Daniyɛ́li 9 - MAWUXÓWÉMA

Daniyɛ́li xo ɖɛ

¹ “Hwenu e Daliwúsi Asuelúsi ví ɔ́ ɖo xwe ɖokpó bló wɛ ɖo zinkpo jí, ɖo akɔta Mɛdi tɔn nu, ɖo axɔ́súɖuto Babilɔ́nu tɔn ɔ́ mɛ ɔ́,

² nyɛ Daniyɛ́li xa wěma mímɛ́ lɛ́ɛ, bɔ xwe kanɖé gban (70) e è nǎ sɔ́ ɖó te dó hánnyá Jeluzalɛ́mu toxo ɔ́ ná, bɔ Mawu Mavɔmavɔ ɖɔ xó tɔn nú gbeyíɖɔ Jelemíi ɔ́, un mɔ nǔ jɛ mɛ.

³ Un blá nu, bó zé ati kplá, bó lɛ afín, bó dó ɖe xlɛ́ ɖɔ un húzú jijɔ, bó kpan nukɔn Aklúnɔ Mawu bó xo ɖɛ, bó sa vo n'i.

⁴ Un xo ɖɛ bó ɖɔ hwɛ ce lɛ́ɛ nú Mawu Mavɔmavɔ, Mawu ce ɖɔ: “Aklúnɔ, Mawu ɖaxó e mɛɖé ma nɔ mɔ do ná ǎ é, hwi mɛ e nɔ nɔ gbejí nú akɔ e a jɛ xá mɛ e nɔ nyi sɛ́n towe lɛ́ɛ é. A nɔ nɔ gbejí nú mɛ e yí wǎn nú we lɛ́ɛ.

⁵ Mǐ gba sɛ́n, mǐ hu hwɛ, mǐ jɛ agɔ, mǐ fɔ́n gǔ dó jǐ towe. Mǐ lɛ́ kɔ sín sɛ́n towe lɛ́ɛ kpódó tito towe lɛ́ɛ kpó gúdo.

⁶ Mǐ ɖó tó xó e mɛsɛntɔ́ towe gbeyíɖɔ lɛ́ɛ ɖɔ nú axɔ́sú mǐtɔn lɛ́ɛ, gǎn mǐtɔn lɛ́ɛ, tɔ́gbó mǐtɔn lɛ́ɛ kpó togun ɔ́ bǐ kpó é ǎ.

⁷ Hwi Aklúnɔ ɔ́, a hu hwɛ ɖě ǎ. Amɔ̌, mǐdɛɛ lɛ́ɛ ɔ́, mǐɖée jɛ́n mǐ ná zé hwe lě e mǐ ɖ'é wú gbɔn égbé din é, mǐ kpó Jeluzalɛ́munu lɛ́ɛ kpódó Judáa ví lɛ́ɛ kpó, kpódó Izlayɛ́li ví ɖě lɛ́ɛ e gbejí ma nɔ nú we yětɔn zɔ́n, bɔ a nya yě, bɔ yě gba kpé to lɛ́ɛ mɛ to lɛ́ɛ mɛ lɛ́ɛ kpó. Mɛ ɖě ɖo dokɔ fí, bɔ mɛɖé lɛ́ɛ yi cí to línlín mɛ.

⁸ Nǔgbó wɛ Mawu Mavɔmavɔ, mǐ kpó axɔ́sú mǐtɔn lɛ́ɛ kpó, gǎn mǐtɔn lɛ́ɛ kpó, tɔ́gbó mǐtɔn lɛ́ɛ kpó ɖu winnyá, ɖó mǐ hu hwɛ dó we.

⁹ Amɔ̌, hwɛ Aklúnɔ, Mawu mǐtɔn ɔ́, ɖo xomɛnyínyɔ́ towe mɛ ɔ́, mǐ nɔ ɖo gǔ fɔ́n dó jǐ towe wɛ, có a nɔ zé hwɛ mǐtɔn lɛ́ɛ kɛ mǐ.

¹⁰ Hwenu e a nɔ ɖo xó ɖɔ nú mǐ wɛ, gbɔn mɛsɛntɔ́ towe gbeyíɖɔ lɛ́ɛ jí ɖɔ mǐ ní nyi sɛ́n émítɔn lɛ́ɛ ɔ́, mǐ dó tókúse mɛ.

¹¹ Izlayɛ́li togun ɔ́ bǐ wɛ gba sɛ́n towe, bó ɖó kɔ zɔ, ɖó yě ba ná se nǔ e a nɔ kplɔ́n mɛ lɛ́ɛ ǎ; énɛ́ ɔ́, nyladó e xó è ɖɔ ɖo mɛsɛntɔ́ towe Mɔyízi sín sɛ́nwéma ɔ́ mɛ ɔ́ wá jɛ dó mǐ jí, ɖó tónúmase mǐtɔn lɛ́ɛ wú.

