Bǐbɛ́mɛ 47 - MAWUXÓWÉMA

¹ Énɛ́ ɔ́, Jozɛ́fu yi axɔ́sú Ejípu tɔn ɔ́ gɔ́n, bó ɖɔ n'i ɖɔ: “Nɔví ce lɛ́ɛ kpó tɔ́ ce kpó gosín Kanáa bó wá gɔ̌n ce kpó lɛ̌ngbɔ́ yětɔn lɛ́ɛ kpó gbɔ̌ yětɔn lɛ́ɛ kpó nyibú yětɔn lɛ́ɛ kpó, kpó nǔ e yě ɖó lɛ́ɛ bǐ kpó. Gocɛ́ni wɛ yě jɛ.”

² Jozɛ́fu kplá nɔví tɔn atɔ́ɔ́n, bó zé yě xlɛ́ axɔ́sú ɔ́.

³ Axɔ́sú ɔ́ kanbyɔ́ yě ɖɔ: “Azɔ̌ tɛ́ wɛ mi nɔ wa?” Yě yí gbe n'i ɖɔ: “Mǐ mɛsɛntɔ́ towe lɛ́ɛ ɔ́, gbɔ̌ wɛ mǐ nɔ́ nyi tɔ́gbó mǐtɔn lɛ́ɛ ɖɔhun.”

⁴ Yě lɛ́ ɖɔ nú axɔ́sú ɔ́ ɖɔ: “Mǐ wá bó ná nɔ to mɛ fí ɖó nǔɖuɖu sɔ́ tíin nú mǐ mɛsɛntɔ́ towe lɛ́ɛ sín lɛ̌ngbɔ́ lɛ́ɛ ǎ, ɖó adɔ e tɔ́n ɖo Kanáa ɔ́ syɛ́n ɖésú. Kɛnklɛ́n bó ná gbe mǐ mɛsɛntɔ́ towe lɛ́ɛ, nú mǐ ná nɔ Gocɛ́ni.”

⁵ Axɔ́sú ɔ́ ɖɔ nú Jozɛ́fu ɖɔ: “Tɔ́ towe kpó nɔví towe lɛ́ɛ kpó wá gɔ̌n towe.

⁶ Ejípu to ɔ́ bǐ wɛ ɖo alɔ towe mɛ. Đǒ tɛnmɛ nú tɔ́ towe kpó nɔví towe lɛ́ɛ kpó ɖó fí e nyɔ́ hú fí bǐ ɖo to ɔ́ mɛ é. Yě ní nɔ Gocɛ́ni. Nú a mɔ mɛ e ná sixú kpé nukún dó kanlin ce lɛ́ɛ wú ɖo yě mɛ ɔ́ hǔn, sɔ́ yě ɖó kanlinhwan ce lɛ́ɛ nu.”

⁷ Jozɛ́fu kplá tɔ́ tɔn yi xlɛ́ axɔ́sú ɔ́, bɔ Jakɔ́bu xo ɖɛ dó axɔ́sú ɔ́ jí.

⁸ Axɔ́sú ɔ́ kanbyɔ́ Jakɔ́bu ɖɔ: “È sixú tunwun xwe nabí e ɖo mɛ ta é a?”

⁹ Bɔ Jakɔ́bu yí gbe n'i ɖɔ: “Un gbɔn gbě jí gbě jí káká nú xwe kantɔn wǒ (130). Un ɖó xwe nabí ɖé ǎ; nǔ e ká gbo mì ɔ́ syɛ́n. Xwe ce sɔ tɔ́gbó ce lɛ́ɛ tɔn ǎ. Gbě jí gbě jí jɛ́n yě lɔ ka gbɔn.”

¹⁰ Ée Jakɔ́bu ɖɔ mɔ̌ ɔ́, é lɛ́ xo ɖɛ dó axɔ́sú ɔ́ jí, lobo tɔ́n sín hɔn ɔ́ mɛ.

¹¹ Énɛ́ ɔ́, Jozɛ́fu ɖó tɛnmɛ nú tɔ́ tɔn kpó nɔví tɔn lɛ́ɛ kpó, bó ná ayǐkúngban yě ɖó to ɔ́ mɛ fí e nyɔ́ hú fí bǐ é, ɖo Hlamusɛ́si gbé jí, lě e axɔ́sú ɔ́ ɖɔ gbɔn é.

