Bǐbɛ́mɛ 40 - MAWUXÓWÉMA

¹ Ée nǔ énɛ́ lɛ́ɛ jɛ wá yi ɔ́, é wá jɛ gbe ɖokpó, bɔ axɔ́sú Ejípu tɔn ɔ́ sín azɔ̌watɔ́ ɖaxó ɖaxó we wa nǔ nyi do nú axɔ́sú ɔ́. Yě wɛ nyí mɛ e nɔ hɛn sinnuká n'i lɛ́ɛ sín gǎn, kpó mɛ e nɔ ɖa wɔ̌xúxú n'i lɛ́ɛ sín gǎn ɔ́ kpó.

² Axɔ́sú ɔ́ sin xomɛ dó yě,

³ bó bɛ́ yě yi dó sɔ́ja e nɔ cɔ́ axɔ́sú ɔ́ lɛ́ɛ sín gǎn xwé ɖo gankpá mɛ fí e è sú Jozɛ́fu dó é.

⁴ Énɛ́ ɔ́, sɔ́ja e nɔ cɔ́ axɔ́sú ɔ́ lɛ́ɛ sín gǎn zé yě ɖó Jozɛ́fu kpá, bɔ é ná nɔ́ kpé nukún dó yě wú. Yě nɔ́ gankpá mɛ fínɛ́ xɔ azǎn kpɛɖé.

Jozɛ́fu tín dlɔ̌ e gantɔ́ we lɛ́ɛ kú é mɛ

⁵ É wá jɛ zǎn mɛ gbe ɖokpó, bɔ mɛ e nɔ hɛn sinnuká nú axɔ́sú ɔ́ lɛ́ɛ sín gǎn kpó mɛ e nɔ ɖa wɔ̌xúxú n'i lɛ́ɛ sín gǎn ɔ́ kpó kú dlɔ̌ ɖo gankpá ɔ́ mɛ. Dlɔ̌ e yě mɛ ɖokpó ɖokpó kú ɔ́ ɖó tínmɛ vovo.

⁶ Jozɛ́fu wá kpɔ́n yě zǎnzǎn, bó mɔ yě ɖo aluwɛ mɛ.

⁷ É kanbyɔ́ yě ɖɔ: “Nɛ̌ ká gbɔn bɔ wǔ kú mi bǐ mɔ̌?”

⁸ Bɔ yě yí gbe n'i ɖɔ: “Dlɔ̌ ɖé wɛ mǐ kú, bɔ mǐ mɔ mɛɖé bɔ é ná tínmɛ nú mǐ ǎ.” Jozɛ́fu ka ɖɔ nú yě ɖɔ: “Mawu wɛ nɔ́ tín nǔ mɛ nú mɛ. Mi bo ɖɔ dlɔ̌ e mi kú ɔ́ nú mì.”

⁹ Ée Jozɛ́fu ɖɔ mɔ̌ ɔ́, mɛ e nɔ hɛn sinnuká nú axɔ́sú ɔ́ lɛ́ɛ sín gǎn ɔ́ ɖɔ dlɔ̌ éyɛ́ tɔn nú Jozɛ́fu. É ɖɔ: “Un kú dlɔ̌ ɖokpó, bó mɔ vǐwuntín ɖo nukɔn ce.

¹⁰ Ala atɔn wɛ vǐwuntín ɔ́ ɖó. Ée é tɔ́n kun lě tlóló ɔ́, é gba sɛ́ bó sɛ́n, bɔ sínsɛ́n tɔn lɛ́ɛ bǐ myá.

¹¹ Axɔ́sú ɔ́ sín kɔ́fu ka ɖo alɔ ce mɛ, bɔ un gbɛ vǐwun lɛ́ɛ, bó fyɔ́n yě dó kɔ́fu ɔ́ mɛ, lobo zé jó nú axɔ́sú ɔ́.”

¹² Ée é ɖɔ mɔ̌ ɔ́, Jozɛ́fu ɖɔ n'i ɖɔ: “Dlɔ̌ e a kú ɔ́, tínmɛ tɔn ɖíe: ala atɔn lɛ́ɛ ɔ́, azǎn atɔn wɛ.

