Daniyɛ́li 8 - MAWUXÓWÉMA

Nǔ wegɔ́ ɔ́ e Mawu ɖe xlɛ́ Daniyɛ́li é

¹ Hwenu e axɔ́sú Bɛlucasáa ɖo xwe atɔn bló wɛ ɖo zinkpo jí ɔ́, nyɛ Daniyɛ́li lɛ́ mɔ nǔ ɖěvo dó ée un ko mɔ ɖ'ayǐ ɔ́ gúdo.

² Nǔ e un mɔ ɖo dlɔ̌ mɛ din ɔ́ ɖíe: Un mɔ nyiɖée ɖo to ɖaxó e è nɔ ylɔ́ ɖɔ Súzi ɔ́ mɛ, ɖo Elámu tokpɔn mɛ, bɔ un ɖo tɔ e è nɔ ylɔ́ ɖɔ Wuláyi ɔ́ tó.

³ Đo dlɔ̌ ɔ́ mɛ ɔ́, un ɖo nǔ e mɔ wɛ un ɖe ɔ́ kpɔ́n wɛ, bó mɔ agbo bɔ é kpan nukɔn tɔ ɔ́. Agbo ɔ́ ɖó zo jangan jangan we; amɔ̌, zo wegɔ́ ɔ́ e wú gbɔn gǔdo ɔ́ kló hú nukɔn tɔn ɔ́.

⁴ Un mɔ agbo ɔ́ ɖo zo nyi dó gbadahwe jí wɛ, bó ɖo nyinyi dó totaligbé wɛ, bó ɖo nyinyi dó tofɔligbé wɛ. Kanlin mɔ̌hun tíin bó ná nɔ te nukɔn tɔn ǎ, è ka sixú yí mɛɖé sín fɛn tɔn mɛ ǎ. Nǔ e jló e ɔ́ wɛ é nɔ́ wa, bɔ hlɔ̌nhlɔ́n tɔn fɔ́n ɔ́, é nɔ́ ɖo jijɛ jí wɛ.

⁵ Hwenu e un ɖo tamɛ lin dó nǔ e un mɔ ɔ́ wú wɛ ɔ́, gbǎgbá ɖokpó tɔ́n sín gbadahwe jí bó jǎwe. É ɖo wezun jí gbɔn ayǐkúngban ɔ́ jí, afɔ tɔn ka ɖo kɔ́ mɛ jɛ wɛ ǎ. Zo ɖaxó ɖokpó ɖo gbǎgbá ɔ́ sín nukún lɛ́ɛ tɛ́ntin.

⁶ É sɛ yá agbozowenɔ e un mɔ ɖo tɔ ɔ́ nukɔn ɔ́, lobo kplɔ́ dó e kpó hlɔ̌nhlɔ́n tɔn bǐ kpó.

⁷ É zɔn agbo ɔ́ jí, bó xo e káká bó lɔ́ zo tɔn we lɛ́ɛ. Gǎn ɖé sɔ́ kpo ɖo agbo ɔ́ wu ǎ, bɔ é zin i dɛ, bó sɔ́ afɔ dó xwe e ná. Mɛ ɖé sixú yí agbo ɔ́ sín así tɔn ǎ.

⁸ Gbǎgbá ɔ́, hlɔ̌nhlɔ́n tɔn ɖo jijɛ jí wɛ. Ée hlɔ̌nhlɔ́n tɔn wá syɛ́n bǐ ɔ́, zo tɔn ɖaxó ɔ́ nɔ mɔ̌ bó wɛ́n, bɔ zo ɖagbe ɖagbe ɛnɛ wú ɖó tɛn tɔn mɛ, lobo kpan nukɔn wɛ̌kɛ́zo ɛnɛ lɛ́ɛ.

⁹ Zo yɔ̌yɔ́ ɖokpó wú ɖo zo kpɛví e ɖo zo ɛnɛ lɛ́ɛ mɛ ɔ́ wú. Zo ɔ́ ɖo ga ɖi wɛ tunta tofɔligbé zǎnzǎnhwe jí, kpó to e nyɔ́ ɖɛkpɛ hú to lɛ́ɛ bǐ ɔ́ kpó.

