Bǐbɛ́mɛ 37 - MAWUXÓWÉMA

¹ Jakɔ́bu nɔ Kanáa. Fínɛ́ wɛ tɔ́ tɔn kó nɔ ɖ'ayǐ.

² Jakɔ́bu ví lɛ́ɛ sín tan ɖíe: Jozɛ́fu ɔ́, nyaví dɔ̌nkpɛvú ɖé wɛ, bó ɖó xwe afɔtɔn-nukún-we. Kanlin wɛ é kpó nɔví tɔn lɛ́ɛ kpó nɔ́ nyi. Nɔví tɔn énɛ́ lɛ́ɛ ɔ́, tɔ́ tɔn sín asi Biluha kpó Zilupa kpó sín vǐ lɛ́ɛ wɛ. Jozɛ́fu nɔ wá ɖɔ xó nyanya e mɛ lɛ́ɛ nɔ ɖɔ dó yě wú ɔ́ nú tɔ́ yětɔn.

³ Izlayɛ́li ka yí wǎn nú Jozɛ́fu hú vǐ tɔn ɖě lɛ́ɛ bǐ, ɖó kpikpoxɔmɛ wɛ é ɖe bó ji i. É tɔ awu ɖaxó ɖokpó n'i, bɔ é ɖó hwɛkan gěgé.

⁴ Jozɛ́fu sín nɔví lɛ́ɛ mɔ ɖɔ tɔ́ émítɔn yí wǎn nú éyɛ́ hú émí bǐ, lobo gbɛ́ wǎn n'i káká bó sɔ́ nɔ ɖɔ xó xá ɛ kpó wǎn yíyí kpó ǎ.

⁵ Jozɛ́fu kú dlɔ̌ gbe ɖokpó, bó ɖɔ dlɔ̌ e é kú ɔ́ nú nɔví tɔn lɛ́ɛ bɔ yě lɛ́ gbɛ́ wǎn n'i d'é jí.

⁶ É ɖɔ nú yě ɖɔ: “Mi ɖótó dlɔ̌ e un kú ɔ́.

⁷ Un kú dlɔ̌ bɔ mǐ ɖo gle mɛ, bó ɖo nǔkún e mǐ ya lɛ́ɛ blá wɛ, bɔ un ná mɔ nǔɖé kpowun ɔ́, nǔkúnkɔ e nyɛ blá ɔ́ fɔ́n xwete, bɔ midɛɛ lɛ́ɛ tɔn e mi blá lɛ́ɛ wá lɛ́ lɛ̌ dó e, bó yi do n'i.”

⁸ Ée é ɖɔ mɔ̌ ɔ́, nɔví tɔn lɛ́ɛ kanbyɔ́ ɛ ɖɔ: “A nǎ wá ɖu axɔ́sú nú mǐ ɖɔ wɛ a ɖe nɛ́ hǔn?” Bɔ dlɔ̌ e é kú ɔ́ kpó xó e é nɔ́ ɖɔ lɛ́ɛ kpó zɔ́n bɔ yě lɛ́ gbɛ́ wǎn n'i d'é jí.

⁹ Jozɛ́fu lɛ́ kú dlɔ̌ ɖěvo bó lɛ́ wlí ɖɔ nú nɔví tɔn lɛ́ɛ. É ɖɔ nú yě ɖɔ: “Un lɛ́ kú dlɔ̌ ɖěvo. Un kú dlɔ̌, bɔ hwe kpó sun kpó sunví wǒ-ɖokpó kpó yi do nú mì.”

¹⁰ Ée Jozɛ́fu ɖɔ dlɔ̌ e é kú ɔ́ nú tɔ́ tɔn kpó nɔví tɔn lɛ́ɛ kpó mɔ̌ ɔ́, tɔ́ tɔn bɛ́ adǎn dó jǐ tɔn, bó kanbyɔ́ ɛ ɖɔ: “Dlɔ̌ tɛ́ nyí dlɔ̌ énɛ́ ɔ́ bɔ a kú? Nyɛ kpó nɔ towe kpó nɔví towe lɛ́ɛ kpó ɔ́, mǐ ɖó ná yi do nú we ɖɔ wɛ a ɖe nɛ́ hǔn!”

¹¹ Nɔví tɔn lɛ́ɛ nɔ́ hwan wǔ dó e. Tɔ́ tɔn ká hɛn nǔ nɛ́ ɔ́ e jɛ ɔ́ ayi mɛ.

Jozɛ́fu sín nɔví lɛ́ɛ sɔ́ ɛ sa

¹² Jozɛ́fu sín nɔví lɛ́ɛ yi tɔ́ yětɔn sín gbɔ̌ lɛ́ɛ nyi gbé ɖo Sikɛ́mu.

