Ɖɛhan 104 - MAWUXÓWÉMA

¹ Lǐndɔ̌n ce ní kpa susu nú Mawu Mavɔmavɔ. Mawu Mavɔmavɔ, Mawu ce, a dǒ agba bɔ é vɛ́ jlɛ́; nǔsacɔ́ kpó nǔjíwǔ kpó wɛ nyí awu e a dǒ é.

² A sɔ́ wěziza dó awu ɖaxó ɖé ɖɔhun, a vlɔ̌n jǐxwé avɔgoxɔ ɖɔhun.

³ Sin e ɖo jǐxwé lɛ́ɛ jí wɛ a sɔ́ nɔtɛn towe ɖó, akpɔ́kpɔ́ lɛ́ɛ wɛ nyí ahwanhún towe, jɔhɔn mɛ wɛ a nɔ gbɔn.

⁴ Jɔhɔn wɛ nyí wɛnsagun towe, bɔ myɔ ka nyí mɛsɛntɔ́ towe.

⁵ A ɖǒ ayǐkúngban ɔ́ ɖó dodó tɔn jí, bɔ é ná dán wǔ gbeɖé ǎ.

⁶ A sɔ́ xu bo cyɔ́n n'i avɔ ɖɔhun, sin ɔ́ nɔ́ hun káká yi só lɛ́ɛ sín nuvínu.

⁷ A ka wa adǎn dó sin kpowun ɔ́, é nɔ́ hɔn. Jǐ towe dó gbe lě kpowun ɔ́, sin ɔ́ nɔ bɔ wezun nyi do,

⁸ bó nɔ́ gbɔn só ta só ta, tɔdomɛ tɔdomɛ, káká yi fí e a ɖǒ tɛn n'i ɖó é.

⁹ A ɖǒ dogbó nú sin ɔ́, bɔ é sixú dó asá ǎ, a ɖǒ dogbó nú sin bónú é má sɔ́ wá gba kpé ayǐkúngban jí ɖě ó.

¹⁰ Hwi wɛ nɔ xlɛ́ ali sin e nɔ tɔ́n sín tɔjɔtɛn lɛ́ɛ mɛ é; é nɔ́ sa gbɔn sókan mɛ sókan mɛ.

¹¹ Gběkanlin lɛ́ɛ bǐ nɔ́ wá nu, tócí gbě tɔn lɛ́ɛ nɔ́ wá fá kɔ.

¹² Xɛ lɛ́ɛ nɔ́ xo adɔ̌ gbɔn tɔ tó tɔ tó, yě nɔ́ ɖo han ji wɛ gbɔn atínma mɛ atínma mɛ.

¹³ A nɔ nɔ jǐxwé bó nɔ́ sɛ́ jǐ dó, bɔ é nɔ́ ja dó só lɛ́ɛ jí, nǔ ɖagbe ɖagbe e a sɔ́ alɔ towe dó bló lɛ́ɛ kpé ayǐkúngban ɔ́ jí.

¹⁴ A nɔ ná gbe bɔ gběhan nɔ́ wú, bɔ kanlin lɛ́ɛ nɔ́ ɖu; mɔ̌ ɖokpó ɔ́, jinukún e gbɛtɔ́ lɛ́ɛ nɔ́ dó lɛ́ɛ nɔ́ wú; énɛ́ ɔ́, ayǐkúngban ɔ́ nɔ́ ná nǔ e è nǎ ɖu é:

¹⁵ é nɔ́ ná vɛ̌ɛn e nɔ dó wǔyá lanmɛ nú mɛ é, é nɔ́ ná ami e nɔ zɔ́n bɔ nukún mɛ nɔ́ kɔ́n é, é nɔ́ ná nǔɖuɖu e nɔ́ ná hlɔ̌nhlɔ́n mɛ é.

¹⁶ Atín ɖaxó ɖaxó lɛ́ɛ ɔ́, sin nɔ kpé yě, sɛ́dlutín Libáan tɔn e a tun lɛ́ɛ ɔ́, sin nɔ kpé yě.

¹⁷ Atín énɛ́ lɛ́ɛ jí wɛ xɛ lɛ́ɛ nɔ́ xo adɔ̌ ɖó, bɔ aɖɔwé lɛ́ɛ nɔ́ wa adɔ̌ nyi siplɛ́tín lɛ́ɛ jí.