¹⁰ Zo ɔ́ ɖi ga káká bó yi sɔ́ nǔ e ɖo gbɛ ɖo sɛ́xwé lɛ́ɛ bǐ, bɔ nǔ e ɖo dɔ̌n lɛ́ɛ akpá ɖě, kpó sunví lɛ́ɛ kpó wá jɛ kɔ́ mɛ, lobɔ é sɔ́ afɔ dó gbídí ná.

¹¹ Zo ɔ́ zɔn mɔ̌ káká yi sɔ́ gǎn e kpa acɛ dó nǔɖogbɛ e ɖo sɛ́xwé lɛ́ɛ nu é, lobo ɖó vɔ̌ e è nɔ sá n'i ayǐhɔ́ngbe ayǐhɔ́ngbe lɛ́ɛ é te, lobo lɛ́ ɖu su nú fí e goxɔ tɔn ɖe é.

¹² È jǒ nǔ e ɖo gbɛ ɖo sɛ́xwé lɛ́ɛ n'i, bó lɛ́ jó vɔ̌ e è nɔ sá ayǐhɔ́ngbe ayǐhɔ́ngbe ɔ́ dó n'i ɖó hwɛ e é hu ɔ́ wú. Zo ɔ́ zé sinsɛn ɖagbe ɔ́ xo kɔ́. É sɔ́ nǔ ɖěbǔ ɔ́, é nɔ́ kpé wú bó nɔ́ wa.

¹³ “Un se wɛnsagun ɖokpó sín gbe. Wɛnsagun ɖěvo ka kanbyɔ́ wɛnsagun e sín gbe un se ɔ́ ɖɔ: ‘Hwetɛ́nu nǔ e ɖo jijɛ wɛ lɛ́ɛ ná fó bɔ è ɖɔ ɖo nǔmimɔ ɔ́ mɛ? Káká jɛ hwetɛ́nu wɛ vɔ̌sísá ayǐhɔ́ngbe ayǐhɔ́ngbe tɔn ɔ́ ná nɔ te yi ɖó? Nǔmasɔgbe e ɖo nǔ bǐ gba wɛ ɔ́, káká jɛ hwetɛ́nu é ná gba nǔ yi ɖó te ɖó? Goxɔ ɔ́ kpó nǔɖogbɛ e ɖo sɛ́xwé lɛ́ɛ kpó ɔ́, káká jɛ hwetɛ́nu wɛ yě ná nyí afɔsúnsúnnú yi ɖó?’

¹⁴ Wɛnsagun nukɔntɔn ɔ́ yí gbe n'i ɖɔ: ‘Kéze afatɔ́n kantɔn gban (1.150) kpó zǎn afatɔ́n kantɔn gban (1.150) kpó ná to wá yi hwɛ̌. Énɛ́ ɔ́ gúdo ɔ́, è nǎ lɛ́ slá wǔ nú goxɔ ɔ́.’ ”

Dlɔ̌ wegɔ́ ɔ́ sín tínmɛ

¹⁵ “Hwenu e nyɛ Daniyɛ́li ɖo nǔ e mɔ wɛ un ɖe ɔ́ kpɔ́n wɛ, bó ɖo nǔ e ɖɔ wɛ é ɖe ɔ́ ba ná tunwun wɛ ɔ́, un mɔ nǔ gbɛtɔ́ ɖɔhun ɖé wá nɔ te ɖo nukɔn ce,

¹⁶ bɔ mɛ ɖokpó sú xó ɖo Wuláyi tɔ ɔ́ tɛ́ntin, bó ɖɔ n'i ɖɔ: ‘Gabliyɛ́li, tín nǔ e mɔ wɛ nya énɛ́ ɔ́ ɖe ɔ́ mɛ n'i.’

¹⁷ Gabliyɛ́li jǎwe fí e un ɖe ɔ́, bɔ xɛsi jɛ jǐ ce, bɔ un xwe agbɔ̌nnusú do. Lo ɔ́, é ɖɔ nú mì ɖɔ: ‘Daniyɛ́li, ɖǒ tó; hwɛ ɔ́ gbɛtɔ́ wɛ a nyǐ, nǔ e mɔ wɛ a ka ɖe ɔ́, gbɛvivɔ wú ɖɔ xó dó wɛ é ɖe.’