¹³ É wá su gbe ɖokpó, bɔ Izlayɛ́li ɖɔ nú Jozɛ́fu ɖɔ: “Nɔví towe lɛ́ɛ ɖo kanlin lɛ́ɛ nyi wɛ ɖo Sikɛ́mu. Wǎ nú má sɛ́ we dó gɔ̌n yětɔn.” Jozɛ́fu ka ɖɔ n'i ɖɔ: “É nyɔ́!”

¹⁴ Énɛ́ ɔ́, Izlayɛ́li ɖɔ n'i ɖɔ: “Yi kpɔ́n ɖɔ nɔví towe lɛ́ɛ ɖo ganjí a jí, kanlin lɛ́ɛ lɔmɔ̌ ɖo ganjí a jí. Nú a ko yi ɔ́, a nǎ wá ɖɔ lě e yě ɖe gbɔn ɔ́ nú mì.” Tɔdo Eblɔ́n tɔn ɔ́ mɛ wɛ Izlayɛ́li nɔ bó sɛ́ Jozɛ́fu dó Sikɛ́mu.

¹⁵ Ée Jozɛ́fu yi Sikɛ́mu ɔ́, é ɖo flúflú wɛ gbɔn gle ta gle ta, bɔ nya ɖé mɔ ɛ, bó kanbyɔ́ ɛ ɖɔ: “Étɛ́ ba wɛ a ɖe?”

¹⁶ Bɔ Jozɛ́fu yí gbe nú nya ɔ́ ɖɔ: “Nɔví ce lɛ́ɛ ba wɛ un ɖe; kɛnklɛ́n bó ɖɔ fí e nyi kanlin yětɔn lɛ́ɛ gbɔn wɛ yě ɖe ɔ́ nú mì.”

¹⁷ Bɔ nya ɔ́ ɖɔ: “Yě kó gosín fí, un se bɔ yě ɖo ɖiɖɔ wɛ ɖɔ émí ná yi Dotáni.” Ée Jozɛ́fu se mɔ̌ ɔ́, é dó mɔ̌ nú nɔví tɔn lɛ́ɛ, bó yi mɔ yě ɖo Dotáni.

¹⁸ Jozɛ́fu sín nɔví lɛ́ɛ mɔ ɛ jǎwe. Cóbónú é ná wá gɔ̌n yětɔn ɔ́, yě blǎ gbě ɖɔ émí ná hu i.

¹⁹ Yě jɛ ɖiɖɔ nú yěɖée jí ɖɔ: “Hǐn! Mi kpɔ́n! Dlɔ̌kútɔ́ mǐtɔn nɛ́ jǎwe nɛ́!

²⁰ Din ɔ́, mi nú mǐ ná hu i, bó ná sɔ́ cyɔ tɔn nyi dó dotɔ mɛ, bó ná yi ɖɔ adǎnkanlin wɛ wlí i ɖu. Énɛ́ ɔ́, mǐ ná kpɔ́n ɖɔ dlɔ̌ e é kú lɛ́ɛ ná ɖi nǔgbó ají.”

²¹ Hwlibɛ́ni se gbě e blá wɛ yě ɖe ɔ́, bó hwlɛ́n Jozɛ́fu ɖo yě sí. É ɖɔ nú yě ɖɔ: “Mǐ ní má hu i ó.”

²² Hwlibɛ́ni lɛ́ ɖɔ: “Mǐ ní ma kɔn hun nyi ayǐ ó. Mǐ ní sɔ́ ɛ nyi dó dotɔ e ɖo gbětótló mɛ fí ɔ́ mɛ kpowun. Mǐ ní ma hu i ó.” É ɖɔ mɔ̌ ɖó é jló ná hwlɛ́n Jozɛ́fu ɖo yě sí, bó ná lɛ́ kɔ n'i sɛ́ dó tɔ́ tɔn wú wɛ é ɖɔ mɔ̌.

²³ Ée Jozɛ́fu wá nɔví tɔn lɛ́ɛ gɔ́n lě tlóló ɔ́, yě zɔn jǐ tɔn, bó ɖe awu gaga hwɛkannɔ e ɖo kɔ n'i ɔ́,

²⁴ lobo sɔ́ ɛ nyi dó dotɔ ɔ́ mɛ; dotɔ ɔ́ ká kó mɛ bǐ; sin ɖěbǔ ɖ'é mɛ ǎ.