¹² Jozɛ́fu ná nǔɖuɖu tɔ́ tɔn kpó nɔví tɔn lɛ́ɛ kpó, kpó mɛ yětɔn lɛ́ɛ bǐ kpó. Lě e yě sukpɔ́ gbɔn ɔ́ wɛ é kpɔ́n bó dó ná nǔɖuɖu ɔ́ yě.

Lě e Jozɛ́fu wa nǔ gbɔn adɔ hwenu é

¹³ Adɔ e tɔ́n ɔ́ syɛ́n káká bɔ nǔɖuɖu wá hán ɖo to ɔ́ bǐ mɛ, bɔ mɛ e ɖo Ejípu lɛ́ɛ kpódó mɛ e ɖo Kanáa lɛ́ɛ bǐ kpó xú gǒ.

¹⁴ Jozɛ́fu kplé akwɛ́ e Ejípunu lɛ́ɛ kpó Kanáanu lɛ́ɛ kpó dó xɔ blěe ná ɔ́ bǐ, bó ɖɔ bɔ è bɛ̌ yi ɖó axɔ́sú ɔ́ sín hɔnmɛ.

¹⁵ Ée akwɛ́ ɖě má sɔ́ tíin ɖo Ejípu kpó Kanáa kpó ǎ é ɔ́, Ejípunu lɛ́ɛ bǐ wá ɖɔ nú Jozɛ́fu ɖɔ: “Nǎ nǔɖuɖu mǐ, mǐ sɔ́ ɖó akwɛ́ ɖě ǎ. A nǎ lɔn bɔ mǐ ná kú adɔ ɖo nukún towe mɛ wɛ a?”

¹⁶ Énɛ́ ɔ́, Jozɛ́fu ɖɔ nú yě ɖɔ: “Ényí mi ma ɖó akwɛ́ ǎ hǔn, mi ná kanlin mitɔn lɛ́ɛ mì nú má ná nǔɖuɖu mi ɖ'é nu.”

¹⁷ Ée nǔ ɖo mɔ̌ ɔ́, yě bɛ̌ kanlin yětɔn lɛ́ɛ wá nú Jozɛ́fu, bɔ é ná nǔɖuɖu yě ɖ'é nu. É ná nǔɖuɖu yě ɖó sɔ́ yětɔn lɛ́ɛ, gbɔ̌ yětɔn lɛ́ɛ, nyibú yětɔn lɛ́ɛ, kpódó tócí yětɔn lɛ́ɛ kpó nu. Bɔ xwe énɛ́ ɔ́ xwe ɔ́, Jozɛ́fu ná nǔɖuɖu yě ɖó kanlin yětɔn lɛ́ɛ bǐ nu.

¹⁸ Ée xwe ɔ́ fó ɔ́, yě lɛ́ wá Jozɛ́fu gɔ́n xwe e jɛ fínɛ́ ɔ́ mɛ, bó ɖɔ n'i ɖɔ: “Gǎn mǐtɔn, mǐ sixú wa yɛ nú we ǎ; akwɛ́ mǐtɔn bǐ kpó kanlin mǐtɔn lɛ́ɛ bǐ kpó kó vɔ; mǐ ɖésúnɔ lɛ́ɛ kpó ayǐkúngban mǐtɔn lɛ́ɛ kpó kɛ́ɖɛ́ wɛ kpo nú we din.

¹⁹ A nǎ lɔn bɔ mǐ ná kú adɔ ɖo nukún towe mɛ bó ná jó ayǐkúngban mǐtɔn lɛ́ɛ dó wɛ a? Xɔ mǐ kpó ayǐkúngban mǐtɔn lɛ́ɛ kpó, bó ná nǔɖuɖu mǐ. Énɛ́ ɔ́, mǐ kpó ayǐkúngban mǐtɔn lɛ́ɛ kpó ná nyí axɔ́sú ɔ́ tɔn. Nǎ nǔkún e mǐ ná dó lɛ́ɛ mǐ, bónú mǐ ná nɔ gbɛ bó sɔ́ ná jó ayǐkúngban mǐtɔn lɛ́ɛ dó ǎ.”

²⁰ Ée yě ɖɔ mɔ̌ ɔ́, Jozɛ́fu xɔ ayǐkúngban e ɖo Ejípu lɛ́ɛ bǐ nú axɔ́sú Ejípu tɔn ɔ́; ɖó Ejípunu ɖokpó ɖokpó wɛ sa gle tɔn ɖó adɔ e tɔ́n bó ɖo cɔcɔ dó nú yě wɛ ɔ́ wú. Ée nǔ nyí mɔ̌ ɔ́, to ɔ́ bǐ húzú axɔ́sú ɔ́ tɔn.