¹² A ɖe gbe bɔ nǔ e a ɖɔ dó mǐ ɖésúnɔ kpó gǎn e ɖo acɛ kpa nú mǐ wɛ lɛ́ɛ kpó wú ɔ́ jɛ; a ɖe gbe bɔ nyladó e ma jɛ ɖo fí ɖé kpɔ́n gbeɖé ǎ ɔ́ jɛ dó mǐ jí ɖo Jeluzalɛ́mu.

¹³ Mawu Mavɔmavɔ, Mawu mǐtɔn, nyladó énɛ́ lɛ́ɛ bǐ jɛ dó mǐ jí lě e è wlǎn dó Mɔyízisɛ́n ɔ́ mɛ gbɔn é, bɔ mǐ ka sa vo nú we, bó fá xomɛ nú we ǎ, mǐ ka lɛ́ kɔ sín hwɛ mǐtɔn lɛ́ɛ gúdo ǎ, mǐ ké ya nú gbeta e a ɖe tɔ́n é ǎ.

¹⁴ Énɛ́ ɔ́ wɛ zɔ́n bɔ a sɛ́ nyladó énɛ́ lɛ́ɛ dó mǐ. Nǔgbó wɛ Mawu Mavɔmavɔ, Mawu mǐtɔn, nǔ e a nɔ wa lɛ́ɛ bǐ wɛ nɔ sɔgbe; lo ɔ́, mǐ nɔ́ ɖó tó nǔ e a nɔ kplɔ́n mɛ lɛ́ɛ ǎ.

¹⁵ “Aklúnɔ, Mawu mǐtɔn, hwenu e a zě hlɔ̌nhlɔ́n towe e nukɔn mɛɖé ma sixú nɔ te ɖe ǎ é dó ɖe togun towe tɔ́n sín Ejípu ɔ́, nyǐkɔ towe yi jǐ, bó kpo ɖo mɔ̌ káká wá jɛ égbé. Lo ɔ́, mǐdɛɛ lɛ́ɛ ɔ́, mǐ hu hwɛ, mǐ jɛ agɔ dó we.

¹⁶ Aklúnɔ, lɛ̌ jɛ ɖagbe towe lɛ́ɛ wa nú mǐ jí. Ma sɔ́ xomɛsin ɖaxó énɛ́ dó kpɔ́n Jeluzalɛ́mu, toxo towe, só mímɛ́ towe ná ó. Agɔ e mǐ jɛ lɛ́ɛ kpó hwɛ e tɔgbó mǐtɔn lɛ́ɛ hu lɛ́ɛ kpó zɔ́n bɔ akɔta e lɛ́ dó mǐ lɛ́ɛ ɖo zun ɖe ɖo Jeluzalɛ́mu kpó togun towe kpó wú wɛ.

¹⁷ Mawu mǐtɔn, bo ɖó tó ɖɛ e xo wɛ un ɖe ɔ́ kpó vo e sa sɛ́ dó we wɛ un ɖe ɔ́ kpó. Zě nukún ɖagbe dó kpɔ́n goxɔ towe e gba hánnyá é ná ɖó wǎn yíyí towe wú.

¹⁸ Mawu ce, ɖǒtó ganjí, bó zé nukún towe dó kpɔ́n ná tlítlí. Kpɔ́n lě e to mǐtɔn élɔ́ e ɖo acɛ towe mɛ ɔ́ hánnyá bó cí é! Ée mǐ ka ɖo vo sa nú we wɛ ɔ́, é nyí nyɔ̌wa mǐtɔn wú wɛ mǐ gán jɛ ǎ; lo ɔ́, wǎn yíyí towe ma ɖó dogbó ɔ́ wú wɛ mǐ gán jɛ.

¹⁹ Aklúnɔ, ɖǒ tó mǐ! Aklúnɔ, zě hwɛ mǐtɔn lɛ́ɛ kɛ mǐ! Aklúnɔ, ayi towe ní nɔ mǐ wú! Mawu ce, kpɔ́n dó wǎn yíyí towe wú, bó wá jɛ hun dó to élɔ́ kpó togun élɔ́ kpó jí, ɖó nyǐkɔ towe wɛ è ylɔ́ dó yě jí.”

Nǔ e jɛ ɖo xwe tɛ́nwe tɛ́nwe donu kanɖé gban lɛ́ɛ mɛ é

²⁰ “Un kpo ɖo ɖɛ xo wɛ, bó kpo ɖo hwɛ ce lɛ́ɛ kpódó ée togun ce Izlayɛ́li hu ɔ́ kpó ɖɔ nú Mawu Mavɔmavɔ, Mawu ce wɛ. Un sa vo n'i dó só mímɛ́ tɔn tamɛ.

