Bǐbɛ́mɛ 32 - MAWUXÓWÉMA

¹ Bɔ Labáan fɔ́n zǎnzǎn tɛɛn, bó kí si nú vǐ tɔn lɛ́ɛ kpó vǐ tɔn ví lɛ́ɛ kpó, bó xo ɖɛ dó yě jí. Énɛ́ ɔ́ gúdo ɔ́, é lɛ́ kɔ yi xwé.

Jakɔ́bu jló ná yi kpé Esawu

² Jakɔ́bu wlí ali tɔn ɖidó, bɔ wɛnsagun Mawu tɔn lɛ́ɛ wá kpé e.

³ Ée é mɔ yě ɔ́, é ɖɔ: “Gɔnu Mawu tɔn wɛ.” Bó sun nyǐ fínɛ́ ɖɔ “Maxanayímu”. Maxanayímu sín tínmɛ wɛ nyí “Ahwankpá”.

⁴ É sɛ́ mɛ tɔn lɛ́ɛ dó bɔ yě jɛ nukɔn n'i, bó yi nɔví tɔn Esawu gɔ́n ɖo Seyíi, ɖo Edɔ́mu gbé jí.

⁵ Cóbónú yě ná yi ɔ́, é ɖɔ nú yě ɖɔ: “Mi ná ɖɔ nú fofó ce Esawu ɖɔ: ‘Mɛsɛntɔ́ towe Jakɔ́bu ɖɔ: Labáan gɔ́n wɛ un yi; gɔ̌n tɔn wɛ un nɔ káká jɛ din.

⁶ Un ɖó nyibú gěgé, tócí kpó gbɔ̌ kpó kpɔ́ gégé. Un ɖó mɛsɛntɔ́ súnnu kpó nyɔ̌nu kpó kpɔ́ gégé, bó sɛ́ mɛ dó ɖɔ è nǐ wá ɖɔ nú mɛɖaxó ce bónú a nǎ nyɔ́ xomɛ dó wǔ ce.’ ”

⁷ Ée mɛ lɛ́ɛ lɛ́ kɔ wá ɔ́, yě ɖɔ nú Jakɔ́bu ɖɔ: “Mǐ yi fofó towe Esawu gɔ́n, bɔ é kpó súnnu afɔwe (400) kpó jǎwe bó ná kpé we.”

⁸ Ée Jakɔ́bu se mɔ̌ ɔ́, xɛsi ɖaxó ɖé jɛ jǐ tɔn, bɔ awakanmɛ kú i, bɔ é má mɛ e kpó é kpó zɔn lɛ́ɛ, gbɔ̌ tɔn lɛ́ɛ, nyibú tɔn lɛ́ɛ, kpódó lǎkúnmí tɔn lɛ́ɛ kpó ɖó donu we,

⁹ bó ɖo ɖiɖɔ wɛ ɖɔ: “Din ɔ́, nú Esawu wá tɔ́n ahwan gbɛ̌ta ɖokpó, bó ɖu ɖo jǐ tɔn ɔ́, gbɛ̌ta ɖě ɔ́ ná hɔn.”

¹⁰ Énɛ́ ɔ́ gúdo ɔ́, Jakɔ́bu xo ɖɛ ɖɔ: “Mawu Mavɔmavɔ! Mawu tɔ́gbó ce Ablaxámu tɔn, Mawu tɔ́gbó ce Izáki tɔn, a ɖɔ nú mì ɖɔ má lɛ́ kɔ yi to ce mɛ, fí e è ji mì ɖe ɔ́, bónú émí ná wa ɖagbe nú mì!

¹¹ Mawu Mavɔmavɔ! Nyɛ mɛsɛntɔ́ towe ɔ́, un hwe dó wǔjɔmɛ towe kpó gbejíninɔ towe kpó mɛ, ɖó kpogɛ ce jɛ́n un hɛn bó dó asá Judɛ́ɛn tɔ ɔ́. Din ɔ́, un ka ɖó nǔ káká bó ɖó gbɛtɔ́ gbɛ̌ta we.

¹² Bo kɛnklɛ́n bó hwlɛ́n mì ɖo fofó ce Esawu sí. Un ɖo xɛsi ɖi wɛ ɖɔ ní má wá hu mì ó. É má wá hu nyi kpó asi ce lɛ́ɛ kpó vǐ ce lɛ́ɛ kpó ó.

¹³ Flín ɖɔ hwi ɖésú wɛ ɖɔ nú mì ɖɔ émí ná wa ɖagbe nú mì, émí ná bló bɔ vǐ ce lɛ́ɛ ná sukpɔ́ bɔ è nǎ sixú xa yě ǎ, nyɛ̌kɛ́n e ɖo xutó ɔ́ ɖɔhun.”

