Bǐbɛ́mɛ 48 - MAWUXÓWÉMA

Jakɔ́bu xo ɖɛ dó Jozɛ́fu ví lɛ́ɛ jí

¹ Ée azǎn ɖé ná jɛ ɔ́, è wǎ ɖɔ nú Jozɛ́fu ɖɔ tɔ́ tɔn ɖo azɔn jɛ wɛ. Ée é se mɔ̌ ɔ́, é kplá vǐ tɔn we lɛ́ɛ, Manasée kpó Eflayímu kpó, bó ɖidó tɔ́ tɔn gɔ́n.

² Jakɔ́bu se ɖɔ vǐ tɔn Jozɛ́fu ɔ́ jǎwe gɔ̌n tɔn. Ée é se mɔ̌ ɔ́, é dó gǎn, bó fɔ́n jínjɔ́n ayǐ zan tɔn jí.

³ Ée Jozɛ́fu wá ɔ́, Jakɔ́bu ɖɔ n'i ɖɔ: “Mawu Nǔbǐwúkpétɔ́ ɔ́ tɔ́n dó jǐ ce ɖo Lǔzi, ɖo Kanáa tomɛ, bó xo ɖɛ dó jǐ ce,

⁴ bó ɖɔ nú mì ɖɔ: ‘Đǒtó mì! Un ná bló bɔ a nǎ ji, a nǎ gba kún; un ná zé we dó bló togun gěgé. Un ná zé to élɔ́ ná kúnkan towe lɛ́ɛ, bɔ é ná nyí yětɔn káká sɔ́yi.’ ”

⁵ Jakɔ́bu lɛ́ ɖɔ nú Jozɛ́fu ɖɔ: “Din ɔ́, vǐ súnnu we e a ko ji ɖo Ejípu fí cóbɔ un wá gɔ̌n towe lɛ́ɛ ɔ́, vǐ ce lɛ́ɛ wɛ yě nyí, Hwlibɛ́ni kpó Sinmɛnyɔ́ɔ kpó ɖɔhun.

⁶ Amɔ̌, nú a wǎ ji vǐ ɖěvo dó yědɛɛ lɛ́ɛ gúdo ɔ́, yě ná nyí towe. Fofó yětɔn lɛ́ɛ sín ayǐkúngban ɔ́ mɛ wɛ è nǎ má gǔ yětɔn nú yě ɖe.

⁷ Hwenu e un gosín Padani ɔ́, nɔ towe Hlacɛ́li kú ɖo nukún ce mɛ ɖo alixo, ɖo malín málín mɛ dó Efláta, ɖo Kanáa tomɛ, bɔ un ɖi i ɖó fínɛ́, ɖo Efláta e è nɔ lɛ́ ylɔ́ ɖɔ Bɛteleyɛ́mu ɔ́ sín alitó.”

⁸ Hwenɛ́nu ɔ́, Jakɔ́bu mɔ Jozɛ́fu ví lɛ́ɛ, bó kanbyɔ́ ɖɔ: “Mɛ̌ ká nyí mɛ élɔ́ lɛ́ɛ?”

⁹ Bɔ Jozɛ́fu yí gbe nú tɔ́ ɔ́ ɖɔ: “Vǐ e Mawu ná mì ɖo fí lɛ́ɛ wɛ.” Bɔ Jakɔ́bu ɖɔ: “Kɛnklɛ́n, kplá yě nú mì, nú má xo ɖɛ dó yě jí.”

¹⁰ Jakɔ́bu sín nukún ɖo te, é ká sɔ́ ɖo nǔ mɔ wɛ ǎ, ɖó é kó kpo. Jozɛ́fu ka kplá vǐ lɛ́ɛ n'i, bɔ é kí si nú yě, bó kplá así kɔ nú yě.

¹¹ Jakɔ́bu ɖɔ nú Jozɛ́fu ɖɔ: “Un sɔ́ lɛ́n ɖɔ un ná lɛ́ wá mɔ nukún towe mɛ ǎ; éɖíe Mawu ká bló bɔ é sɔ́ nyí hwi kɛ́ɖɛ́ wɛ un wá mɔ ǎ, un lɛ́ mɔ vǐ towe.”

¹² Ée Jakɔ́bu ɖɔ mɔ̌ ɔ́, Jozɛ́fu ɖe vǐ lɛ́ɛ sín akɔn n'i, bó xwe agbɔ̌nnusú do ɖo nukɔn tɔn.