¹⁸ Hwenu e é ɖo xó énɛ́ ɖɔ wɛ ɔ́, un kpo ɖo agbɔ̌nnusú xwe do, bó sɔ́ tunwun gbɛ e mɛ un ɖe ɔ́ ǎ. Énɛ́ ɔ́, é hɛn mì bó fɔ́n mì sí te,

¹⁹ bó ɖɔ nú mì ɖɔ: ‘Un ná ɖɔ nǔ e ná jɛ hwenu e è ɖǒ, bɔ xomɛsin Mawu tɔn ná fó ɔ́ nú we.

²⁰ Agbo e ɖó zo we bɔ a mɔ ɔ́, ɖo axɔ́súɖuto Mɛdi tɔn kpó Pɛ́si tɔn kpó sín xlɛ́ nyí wɛ.

²¹ Gbǎgbá ɔ́ nyí axɔ́súɖuto Glɛ̌si tɔn sín xlɛ́. Zo ɖaxó e ɖo nukún tɔn lɛ́ɛ tɛ́ntin ɔ́ nyí axɔ́súɖuto nukɔntɔn ɔ́ sín xlɛ́ .

²² Hwenu e zo ɖaxó énɛ́ ɔ́ lɔ́ ɔ́, zo ɖěvo ɛnɛ wú ɖó tɛn tɔn mɛ. Énɛ́ xlɛ́ ɖɔ axɔ́súɖuto ɛnɛ ná jɛ axɔ́súɖuto e wá yi ɔ́ sín tɛnmɛ. Amɔ̌, axɔ́súɖuto énɛ́ lɛ́ɛ ná ɖó hlɔ̌nhlɔ́n sɔ ée yě wá ɖyɔ́ é ǎ.

²³ Ée yě ná kpa acɛ yětɔn fó, bɔ mɛ lɛ́ɛ ná hu hwɛ káká bɔ é ná tlɛ́n asá ɔ́, axɔ́sú goyítɔ́ mɛblɛ́ɖutɔ́ heelú ɖokpó ná wá yí to ɔ́.

²⁴ Acɛkpikpa tɔn ná nɔ́ ɖo syɛ́nsyɛ́n d'é jí wɛ, có é ka nyí é ɖésú wɛ ɖo hlɔ̌nhlɔ́n ɖé dó wɛ ǎ. É ná dɔn nǔ gěgé gúdú. É sí te dó nǔɖé wú ɔ́, é ná nɔ́ kpé wú. É ná sú mɛ e ɖó acɛ lɛ́ɛ sín kún dó. É ná sú togun mímɛ́ ɔ́ lɔ sín kún dó.

²⁵ É ná zé bǐbí tɔn dó táfú mɛ ɖé lɛ́ɛ, bó ná zé goyíyí tɔn dó sú mɛ e vɛdó ɖɔ émí ko mɔ agbɔ̌n lɛ́ɛ sín kún dó, bó ná lɛ́ sí te dó axɔ́sú axɔ́sú lɛ́ɛ tɔn ɔ́ jí. Hwenɛ́nu ɔ́, mɛ ɖěbǔ ná ɖó alɔ wǔ tɔn ǎ, bɔ é ná nɔ mɔ̌ bó gba hánnyá.

²⁶ Tínmɛ e jɛ xá vɔ̌sísá zǎnzǎn gbada tɔn e a mɔ lɛ́ɛ é nɛ́. Amɔ̌, ma ɖɔ nǔ énɛ́ e a mɔ ɔ́ nú mɛɖé ó, ɖó hwenu e é ná jɛ dó ɔ́ kpo ɖaxó.’

²⁷ Énɛ́ ɔ́ gúdo ɔ́, nyɛ Daniyɛ́li ɔ́, un ba hlɔ̌nhlɔ́n kpo, lobo jɛ azɔn nú azǎn. Ée azɔn gbɔ nú mì ɔ́, un jɛ azɔ̌ e un nɔ wa nú axɔ́sú ɔ́ lɛ́ɛ wa jí. Nǔ e un mɔ ɔ́ kpó ɖo kpíkpácá mì wɛ, ɖó un ko mɔ nukúnnú jɛ mɛ ǎ.”