²⁵ Ée yě bló mɔ̌ ɔ́, yě wǎ jínjɔ́n ayǐ, bó ná ɖu nǔ. Hwenu e yě ɖo nǔ ɖu wɛ ɔ́, yě mɔ Isimayɛ́li ví lɛ́ɛ sín sɔ́ lɛ́ɛ gosín Galadi jǎwe. Isimayɛ́li ví lɛ́ɛ dó nǔsáwǔ wǎnɖagbenɔ kpó célu kpó, kpódó atínhúnhɔ́n wǎnɖagbenɔ kpó sín agban nú lǎkúnmí yětɔn lɛ́ɛ, bó xwe Ejípu.

²⁶ Énɛ́ ɔ́, Judáa ɖɔ nú nɔví tɔn lɛ́ɛ ɖɔ: “Nú mǐ hu nɔví mǐtɔn bó sɔ́ cyɔ tɔn hwlá ɔ́, le tɛ́ wɛ ɖ'é mɛ nú mǐ?

²⁷ Mi gbɔ nú mǐ ná sɔ́ ɛ sa nú Isimayɛ́li ví lɛ́ɛ. Mǐ ní má hu i ó, ɖó nɔví mǐtɔn wɛ é nyí; hun mǐtɔn wɛ.” Bɔ nɔví tɔn lɛ́ɛ yí gbe nú xó e é ɖɔ ɔ́.

²⁸ Ée ajɔ̌tɔ́ Madiáani ví lɛ́ɛ jɛ fínɛ́ ɔ́, Jozɛ́fu sín nɔví lɛ́ɛ ɖe e tɔ́n sín dotɔ ɔ́ mɛ, bó sɔ́ ɛ sa. Yě sɔ́ ɛ sa nú Isimayɛ́li ví lɛ́ɛ yí gankwɛ́ ko, bɔ yě kplá ɛ yi Ejípu.

²⁹ Hwlibɛ́ni ka ɖo fínɛ́ hwenɛ́nu ǎ. Ée é lɛ́ kɔ wá dotɔ ɔ́ kɔn ɔ́, é mɔ ɖɔ Jozɛ́fu kún sɔ́ ɖ'é mɛ ó. Ée é mɔ mɔ̌ ɔ́, wǔ kú i, bɔ é vún awu dó kɔ nú éɖée,

³⁰ bó lɛ́ kɔ yi nɔví tɔn lɛ́ɛ gɔ́n bó ɖɔ: “Jozɛ́fu sɔ́ ɖo dotɔ ɔ́ mɛ ǎ. Nɛ̌ un ná wa nǔ gbɔn din?”

³¹ Ée Hwlibɛ́ni ɖɔ mɔ̌ ɔ́, yě zě Jozɛ́fu sín awu ɖaxó ɔ́, bó hu gbǎgbá ɖokpó, lobo zé awu ɔ́ nylɔ́ dó hun tɔn mɛ.

³² Ée yě bló fó ɔ́, yě zé awu ɔ́ sɛ́ dó tɔ́ yětɔn bó ɖɔ sɛ́ dó e ɖɔ: “Nǔ e mǐ mɔ ɔ́ ɖíe mɛ! Kpɔ́n ɖɔ vǐ towe sín awu ɖaxó ɔ́ wɛ, abǐ mɛ ɖěvo tɔn wɛ a jí.”

³³ Ée Jakɔ́bu mɔ awu ɔ́, é tunwun, bó ɖɔ: “Vǐ ce sín awu ɖíe! Kanlin ɖíe wlí vǐ ce ɖu e! Kanlin ɖíe vúnvún i e!”

³⁴ Énɛ́ ɔ́, é vún awu dó kɔ nú éɖée, bó sɔ́ nǔwamɛwu dó, lobo byɔ́ vǐ tɔn sín aluwɛ mɛ, bó nɔ mɛ xɔ azǎn.

³⁵ Vǐ tɔn súnnu lɛ́ɛ kpó nyɔ̌nu lɛ́ɛ kpó bǐ wá dó gbɔ n'i, có é ká se ǎ. É nɔ́ ɖo ɖiɖɔ wɛ ɖɔ: “Un ná nɔ aluwɛ mɛ mɔ̌ káká bó ná yi mɔ vǐ ce ɖo kútomɛ.” É nɔ́ ɖo vǐ tɔn ví wɛ.

³⁶ Madiáani ví lɛ́ɛ ká kplá Jozɛ́fu yi Ejípu, bó sɔ́ ɛ sa xá nya ɖé; è nɔ ylɔ́ nya ɔ́ ɖɔ Potifáa. Potifáa ɔ́ wú wɛ Ejípu xɔ́sú ɔ́ nɔ́ ɖeji dó. É wɛ nyí sɔ́ja e nɔ cɔ́ axɔ́sú ɔ́ lɛ́ɛ sín gǎn.