Bǐbɛ́mɛ 50 - MAWUXÓWÉMA

¹ Bɔ Jozɛ́fu zɔn tɔ́ tɔn sín cyɔ jí kpó avǐ kpó, bó ja ɖasin kɔn nyi nukún mɛ n'i, bó kí si n'i.

² É ɖe gbe nú mɛsɛntɔ́ tɔn e nyí dotóogán lɛ́ɛ ɖɔ yě ní sá ami nú tɔ́ émítɔn, bɔ yě sá ami nú Jakɔ́bu.

³ Yě sá ami nú cyɔ ɔ́ xɔ azǎn kanɖé (40). Ejípunu lɛ́ɛ ká nɔ aluwɛ mɛ xɔ azǎn kanɖé gban (70).

⁴ Ée azǎn nabí e è ɖǒ ná nɔ aluwɛ mɛ ná ɔ́ vɔ ɔ́, Jozɛ́fu ɖɔ nú azɔ̌watɔ́ e ɖo hɔnmɛ lɛ́ɛ ɖɔ: “Ényí mi yí wǎn nú mì hǔn, mi yi ɖɔ xó e un ná ɖɔ nú mi din lɛ́ɛ nú axɔ́sú ɔ́ nú mì.

⁵ Mi ná ɖɔ n'i ɖɔ: ‘Cóbónú tɔ́ ce ná kú ɔ́, é kó ɖɔ nú mì ɖɔ nyɛ ní xwlé nǔ ɖɔ nyɛ ná yi ɖi émí ɖó yɔdo émítɔn e émí kó kun ɖ'ayǐ ɖo Kanáa ɔ́ mɛ. Hǔn un jló ná yi Kanáa, bó ná yi ɖi tɔ́ ce. Un ɖi i fó ɔ́, un ná lɛ́ kɔ wá.’ ”

⁶ Ée axɔ́sú ɔ́ se mɔ̌ ɔ́, é ná gbe Jozɛ́fu ɖɔ: “Bo yi ɖi tɔ́ towe lě e é ɖɔ bɔ a xwlé nǔ d'é jí n'i gbɔn é.”

⁷ Ée axɔ́sú ɔ́ ɖɔ mɔ̌ ɔ́, Jozɛ́fu ɖidó Kanáa, bó ná yi ɖi tɔ́ tɔn. Axɔ́sú ɔ́ sín azɔ̌watɔ́ lɛ́ɛ bǐ, mɛxó e ɖo hɔnmɛ lɛ́ɛ bǐ, kpó tomɛxó Ejípu tɔn lɛ́ɛ bǐ kpó wɛ kplá Jozɛ́fu yi.

⁸ Jozɛ́fu sín mɛ lɛ́ɛ bǐ: nɔví tɔn súnnu lɛ́ɛ kpódó tɔ́ tɔn sín mɛ e kpo lɛ́ɛ bǐ kpó xwedó e. Yɔkpɔ́vú lɛ́ɛ kpó kanlin lɛ́ɛ kpó kɛ́ɖɛ́ wɛ è jǒ dó nyi Gocɛ́ni.

⁹ Jozɛ́fu lɛ́ hɛn kɛkɛ́ví lɛ́ɛ kpó sɔ́xátɔ́ lɛ́ɛ kpó. Mɛ e kplá ɛ lɛ́ɛ sukpɔ́ ɖésú.

¹⁰ Ée yě jɛ Golɛnu-Atadi ɖo Judɛ́ɛn tɔ ɔ́ gúdo ɔ́, yě wa cyɔnú ɖo fínɛ́ bɔ é fɛ́ wǔ titewungbe. Énɛ́ ɔ́, Jozɛ́fu nɔ aluwɛ mɛ xɔ azǎn tɛ́nwe nú tɔ́ tɔn.

¹¹ Kanáanu e ɖo gbě ɔ́ jí fínɛ́ lɛ́ɛ sín nukún mɛ wɛ è blǒ nǔwiwa lɛ́ɛ ɖe, ɖo Golɛnu-Atadi fínɛ́. Énɛ́ ɔ́, yě ɖɔ: “Aluwɛ ɖaxó ɖé mɛ wɛ Ejípunu lɛ́ɛ ɖe mɛ!” Nǔ e wú è nɔ ylɔ́ tɛn énɛ́ ɔ́ e ɖo Judɛ́ɛn tɔ ɔ́ gúdo ɔ́ ɖɔ Avɛ́li-Mislayimu ɔ́ nɛ́; tínmɛ tɔn wɛ nyí “Aluwɛ Ejípu tɔn”.

¹² Énɛ́ ɔ́ gúdo ɔ́, Jakɔ́bu vǐ lɛ́ɛ wa nǔ e tɔ́ yětɔn ɖɔ nú yě ɔ́.