²¹ Hwenu e un ɖo xó lɛ́ɛ ɖɔ nú Mawu wɛ ɔ́, wɛnsagun Gabliyɛ́li é un mɔ ɖo dlɔ̌ mɛ ɖ'ayǐ ɔ́ zɔn hawun bó wá gɔ̌n ce, hwenu e è ɖo vɔ̌sánú gbadanu tɔn ɔ́ xwlé Mawu wɛ é.

²² É ɖɔ nú mì ɖɔ: ‘Daniyɛ́li, un wá din bó ná hun nǔ sín ayi towe nu.

²³ Ée a jɛ vo sa nú Mawu jí tlóló ɔ́, Mawu dó wɛn ɖokpó sɛ́ dó we bɔ un wá dó we, ɖó Mawu yí wǎn nú we ɖésú. Dǒ gǎn, bó mɔ nǔ jɛ wɛn énɛ́ ɔ́ mɛ, bó ná tunwun nǔ e ɖɔ wɛ dlɔ̌ towe ɖe é.

²⁴ Mawu zé xwe tɛ́nwe tɛ́nwe donu kanɖé gban (70) ɖó te nú togun towe, kpó to mímɛ́ e mɛ a ɖe ɔ́ kpó. Hwenu tají ɖé wɛ bɔ tónúmase bǐ ná fó, bɔ nǔwanyido bǐ ná nɔ te, bɔ è nǎ zé hwɛ bǐ kɛ mɛ, lobɔ hwɛjijɔ mavɔ mavɔ ɔ́ ná bɛ́ azɔ̌, bɔ nǔmimɔ lɛ́ɛ kpó xóɖɔɖ'ayǐ lɛ́ɛ kpó ná jɛ, bɔ è nǎ lɛ́ ylɔ́ Mawu nyíkɔ dó goxɔ mímɛ́ bǐ ɔ́ jí.

²⁵ Nǔ e a ka ɖó ná tunwun bó ná mɔ nǔ jɛ wú ɔ́ ɖíe: Sín hwenu e è ɖǒ wɛn e ɖɔ xó dó kɔ lɛ́ sín gbějí wá ɔ́ wú, bó ɖɔ dó Jeluzalɛ́mu toxo ɔ́ ná vɔ́ gbá ɔ́ wú káká wá jɛ gǎn e jí è ylɔ̌ Mawu nyíkɔ dó ɔ́ sín wǐwá hwenu ɔ́ wú ɔ́, é kó bló xwe tɛ́nwe tɛ́nwe donu tɛ́nwe. Énɛ́ ɔ́ gúdo ɔ́, ɖo xwe tɛ́nwe tɛ́nwe donu kanɖé ko-nukún-we (62) mɛ ɔ́, è nǎ lɛ́ vɔ́ toxo ɔ́ kpódó ahohó tɔn lɛ́ɛ bǐ kpó bló ɖó. Amɔ̌, hwe énɛ́ lɛ́ɛ nu ná nyí hwenu vɛ́ wǔ ɖésú.

²⁶ Ée xwe tɛ́nwe tɛ́nwe donu kanɖé ko-nukún-we (62) lɛ́ɛ ná fó ɔ́, è nǎ hu mɛ e jí è ylɔ̌ Mawu nyíkɔ dó é, bɔ mɛ ɖěbǔ ná jɛ hun jǐ tɔn ǎ. Énɛ́ ɔ́ gúdo ɔ́, gǎn ɖokpó ná wá kpó ahwangɔnu tɔn kpó, bó ná gba toxo ɔ́ kpó goxɔ tɔn kpó hánnyá. Amɔ̌, xomɛsin Mawu tɔn sín bǎ ná vɔ gǎn énɛ́ ɔ́ sín gbɛ. Gǎn énɛ́ ɔ́ ná ɖo ahwan fun wɛ, bó ná ɖo nǔ hɛn gblé wɛ káká jɛ kú tɔn hwenu lě e è ko ɖɔ gbɔn ɖ'ayǐ é.

²⁷ Xwe tɛ́nwe gúdo tɔn lɛ́ɛ mɛ ɔ́, Mawu ná ɖó azɔ̌ syɛ́nsyɛ́n kɔ jí nú mɛ gěgé, bɔ yě ɖó ná wa dandan. Yě bló xwe atɔn adaɖé ɖo xwe tɛ́nwe énɛ́ lɛ́ɛ mɛ ɔ́, è nǎ ɖó vɔ̌sísá kpó nǔníná kpó lɔ bǐ te. Nǔhɛngblétɔ́ énɛ́ ɔ́ ná yá wǔ bló nǔ baɖabaɖa lɛ́ɛ lě e é jló e gbɔn é káká jɛ hwenu e è ɖǒ, bɔ éyɛ́ tɔn ná fó dó é.’ ”