¹³ É jɛ azǎn atɔn gbe ɔ́, axɔ́sú ɔ́ ná wa nǔ ɖaxó ɖé nú we; é ná lɛ́ yí we dó azɔ̌ towe xóxó ɔ́ mɛ. A nǎ lɛ́ jɛ kɔ́fu zé n'i jí, lě e a nɔ ko bló gbɔn ɖ'ayǐ é.

¹⁴ Amɔ̌, nǔ wá nyɔ́ nú we hǔn, kɛnklɛ́n bó flín mì, bó nyɔ́ xomɛ dó wǔ ce. Đɔ xó ce ɖagbe nú axɔ́sú ɔ́, bónú má tɔ́n sín gankpá mɛ fí,

¹⁵ ɖó Eblée tomɛ wɛ è kplá mì sín gǎnnugǎnnu wá fí; un ka wa nǔɖé nyi do ɖo fí cóbɔ è wlǐ mì dó gan ǎ.”

¹⁶ Ée mɛ e nɔ ɖa wɔ̌xúxú nú axɔ́sú ɔ́ lɛ́ɛ sín gǎn ɔ́ mɔ ɖɔ tínmɛ e Jozɛ́fu ná ɔ́ nyɔ́ ɔ́, é ɖɔ: “Nyi lɔmɔ̌ kú dlɔ̌, bó hɛn wɔ̌xúxú xasun atɔn ɖó ta.

¹⁷ Nǔɖuɖu tɛnmɛ tɛnmɛ e è nɔ ɖa ɖo kpó mɛ bɔ axɔ́sú ɔ́ nɔ́ yí wǎn ná tawun lɛ́ɛ wɛ gɔ́ xasun e ɖo aga ɔ́, bɔ xɛ lɛ́ɛ wá ɖo ɖuɖu wɛ ɖo xasun ɔ́ mɛ ɖo ta ce.”

¹⁸ Jozɛ́fu yí xó bó ɖɔ n'i ɖɔ: “Dlɔ̌ e a kú ɔ́, tínmɛ tɔn ɖíe: xasun atɔn lɛ́ɛ ɔ́, azǎn atɔn wɛ.

¹⁹ É jɛ azǎn atɔn gbe ɔ́, axɔ́sú ɔ́ ná wa nǔ ɖaxó ɖé nú we; nǔ e a ma ɖó nukún tɔn ǎ ɔ́, é ná wa nú we: è nǎ dó kan kɔ nú we dó atín wú, bɔ xɛ lɛ́ɛ ná ɖu lan towe.”

²⁰ Azǎn atɔngɔ́ ɔ́ gbe nǔgbó ɔ́, axɔ́sú ɔ́ ɖo jijizán tɔn sín xwe ɖu wɛ, bó ylɔ́ agɔ̌ ɖaxó ɖokpó, bó kplé azɔ̌watɔ́ tɔn lɛ́ɛ bǐ. Axɔ́sú ɔ́ ká zé mɛ e nɔ hɛn sinnuká n'i lɛ́ɛ sín gǎn ɔ́ kpó mɛ e nɔ ɖa wɔ̌xúxú n'i lɛ́ɛ sín gǎn ɔ́ kpó ɖó tɛn ɖaxó ɖaxó ɖé mɛ, ɖo azɔ̌watɔ́ tɔn lɛ́ɛ bǐ nukún mɛ.

²¹ É lɛ́ yí mɛ e nɔ hɛn sinnuká n'i lɛ́ɛ sín gǎn ɔ́, ɖó tɛn e mɛ é kó ɖe ɖ'ayǐ é, bónú é ná nɔ́ zé kɔ́fu n'i

²² Lo ɔ́, é dó kan kɔ nú mɛ e nɔ ɖa wɔ̌xúxú n'i lɛ́ɛ sín gǎn ɔ́ dó atín wú; nǔ lɛ́ɛ jɛ lě e Jozɛ́fu ko tínmɛ nú yě gbɔn é.

²³ Nǔ nyí mɔ̌, có mɛ e nɔ hɛn sinnuká nú axɔ́sú ɔ́ lɛ́ɛ sín gǎn ɔ́ wɔn Jozɛ́fu bǐ sésé.