Ɖɛhan 10 - MAWUXÓWÉMA

¹ Mawu Mavɔmavɔ, étɛ́wú a ka yi cí zɔ? Étɛ́wú a ka nɔ sɔ́ hwiɖée hwlá ɖo adǎngbomɛ hwenu?

² Mɛdídá lɛ́ɛ nɔ́ jɛ gǒmɛ nú mɛ e ma ɖó mɛɖé ǎ lɛ́ɛ kpó goyíyí kpó; mɛdídá lɛ́ɛ ɖó mɔ nú wamamɔnɔ lɛ́ɛ bɔ yě jɛ mɛ.

³ Mɛdídá kpé nǔ e lin wɛ é ɖe ɔ́ wú bó wa, lobo kpa éɖée. Nǔwlóɖutɔ́ nɔ́ nyi nu do nú Mawu Mavɔmavɔ, bó nɔ́ ko e.

⁴ Mɛdídá ɖo awa glá wɛ, bó nɔ́ ɖɔ: “Mawu nɔ́ dɔn tó ɖě nú mɛ ǎ, Mawu ɖě ká tíin lɔ ǎ.” Fí e ayi tɔn mɔ nǔ jɛ ɔ́ bǐ nɛ́.

⁵ Mɛdídá bló nǔɖé hweɖěbǔnu ɔ́, bǐ wɛ nɔ́ zɔ́n n'i; é ké ya nú hwɛɖónúmɛ Mawu tɔn ǎ. É nɔ́ xwe akpi dó mɛ e ɖo agba hwlɛ́n xá ɛ wɛ lɛ́ɛ.

⁶ É nɔ́ ɖɔ dó ayi mɛ ɖɔ: “Nǔɖé nɔ́ sɛ tɛn nú mì ǎ, awě ɖě ná xo mì gbeɖé kpɔ́n ǎ.”

⁷ É kɛ nu ɔ́; nu jɛ́n é nɔ́ dó mɛ, awo jɛ́n é nɔ́ ɖó, ajo wé jɛ́n é nɔ́ ɖe, nǔ nyanya kpó dǎka kpó sín xó jɛ́n nɔ́ tɔ́n sín nu tɔn mɛ.

⁸ É nɔ́ yi wu nú mɛ ɖo gletoxo lɛ́ɛ kpá, é nɔ́ hu xomɛvɔ́nɔ ɖo nǔglɔ́. Nukún tɔn nɔ́ gosín mɛ e ma ɖó gǎn ɖé ǎ ɔ́ wú ǎ.

⁹ É nɔ́ tɔwu kinnikínní ɖo wudo mɛ ɖɔhun. É nɔ́ tɔwu bó ná zɔn mɛ ma ɖó mɛ ɖé jí; é nɔ́ dɔn mɛ ma ɖó mɛɖé dó mɔ tɔn mɛ bó nɔ́ wlí i.

¹⁰ Mɛdídá fɛ, é sɛ éɖée wún, bɔ mɛ ma ɖó mɛɖé jɛ fɛn tɔn mɛ.

¹¹ Mɛdídá nɔ́ ɖɔ dó ayi mɛ ɖɔ: “Mawu nɔ́ wɔn nǔ, é nɔ́ ɖe kɔ dó nǔ e wa wɛ un ɖe lɛ́ɛ, é nɔ́ mɔ nǔɖé gbeɖé ǎ.”

¹² Mawu Mavɔmavɔ, sí te! Mawu, blǒ gbɔn ɖě! Ma wɔn gbɛbláwǔnánɔ lɛ́ɛ ó.

¹³ Étɛ́wú mɛdídá ná nɔ́ kpɔ́n nukún mɛ nú we? Étɛ́wú é ná nɔ́ hu tɛ́ nú we dó ayi mɛ ɖɔ a kún sixú wa nǔɖé nú émí ó?

¹⁴ Mawu Mavɔmavɔ, a mɔ akpɔ e mɔ wɛ wamamɔnɔ ɖe é, a mɔ wǔvɛ́ e mɔ wɛ é ɖe é, a mɔ nǔ jɛ wǔ tɔn, lobo ná jɛ ahwan jǐ tɔn. Mɛ e ma ɖó gǎn ɖé ǎ ɔ́, hwi wɛ é nɔ́ jó éɖée ná. Hwi wɛ nɔ gɔ́ alɔ nú tɔ́cyɔvǐ.

¹⁵ Hu acɛ nú mɛdídá, dɔn nǔ nyanya e é wa lɛ́ɛ sín tó n'i, kún tɔn bǐ ní sú dó.

¹⁶ Mawu Mavɔmavɔ wɛ nyí axɔ́sú káká sɔ́yi. É sú mɛ e ma nɔ sɛn ɛ ǎ lɛ́ɛ kún dó sín to tɔn mɛ.

¹⁷ Mawu Mavɔmavɔ, mɛ ma ɖó mɛɖé lɛ́ɛ ɔ́, a nɔ se ɖɛ yětɔn, a nɔ ná akɔ́nkpinkpan yě, a nɔ ɖótó yě,

¹⁸ bó ná dó ɖe xlɛ́ ɖɔ tɔ́cyɔvǐ kpó mɛ e táfú wɛ è ɖe é kpó sín hwɛ jɔ. Énɛ́ ɔ́, mɛɖé sɔ́ ná ɖo ayǐkúngban jí, bó ná nyí acɛ gannaganna kpa nú mɛ tɔ́ ǎ.