Ɖɛhan 103 - MAWUXÓWÉMA

¹ Davídi sín han. Lǐndɔ̌n ce ní kpa susu nú Mawu Mavɔmavɔ; nǔ e ɖo wǔ ce é bǐ ní sɔ́ nyǐkɔ mímɛ́ tɔn su.

² Lǐndɔ̌n ce ní kpa susu nú Mawu Mavɔmavɔ. Ní ma wɔn ɖagbe e é wa lɛ́ɛ kwín ɖokpó ó.

³ Mawu Mavɔmavɔ wɛ nɔ́ sɔ́ hwɛ e un hu lɛ́ɛ bǐ kɛ mì. É wɛ nɔ́ gbɔ azɔn ce lɛ́ɛ bǐ nú mì.

⁴ É wɛ nɔ́ hwlɛ́n mì gán ɖo kú sí, é nɔ́ nyɔ́ xomɛ dó wǔ ce ɖésú; é nɔ́ kú nǔbláwǔ nú mì tawun.

⁵ É bló bɔ nǔ nyɔ́ nú mì sín zǎnzǎn bó ná nyɔ́ nú mì káká yi gbada; é nɔ́ sɔ́ mì dó húzú mɛ wínnyáwínnyá, bɔ un nɔ ɖo wǐnnyáwínnyá mɛ gangan ɖɔhun.

⁶ Mawu Mavɔmavɔ ɔ́, hwɛ jlɔ́jlɔ́ wɛ é nɔ́ ɖɔ, é wɛ nɔ́ gbo hwɛ nú mɛ e blɛ́ ɖu wɛ è ɖe lɛ́ɛ bǐ.

⁷ É ɖe tito tɔn lɛ́ɛ xlɛ́ Mɔyízi, é ɖe nǔ ɖaxó ɖaxó e é bló lɛ́ɛ xlɛ́ Izlayɛ́li ví lɛ́ɛ.

⁸ Mawu Mavɔmavɔ ɔ́, xomɛfátɔ́ wɛ, nǔbláwǔkúnúmɛtɔ́ wɛ; é nɔ́ yá wǔ sin xomɛ ǎ, é nyɔ́ xomɛ ɖésú.

⁹ É nɔ́ dó hwɛ mɛ káká sɔ́yi ǎ, É nɔ́ nɔ xomɛsin jí káká sɔ́yi ǎ,

¹⁰ É nɔ́ kpɔ́n dó hwɛ e mǐ hu é wú, bó nɔ́ wa nǔ tɔn xá mǐ ǎ. É nɔ́ sɔ́ nǔ e mǐ wa nyi do é sín bǎ dó xo mǐ ǎ.

¹¹ Lě do jǐnukúnsin yi jǐ sɔ ɔ́, mɔ̌ do wɛ xomɛ e Mawu Mavɔmavɔ nyɔ́ dó mɛ e nɔ ɖó sísí n'i lɛ́ɛ wú é yi jǐ sɔ é nɛ́.

¹² Lě do gbadahwe jí lín dó zǎnzǎnhwe jí sɔ ɔ́, mɔ̌ do wɛ Mawu Mavɔmavɔ nɔ́ sɛ nǔwanyido mǐtɔn lɛ́ɛ dó zɔ nú mǐ sɔ.

¹³ Mawu Mavɔmavɔ nɔ ɖe wǎn yíyí xlɛ́ mɛ e nɔ ɖó sísí n'i lɛ́ɛ é, lě e tɔ́ nɔ́ ɖe wǎn yíyí xlɛ́ vǐ gbɔn é.

¹⁴ É tunwun nǔ e é dó bló mǐ é; É tunwun ɖɔ kɔ́gúdu kpowun wɛ mǐ nyǐ; é wɔn ǎ.

¹⁵ Gbɛtɔ́ a! É nɔ́ dɔ́ ji ɖé ǎ, a nǎ ɖɔ gběhan wɛ, É nɔ́ jɛ sɛ́ gba jí.

¹⁶ Jɔhɔn ɖé ká nɔ́ wá nyi bɔ é nɔ́ xú; è sɔ́ nɔ́ mɔ ɛ ǎ, è sɔ́ nɔ́ tunwun fí e é nɔ lɔ é ǎ.

¹⁷ Amɔ̌, xomɛnyínyɔ́ Mawu Mavɔmavɔ tɔn ɔ́, é ɖe nú mɛ e nɔ ɖó sísí n'i lɛ́ɛ tɛgbɛ, bɔ gbejíninɔ tɔn nɔ́ hun káká yi vǐ yětɔn ví lɛ́ɛ jí.

¹⁸ Nú yě ɖó sísí nú nǔ e ɖo akɔ e yě jɛ xá Mawu Mavɔmavɔ é mɛ, bó tunwun ɖɔ émí ná bló nǔ e é byɔ́ émí lɛ́ɛ ɔ́, xomɛnyínyɔ́ tɔn nɔ́ nɔ yě jí.

¹⁹ Mawu Mavɔmavɔ sɔ́ axɔ́súzinkpo tɔn ɖó jǐnukúnsin; axɔ́súɖuɖu tɔn hú gǎn nǔ bǐ.

²⁰ Wɛnsagun lɛ́ɛ e mi, mi kpa susu nú Mawu Mavɔmavɔ! Mi mɛ e nɔ zé hlɔ̌nhlɔ́n mitɔn dó bló nǔ e é zɔ́n mi lɛ́ɛ, bó nɔ́ dó ɖe xlɛ́ ɖɔ émí se tónú n'i lɛ́ɛ mi, mi kpa susu n'i.

²¹ Mi kpa susu nú Mawu Mavɔmavɔ, mi ahwangɔnu tɔn lɛ́ɛ. Mi mɛ e nyí mɛsɛntɔ́ tɔn bó nɔ́ wa jlǒ tɔn lɛ́ɛ bǐ ní kpa susu n'i.

²² Mi nǔɖíɖó Mawu Mavɔmavɔ tɔn lɛ́ɛ e mi, mi kpa susu n'i gbɔn fí e é kpa acɛ gbɔn lɛ́ɛ bǐ. Lǐndɔ̌n ce ní kpa susu nú Mawu Mavɔmavɔ.