Bǐbɛ́mɛ 5 - MAWUXÓWÉMA

Kúnkan Adámu tɔn lɛ́ɛ sín nyǐkɔ

¹ Kúnkan Adámu tɔn lɛ́ɛ sín nyǐkɔ ɖíe: Gbe e gbe Mawu ɖǒ Adámu ɔ́, é bló e bɔ é cí é ɖésúnɔ ɖɔhun.

² É ɖó súnnu ɖokpó nyɔ̌nu ɖokpó, bó xo ɖɛ dó yě jí. Hwenu e é ɖó yě ɔ́, é ɖó nyǐkɔ nú yě ɖɔ Adámu; Adámu sín tínmɛ wɛ nyí gbɛtɔ́.

³ Ée Adámu ɖó xwe kantɔn wǒ (130) ɔ́, é ji vǐ súnnu ɖokpó, bɔ vǐ ɔ́ cí é ɖɔhun; akpajlɛ́ tɔn wɛ é nyí. É ɖó nyǐkɔ n'i ɖɔ Sɛ́ti.

⁴ Ée Adámu ji Sɛ́ti gúdo ɔ́, é dɔ́ ji xɔ xwe afɛnɛ (800). É lɛ́ ji vǐ súnnu, bó ji nyɔ̌nu.

⁵ Xwe afɛnɛ kantɔn wǒ (930) wɛ Adámu ɖó bó kú.

⁶ Ée Sɛ́ti ɖó xwe kanwe koatɔ́n (105) ɔ́, é ji Enɔci.

⁷ Ée Sɛ́ti ji Enɔci gúdo ɔ́, é lɛ́ nɔ gbɛ xɔ xwe afɛnɛ tɛ́nwe (807). É lɛ́ ji vǐ súnnu bó ji nyɔ̌nu.

⁸ Xwe afɛnɛ kanwe gban-nukún-we (912) wɛ Sɛ́ti ɖó bó kú.

⁹ Ée Enɔci ɖó xwe kanwe wǒ (90) ɔ́, é ji Kenáni.

¹⁰ Ée Enɔci ji Kenáni gúdo ɔ́, é lɛ́ nɔ gbɛ xɔ xwe afɛnɛ afɔtɔn (815); é lɛ́ ji vǐ súnnu bó ji nyɔ̌nu.

¹¹ Xwe afɛnɛ kanwe koatɔ́n (905) wɛ Enɔci ɖó bó kú.

¹² Ée Kenáni ɖó xwe kanɖé gban (70) ɔ́, é ji Maxalalɛ́li.

¹³ Ée é ji Maxalalɛ́li gúdo ɔ́, é lɛ́ nɔ gbɛ xɔ xwe afɛnɛ kanɖé (840). É lɛ́ ji vǐ súnnu bó ji nyɔ̌nu.

¹⁴ Xwe afɛnɛ kanwe gban (910) wɛ Kenáni ɖó bó kú.

¹⁵ Ée Maxalalɛ́li ɖó xwe kanɖé koatɔ́n (65) ɔ́, é ji Yɛlɛ́di.

¹⁶ Ée Maxalalɛ́li ji Yɛlɛ́di gúdo ɔ́, é lɛ́ nɔ gbɛ xɔ xwe afɛnɛ gban (830). É lɛ́ ji vǐ súnnu bó ji nyɔ̌nu.

¹⁷ Xwe afɛnɛ kanwe afɔtɔn (895) wɛ Maxalalɛ́li ɖó bó kú.

¹⁸ Ée Yɛlɛ́di ɖó xwe kɛnnɛ-nukún-we (162) ɔ́, é ji Henɔci.

¹⁹ Ée é ji Henɔci gúdo ɔ́, é lɛ́ nɔ gbɛ xɔ xwe afɛnɛ (800). É lɛ́ ji vǐ súnnu bó ji nyɔ̌nu.

²⁰ Xwe afɛnɛ kɛnnɛ-nukún-we (962) wɛ Yɛlɛ́di ɖó bó kú.

²¹ Ée Henɔci ɖó xwe kanɖé koatɔ́n (65) ɔ́, é ji Mɛtucɛláxi.

²² Ée é ji Mɛtucɛláxi gúdo ɔ́, é nɔ gbɛ xɔ xwe afɔɖé kanwe ko (300). É nɔ́ yi xá Mawu. É lɛ́ ji vǐ súnnu bó ji nyɔ̌nu.

²³ Xwe afɔɖé kɛnnɛ atɔ́ɔ́n (365) wɛ Henɔci nɔ gbɛ xɔ.

²⁴ Henɔci nɔ yi xá Mawu. Mɛɖé ká sɔ́ mɔ ɛ ǎ, ɖó Mawu sɔ́ ɛ yi.

²⁵ Ée Mɛtucɛláxi ɖó xwe kɛnnɛ koatɔ́n-nukún-we (187) ɔ́, é ji Lamɛki.

²⁶ Ée é ji Lamɛki gúdo ɔ́, é lɛ́ nɔ gbɛ xɔ xwe nǔwɔntɔn kɛnnɛ ko-nukún-we (782). É lɛ́ ji vǐ súnnu bó ji nyɔ̌nu.

²⁷ Xwe afɛnɛ kɛnnɛ tɛ́nnɛ (969) wɛ Mɛtucɛláxi ɖó bó kú.

²⁸ Ée Lamɛki ɖó xwe kɛnnɛ ko-nukún-we (182) ɔ́, é ji vǐ súnnu ɖokpó.

²⁹ É ɖó nyǐkɔ nú vǐ ɔ́ ɖɔ Nɔwée, ɖó é ɖo ɖiɖɔ wɛ ɖɔ: Vǐ élɔ́ ná ɖe mǐ sín wǔvɛ́ e mɔ wɛ mǐ ɖe ɖo azɔ̌ syɛ́nsyɛ́n lɛ́ɛ mɛ lɛ́ɛ mɛ; wǔvɛ́ e mɔ wɛ mǐ ɖe ɖo ayǐkúngban e Mawu Mavɔmavɔ dó nu ɔ́ jí é, bó ná ná vivo mǐ.

³⁰ Ée Lamɛki ji Nɔwée gúdo ɔ́, é lɛ́ nɔ gbɛ xɔ xwe afɔwe kɛnnɛ gbantɔ́n (595). É lɛ́ ji vǐ súnnu bó ji nyɔ̌nu.

³¹ Xwe nǔwɔntɔn kɛnnɛ afɔtɔn-nukún-we (777) wɛ Lamɛki ɖó bó kú.

³² Ée Nɔwée ɖó xwe afɔwe kanwe ko (500) ɔ́, é ji Sɛ́mu, bó ji Cámu, bó ji Jafɛ́ti.