Ɖɛhan 101 - MAWUXÓWÉMA

¹ Davídi sín han. Xó e un jló ná nɔ́ ɖɔ dó han mɛ é ɖíe: un ná nɔ́ ɖɔ xó dó xomɛnyínyɔ́ kpó nǔ wa ɖó sɛ́nxwi jí kpó wú. Mawu Mavɔmavɔ, hwi ná ɖɔ xó lómílómí dó mlá dó han mɛ wɛ un ɖe.

² Un jló ná ɖó walɔ e wú è ma nɔ mɔ nǔɖé ɖɔ dó ǎ é. Hwetɛ́nu a ka ná wá gɔ̌n ce? Un ná sɔ́ ayi mímɛ́ dó wa nǔ ɖo xwé ce gbe.

³ Un jló ná ɖó alɔ ɖo nǔ e má nyɔ́ ǎ é ɖě mɛ gbeɖé ǎ. Un gbɛ́ wǎn nú walɔ gbɛtɔ́ e má nɔ́ nɔ gbejí nú Mawu ǎ lɛ́ɛ tɔn. Nǔ mɔ̌hunkɔ ɖě ná va dó wǔ ce gbeɖé ǎ.

⁴ Ayixa nyanya ní nɔ zɔ nú mì, nyi kpó nǔ nyanya kpó ná kpé nǔɖé gbeɖé ǎ.

⁵ Mɛ e nɔ ɖɔ nɔzo tɔn nú ɖo nǔglɔ́ ɔ́, un nǎ xwe nu tɔn dó xɔ. Mɛ e nɔ mɔ ɖɔ émí jɛ́n tíin, bó nɔ́ ɖo éɖée mɔ wɛ ɔ́, nyi kpó é kpó ná vɛ́ ǎ.

⁶ Un ná cyán mɛ e ɖo gbejí ɖo to ɔ́ mɛ lɛ́ɛ, bónú yě ná nyí gǎn hɔn-yitɔ́ ce. Mɛ e ɖó walɔ e wú è ma nɔ mɔ nǔɖé ɖɔ dó ǎ lɛ́ɛ wɛ ná wa azɔ̌ xá mì.

⁷ Mɛ e nɔ hízí nǔ ɖu é ná nɔ xwé ce gbe ǎ. Mɛ e nɔ ɖó adingban é ná sixú nɔ te nukɔn ce ǎ.

⁸ Zǎnzǎn tɛgbɛ ɔ́, nǎ nɔ́ sú mɛdídá e ɖo to ɔ́ mɛ lɛ́ɛ sín kún dó, bó ná dó ɖe mɛ e nɔ wa nǔ nyanya lɛ́ɛ bǐ sín Mawu Mavɔmavɔ sín toxo ɔ́ mɛ.