²¹ Bɔ Jozɛ́fu zé mɛ e ɖo to ɔ́ mɛ lɛ́ɛ dó húzú kannumɔ, sín fí e Ejípu bɛ́ sín ɔ́ káká yi fí e é fó dó é.

²² Amɔ̌, Jozɛ́fu xɔ hunnɔ lɛ́ɛ sín ayǐkúngban lɛ́ɛ ɖě ǎ, ɖó hunnɔ lɛ́ɛ ɖó nǔɖé bó nɔ́ yí ɖo axɔ́sú ɔ́ sí. Nǔ e wú yědɛɛ lɛ́ɛ má sa ayǐkúngban yětɔn ǎ ɔ́ nɛ́.

²³ Jozɛ́fu ɖɔ nú togun ɔ́ ɖɔ: “Din e un xɔ mi kpó ayǐkúngban mitɔn lɛ́ɛ kpó nú axɔ́sú ɔ́, mi yí nǔkún, bó yi dó ɖó gle lɛ́ɛ mɛ.

²⁴ Amɔ̌, nú mi ya jinukún lɛ́ɛ ɔ́, mi ná ná atɔ́ɔ́nvlɔ́ɖó axɔ́sú ɔ́; do ɛnɛ e kpo ɔ́ mɛ wɛ mi kpó vǐ mitɔn lɛ́ɛ kpó, mɛ e ɖo xwé mitɔn gbe lɛ́ɛ kpó ná ɖu ɖe, bɔ mi ná lɛ́ dó ɖó gle lɛ́ɛ mɛ.”

²⁵ Ée é ɖɔ mɔ̌ ɔ́, yě ɖɔ n'i ɖɔ: “A hwlɛ́n gbɛ nú mǐ! Ée a nyɔ̌ xomɛ dó mǐ wú din nɛ́ é ɔ́, mǐ yí gbe bó ná nyí axɔ́sú ɔ́ sín kannumɔ.”

²⁶ Nǔ énɛ́ e Jozɛ́fu ɖó ayǐ ɔ́ húzú sɛ́n bɔ Jozɛ́fu ɖe tɔ́n, bɔ é kpo ɖo te káká jɛ égbé: ɖo Ejípu ɔ́, atɔ́ɔ́nvlɔ́ɖó jinukún e è ya lɛ́ɛ tɔn nɔ́ nyí axɔ́sú ɔ́ tɔn. Hunnɔ lɛ́ɛ kɛ́ɖɛ́ sín ayǐkúngban wɛ ma nyí axɔ́sú ɔ́ tɔn ǎ.

Jakɔ́bu ɖɔ jlǒ tɔn gǔdo gúdo tɔn lɛ́ɛ

²⁷ Izlayɛ́li ví lɛ́ɛ nɔ Ejípu, ɖo Gocɛ́ni gbé jí. Yě ɖǒ ayǐkúngban ɖo fínɛ́; yě gba kún bó sukpɔ́ ɖésú.

²⁸ Xwe afɔtɔn nukún we wɛ Jakɔ́bu nɔ Ejípu xɔ. Xwe nabí e é nɔ gbɛ xɔ ɔ́ bǐ bló xwe kantɔn koatɔ́n-nukún-we (147).

²⁹ Ée Jakɔ́bu sín kúzán ɖo sisɛkpɔ́ wɛ ɔ́, é ylɔ́ vǐ tɔn Jozɛ́fu bó ɖɔ n'i ɖɔ: “Nú a nyɔ̌ xomɛ dó wǔ ce hǔn, ma ɖi mì ɖó Ejípu ó, bó ná ɖe xlɛ́ ɖɔ a yǐ wǎn nú mì, bó ɖo gbejí nú mì nǔgbó. Zě alɔ towe ɖó asá ce glɔ́, bó dó akpá tɔn nú mì.

³⁰ Nú un kú ɔ́, a nǎ zě cyɔ ce sín Ejípu bó yi ɖi dó tɔ́gbó ce lɛ́ɛ sín yɔdo mɛ.” Bɔ Jozɛ́fu ɖɔ n'i ɖɔ: “Un ná bló lě e a ɖɔ gbɔn ɔ́.”

³¹ Jakɔ́bu lɛ́ tɛ ɖɛ̌ jí ɖɔ: “Bó xwlé nǔ nú mì.” Bɔ Jozɛ́fu xwlé nǔ ɖɔ émí ná bló. Énɛ́ ɔ́ gúdo ɔ́, Jakɔ́bu ɖe kɔ́ ɖo zan tɔn sín taligbé.