔ è tún i; mɛ e kpa acɛ ɖo to ɔ́ mɛ ɔ́ ná gbe bɔ è ɖe e nyi te.

²¹ É sɔ́ ɛ gǎn ɖó to tɔn nu, é sɔ́ ɛ ɖó dɔkun tɔn lɛ́ɛ nu,

²² bónú é ná sixú nɔ gǎn hɔn-yitɔ́ tɔn lɛ́ɛ nu, bó ná nǔnywɛ́ tomɛxó lɛ́ɛ.

²³ Énɛ́ ɔ́ gúdo ɔ́, Izlayɛ́li wá cí Ejípu, Jakɔ́bu nyí jǒnɔ ɖo Cámu.

²⁴ Mawu bló bɔ togun tɔn gba kún, bó syɛ́n hú kɛntɔ́ tɔn lɛ́ɛ.

²⁵ Mawu húzú kɛntɔ́ lɛ́ɛ sín ayixa káká bɔ yě gbɛ́ wǎn nú togun tɔn, bó nɔ́ wa alǎnnú xá yě.

²⁶ Énɛ́ ɔ́ wú ɔ́, é sɛ́ mɛsɛntɔ́ tɔn Mɔyízi dó, é kpódó Aalɔ́ɔn e é sɔ́ ɔ́ kpó.

²⁷ Mɔyízi kpódó Aalɔ́ɔn kpó jlɛ́ nǔjíwǔ tɛnmɛ tɛnmɛ ɖo Ejípu togun ɔ́ mɛ, ɖo Mawu sín nyǐkɔ mɛ; yě jlɛ́ nǔ tɛnmɛ tɛnmɛ ɖo Cámu.

²⁸ Mawu dɔn zǐnflú wá, bɔ to ɔ́ byɔ́ ablu gɔngɔn mɛ; mɛɖé ká gbɛ́ xó tɔn ǎ.

²⁹ É sɔ́ sin yětɔn dó húzú kanjɔ, bó hu hweví e ɖo tɔ yětɔn mɛ lɛ́ɛ.

³⁰ Běsé gɔ́ to ɔ́ mɛ káká bó kpé axɔ́sú ɔ́ xwé.

³¹ É ná gbe kpowun bɔ asɔfin ɖé lɛ́ɛ wá, bɔ jɔ̌ kpé to yětɔn mɛ bǐ.

³² É sɛ́ kɛ́njí dó yě ɖó jǐ tɛn mɛ, é sɛ́ myɔ dó to yětɔn mɛ.

³³ É hɛn vǐwungbo yětɔn lɛ́ɛ kpó fígigbo yětɔn lɛ́ɛ kpó gblé, é hu atín e ɖo to yětɔn mɛ lɛ́ɛ.

³⁴ É ná gbe kpowun bɔ wɛn tɔ́n, wɛn ɖo kpɔ́ gěgé;

³⁵ wɛn ɖu gběhan e ɖo to ɔ́ mɛ lɛ́ɛ bǐ, wɛn ɖu nǔ e ɖo gle yětɔn jí lɛ́ɛ bǐ.

³⁶ Mawu hu nukɔn ví e ɖo to yětɔn mɛ lɛ́ɛ bǐ, bɔ nǔ nukɔn tɔn e yě sɔ́ hlɔ̌nhlɔ́n yětɔn dó wa lɛ́ɛ bǐ kú.

³⁷ É ɖe togun tɔn tɔ́n; kpatágan kpó siká kpó sín agban wɛ yě dǒ bó tɔ́n; mɛ e ɖo akɔta tɔn lɛ́ɛ mɛ lɛ́ɛ ɖě nɔ gǔdo ǎ.

³⁸ Ée yě xweyǐgbe ɔ́, é víví nú Ejípunu lɛ́ɛ káká, ɖó yě ɖo xɛsi ɖi dó yě wú wɛ bɔ é vɛ́ jlɛ́.

³⁹ Mawu sɛ́ akpɔ́kpɔ́ dó bɔ é cyɔ́n yě, é sɛ́ myɔ dó yě bɔ yě nɔ́ dó mɔ nukúnnú zǎn mɛ.

⁴⁰ Yě byɔ́, bɔ é ná xɛ e è nɔ ylɔ́ ɖɔ káyi lɛ́ɛ yě; é nɔ́ sɛ́ wɔ̌xúxú dó yě sín jǐxwé, bɔ yě nɔ́ ɖu gɔ́ xo.

⁴¹ É ɖe ali dó só mɛ nú yě bɔ sin nɔ tɔ́n sín mɛ, bó nɔ́ sa gbɔn axéko ɔ́ jí bǐ tɔ ɖɔhun.

⁴² É flín akpá mímɛ́ e é dó é, akpá e é dó nú mɛsɛntɔ́ tɔn Ablaxámu é.

⁴³ É ɖe togun tɔn tɔ́n kpó awǎjijɛ kpó, é ɖe mɛ e é cyán lɛ́ɛ tɔ́n kpó awǒbóbó kpó.

⁴⁴ É sɔ́ akɔta lɛ́ɛ sín ayǐkúngban jó nú yě, bɔ nǔ e togun ɖěvo lɛ́ɛ wa lɛ́ɛ húzú yětɔn

⁴⁵ bónú yě ná hɛn sɛ́n tɔn lɛ́ɛ, bó ná bló nǔ e é ɖɔ lɛ́ɛ. Mi kpa Mawu Mavɔmavɔ!