¹⁸ Só ɖaxó ɖaxó lɛ́ɛ jí wɛ sógbɔ́ lɛ́ɛ nɔ́ nɔ, bɔ agidigbǎnwún lɛ́ɛ nɔ́ nɔ sókan mɛ.

¹⁹ A blǒ sun bɔ è nǎ nɔ́ dó tunwun hwenu lɛ́ɛ, a blǒ hwe bɔ é tunwun hwenu e é ná nɔ yi xɔ dó é.

²⁰ A nɔ sɛ́ ablu dó bɔ zǎn nɔ́ kú, bɔ kanlin e ɖo zun mɛ lɛ́ɛ nɔ́ jɛ dǐndán kpé jí.

²¹ Kinnikínní ví lɛ́ɛ nɔ́ jɛ lan lɛ́ɛ gúdo bó nɔ́ dó gbe, yě nɔ́ byɔ́ we nǔɖuɖu e a nɔ ná yě é.

²² Hwe ka tɔ́n ɔ́, yě nɔ́ yi xɔ.

²³ Hwe énɛ́ nu wɛ gbɛtɔ́ ka nɔ́ tɔ́n, bó nɔ́ ɖidó nǔɖé wa gbé, bó nɔ́ yi wa azɔ̌ káká jɛ gbadanu.

²⁴ Mawu Mavɔmavɔ, nǔɖíɖó towe lɛ́ɛ sukpɔ́ lóóo! A blǒ nǔ énɛ́ bǐ kpó nǔnywɛ́ kpó. Nǔ e a blǒ lɛ́ɛ wɛ gɔ́ ayǐkúngban ɔ́ jí.

²⁵ Kpɔ́n xu, é ɖo faɖaɖa xweyǐgbe, kanlin kpɛví ɖ'é mɛ, kanlin ɖaxó ɖ'é mɛ, è sixú xa yě lɔ ǎ.

²⁶ Tɔjíhún ɖaxó ɖaxó lɛ́ɛ ɖ'é jí, nǔdábaɖa Levyatáan lɔ ɖ'é mɛ, a blǒ e bó ná dó da ayihún ná.

²⁷ Kanlin lɛ́ɛ bǐ wɛ nɔ́ ɖó nukún we, bónú a nǎ ná nǔɖuɖu yě hwenu e xovɛ́ ná sin yě é,

²⁸ a nɔ ná nǔɖuɖu yě bɔ yě nɔ́ yí, a nɔ hun alɔ bó nɔ ná nǔɖuɖu yě, bɔ yě nɔ́ ɖu nǔ gɔ́ xo.

²⁹ A sɔ́ hwiɖée hwlá dó yě ɔ́, xɛsi nɔ jɛ yě jí. A yǐ funfún sín yě sí ɔ́, yě nɔ́ bɔnu, yě nɔ́ lɛ́ húzú kɔ́gúdu.

³⁰ A ka lɛ́ sɛ́ funfún towe dó yě ɔ́, yě nɔ́ lɛ́ wá gbɛ, bɔ gbɛ yɔ̌yɔ́ ɖěvo nɔ lɛ́ bɛ́ ɖo ayǐkúngban ɔ́ jí.

³¹ Mawu Mavɔmavɔ sín susu ní nɔ te káká sɔ́yi. Xomɛ ní hun i dó nǔ e é bló lɛ́ɛ wú.

³² Mawu Mavɔmavɔ nɔ kpɔ́n ayǐkúngban ɔ́ bɔ é nɔ́ dán wǔ, é nɔ́ ɖó alɔ só lɛ́ɛ wú bɔ yě nɔ́ jɛ azɔ si jí.

³³ Nú ta ce ɖo gbɛ jɛ́n wɛ ɔ́, un ná nɔ́ kpa Mawu Mavɔmavɔ; nú un ko sixú nɔ́ fɔ́n ɔ́, un ná nɔ́ ɖɔ xó lómílómí dó mlá Mawu ce dó han mɛ.

³⁴ Xó lómílómí e ɖɔ wɛ un ɖe lɛ́ɛ ní nyɔ́ se n'i. Un jló ná j'awǎ ɖo Mawu Mavɔmavɔ mɛ.

³⁵ Hwɛhutɔ́ sín kún ní vɔ sín ayǐkúngban ɔ́ jí, bónú mɛdídá ɖě má sɔ́ ɖe ó. Lǐndɔ̌n ce, kpa susu nú Mawu Mavɔmavɔ! Mi kpa Mawu Mavɔmavɔ!