¹³ Énɛ́ ɔ́ gúdo ɔ́, Jozɛ́fu hɛn vǐ tɔn we lɛ́ɛ sín alɔ: é sɔ́ alɔ tɔn ɖisí ɔ́ dó hɛn Eflayímu bó dɔn ɛ ɖó amyɔxwé nú Jakɔ́bu, bó sɔ́ alɔ tɔn amyɔ ɔ́ dó hɛn Manasée, bó dɔn ɛ ɖó ɖisíxwé nú Jakɔ́bu, bó dɔn yě sɛkpɔ́ tɔ́ tɔn.

¹⁴ Jakɔ́bu ka zé alɔ ɖě gbɔn ɖě jí, bó sɔ́ alɔ tɔn ɖisí ɔ́ ɖó ta nú Eflayímu yɔkpɔ́vú ɔ́, bó sɔ́ amyɔ ɔ́ ɖó ta nú Manasée, có Manasée wɛ nyí nukɔngbéví.

¹⁵ Jakɔ́bu xo ɖɛ dó Jozɛ́fu jí bó ɖɔ: “Mawu e nukɔn tɔ́gbó ce Ablaxámu kpó Izáki kpó zán gbɛ ɖe ɔ́, Mawu e nyí Lɛ̌ngbɔ́nyitɔ́ ce sín hwenu e un jɔ ɔ́ káká wá jɛ égbé ɔ́,

¹⁶ wɛnsagun Mawu tɔn e hwlɛ́n mì sín nǔ nyanya lɛ́ɛ bǐ mɛ ɔ́, ní xo ɖɛ dó nyaví élɔ́ lɛ́ɛ jí. Nyǐkɔ ce kpó tɔ́gbó ce Ablaxámu tɔn kpó Izáki tɔn kpó ní nɔ yě wú. Yě ní ji; yě ní gba kún ɖo ayǐkúngban jí.”

¹⁷ Ée Jakɔ́bu sɔ́ alɔ tɔn ɖisí ɔ́ ɖó ta nú Eflayímu ɔ́, é nyɔ́ Jozɛ́fu nukún mɛ ǎ. Énɛ́ ɔ́, Jozɛ́fu hɛn tɔ́ tɔn sín alɔ, bó ɖe sín Eflayímu ta, lobo jló ná zé ɖó Manasée ta.

¹⁸ Bó ɖɔ: “Mɔ̌ wɛ ǎ daá ce, ɖó mɛ élɔ́ wɛ nyí nukɔngbéví ɔ́; sɔ́ alɔ towe ɖisí ɔ́ ɖó ta n'i.”

¹⁹ Tɔ́ tɔn ká gbɛ́, bó ɖɔ: “Un tunwun mɔ̌ hǔn, vǐ ce, un tunwun ganjí; é ɖésú ná wá nyí togun ɖokpó, é ɖésú ná nyí togun ɖaxó. Amɔ̌, nɔví tɔn kpɛví ɔ́ sín togun ná hú gǎn éyɛ́ tɔn, bɔ vǐ tɔn lɛ́ɛ ná húzú akɔta wɔ̌buwɔ́bú ɖé.”

²⁰ Jakɔ́bu xo ɖɛ dó yě jí gbe énɛ́ ɔ́ gbe bó ɖɔ: “Hwi jí wɛ Izlayɛ́li ví lɛ́ɛ ná nɔ́ xo ɖɛ dó mɛ jí gbɔn, bó ná nɔ́ ɖɔ: ‘Mawu ní bló bónú a nǐ cí Eflayímu kpó Manasée kpó ɖɔhun.’ ” Lě e Jakɔ́bu sɔ́ Eflayímu ɖó nukɔn nú Manasée gbɔn é nɛ́.

²¹ Jakɔ́bu ɖɔ nú Jozɛ́fu ɖɔ: “Nyɛ ɖíe ɖo nǎ kú wɛ e; amɔ̌, Mawu ná nɔ kpɔ́ xá mi, bó ná lɛ́ kɔ nú mi yi tɔ́gbó mitɔn lɛ́ɛ sín tomɛ.

²² Sikɛ́mu to ɔ́, hwi wɛ un ná ná; nɔví towe lɛ́ɛ wɛ un ná ná ǎ. To énɛ́ ɔ́, ahwan wɛ un fun bó yí ɖo Amɔliti lɛ́ɛ sí. Un ná ná we, bɔ é ná nyí to ɖé bɔ a nǎ ɖó hú nɔví towe lɛ́ɛ.”