¹³ Yě zé cyɔ tɔn yi Kanáa, bó ɖi dó yɔdo e ɖo sóxo mɛ ɖo Makipela sín gle mɛ ɔ́ mɛ, ɖo Mamulée kpá. Ablaxámu wɛ ka ko xɔ fí énɛ́ ɔ́ ɖo Eflɔ́ni, Hitíti ɔ́ sí, bó dó ɖó kúxwé tɔn.

¹⁴ Ée Jozɛ́fu ɖi tɔ́ tɔn fó ɔ́, é lɛ́ kɔ yi Ejípu kpó nɔví tɔn lɛ́ɛ kpó, kpódó mɛ e kplá ɛ yi tɔ́ tɔn ɖi gbé lɛ́ɛ bǐ kpó.

Nǔ e jɛ ɖo Jakɔ́bu sín kú gúdo é

¹⁵ Ée Jozɛ́fu sín nɔví lɛ́ɛ mɔ ɖɔ tɔ́ yětɔn kó kú ɔ́, yě jɛ ɖiɖɔ nú yěɖée jí ɖɔ: “Din e tɔ́ mǐtɔn kú ɔ́, Jozɛ́fu ná húzú kpan nukɔn mǐ, bó sú nǔ nyanya e mǐ wa n'i lɛ́ɛ bǐ sín axɔ́ mǐ.”

¹⁶ Énɛ́ ɔ́, yě ɖɔ sɛ́ dó Jozɛ́fu ɖɔ: “Cóbónú tɔ́ towe ná kú ɔ́, é ɖɔ

¹⁷ mǐ ní ɖɔ nú we ɖɔ: ‘Kɛnklɛ́n bó sɔ́ nǔ e nɔví towe lɛ́ɛ wa xá we lɛ́ɛ, kpó hwɛ e yě hu dó we lɛ́ɛ kpó kɛ yě. Sɔ́ nǔ nyanya e yě wa nú we ɔ́ bǐ kɛ yě.’ Hǔn bo kɛnklɛ́n sɔ́ hwɛ énɛ́ ɔ́ e mǐ hu ɔ́ kɛ mǐ, ɖó Mawu ɖokpó ɔ́ wɛ mǐ kpó tɔ́ towe kpó nɔ́ sɛn.” Hwenu e è ɖo xó énɛ́ lɛ́ɛ ɖɔ nú Jozɛ́fu wɛ ɔ́, é wlí avǐ.

¹⁸ Nɔví tɔn lɛ́ɛ ɖésúnɔ wá gɔ̌n tɔn, bó jɛ kpo asá tɔn mɛ, bó ɖɔ: “Mɛsɛntɔ́ towe wɛ mǐ nyǐ.”

¹⁹ Jozɛ́fu ka ɖɔ nú yě ɖɔ: “Mi ma ɖi xɛsi ó, ɖó un sixú sɔ́ nyɛɖée ɖó Mawu tɛnmɛ ǎ.

²⁰ Nǔ nyanya wɛ mi lin ná wa dó wǔtu ce, Mawu ká zé dó húzú nǔ ɖagbe ná, bónú nǔ e ɖo jijɛ wɛ égbé ɔ́ ná dó sixú jɛ, bónú mɛ gěgé ná gán.

²¹ Hǔn xɛsi ní má ɖi mi ó; un ná kpé nukún dó mi kpó mɛ mitɔn lɛ́ɛ kpó wú.” Énɛ́ ɔ́, Jozɛ́fu ɖɔ xó nú yě kpó wǎn yíyí kpó bó dó ná akɔ́nkpinkpan yě.

Jozɛ́fu kú

²² Jozɛ́fu nɔ Ejípu, é kpódó tɔ́ tɔn sín hɛ̌nnu ɔ́ kpó. É nɔ gbɛ xɔ xwe kanwe gban (110).

²³ Jozɛ́fu mɔ vǐ tɔn Eflayímu sín vǐ lɛ́ɛ, bó mɔ vǐvú tɔn lɛ́ɛ. É sɔ́ vǐvú tɔn Makíi, Manasée ví ɔ́ dó ɖó vǐ.

²⁴ Jozɛ́fu ɖɔ nú nɔví tɔn lɛ́ɛ gbe ɖokpó ɖɔ: “Un ná kú, amɔ̌, Mawu ná wá gɔ́ alɔ nú mi dandan. É ná kplá mi sín Ejípu fí yi to e sín akpá é kó dó nú Ablaxámu, Izáki kpó Jakɔ́bu kpó ɔ́ mɛ.”

²⁵ Jozɛ́fu ɖɔ nú nɔví tɔn lɛ́ɛ ɖɔ: “Mi xwlé nǔ nú mì ɖɔ hwenu e Mawu ná kplá mi ɔ́, mi ná bɛ́ xú ce lɛ́ɛ sín fí hɛn yi.”

²⁶ Xwe kanwe gban (110) wɛ Jozɛ́fu ɖó bó kú. È sá ami nú cyɔ tɔn bó dó gbǎ ɖo Ejípu.