¹⁴ Tɛn énɛ́ ɔ́ mɛ wɛ Jakɔ́bu jló ná dɔ́. Lo ɔ́, gbe nɛ́ gbe zǎn mɛ ɔ́, é ɖe nǔ e é hɛn lɛ́ɛ ɖě, bó ná ná fofó tɔn Esawu.

¹⁵ É ɖe lɛ̌ngbɔ́ afɔɖé (200), gbǎgbá ko, gbɔ̌ afɔɖé (200), agbo ko.

¹⁶ Lǎkúnmí asi gban (30), kpódó lǎkúnmí ví e ɖo anɔ̌ nu lɛ́ɛ kpó, nyibú asi kanɖé (40), nyibúsú wǒ, tócí asi ko, tócí asú wǒ.

¹⁷ É kplé yě ɖó sonu sonu, bó bɛ́ jó nú mɛsɛntɔ́ tɔn lɛ́ɛ, bó ɖɔ nú yě ɖɔ: “Mi jɛ nukɔn nú mì; mi jó ali dó nyi kanlinhwan ɖokpó ɖokpó tɛ́ntin.”

¹⁸ É ɖɔ nú mɛsɛntɔ́ e ɖo kanlin nukɔntɔn lɛ́ɛ nu ɔ́ ɖɔ nú fofó émítɔn Esawu kpé e, bó kan mɛ e sín mɛ é nyí ɔ́ byɔ́, bó kan fí e é xwe ɔ́ byɔ́, lobo kan mɛ e tɔn kanlin lɛ́ɛ nyí ɔ́ byɔ́ ɛ hǔn,

¹⁹ ní yí gbe n'i ɖɔ: “Mɛsɛntɔ́ towe Jakɔ́bu tɔn wɛ. É wɛ sɛ́ dó hwi fofó tɔn Esawu, bó ná we. É ɖésúnɔ ká ɖo gǔdo jǎwe.”

²⁰ É ɖɔ nú mɛ wegɔ́ ɔ́ kpó mɛ atɔngɔ́ ɔ́ kpó, kpódó mɛ e xwedó kanlin lɛ́ɛ bǐ kpó ɖɔ nú yě kpé fofó émítɔn Esawu ɔ́, xó e yě ná ɖɔ n'i ɔ́ nɛ́.

²¹ Yě ná ɖɔ n'i ɖɔ: “Mɛsɛntɔ́ towe Jakɔ́bu lɔ ɖo gǔdo mǐtɔn jǎwe.” É bló mɔ̌, bó ɖo ɖiɖɔ wɛ ɖɔ: “Un ná zé nǔ e un ná ɛ ɔ́ dó fá xomɛ n'i; énɛ́ ɔ́, nyɛ ɖésúnɔ ná wá yi gɔ̌n tɔn. Afɔ nyɔ́ ɔ́, é ná hun xomɛ bó yí mì kpó xomɛ fífá kpó.”

²² Énɛ́ ɔ́, mɛsɛntɔ́ lɛ́ɛ jɛ nukɔn nú Jakɔ́bu, bó bɛ́ nǔ e é ná fofó tɔn lɛ́ɛ ɖidó. Jakɔ́bu ɖésú dɔ́ fí e yě ɖó gɔnu ɖó ɔ́ zǎn énɛ́ ɔ́ mɛ.

Jakɔ́bu dó alɔ xá Mawu

²³ Zǎn énɛ́ ɔ́ mɛ ɔ́, Jakɔ́bu sɔ́ nǔ bó kplá asi tɔn we lɛ́ɛ, mɛsɛntɔ́ tɔn nyɔ̌nu we lɛ́ɛ, kpódó vǐ tɔn wǒ-ɖokpó lɛ́ɛ kpó, bɔ yě dó asá Yabɔ́ku tɔ ɔ́ ɖo fí e é má yi do ɖe ǎ é.

²⁴ Mɛ tɔn lɛ́ɛ dó asá tɔ ɔ́ kpó nǔ e é ɖó lɛ́ɛ bǐ kpó.

²⁵ É wá kpo Jakɔ́bu ɖokpónɔ, bɔ nya ɖé wá dó alɔ xá ɛ káká jɛ ayǐtéhɔ̌nnu.

²⁶ Ée nya ɔ́ mɔ ɖɔ émí kún kpé Jakɔ́bu wú ó ɔ́, é dó nǔ alinmɛ nú Jakɔ́bu, bɔ alin tɔn sɛ.

²⁷ Nya ɔ́ ɖɔ: “Jǒ mì dó nú má yi, ɖó ayǐ ɖo hǐnhɔ́n wɛ.” Bɔ Jakɔ́bu ɖɔ n'i ɖɔ: “Nú a ma xo ɖɛ dó jǐ ce ǎ ɔ́, un ná jó we dó bɔ a nǎ yi ǎ.”

²⁸ Nya ɔ́ kanbyɔ́ Jakɔ́bu ɖɔ: “Nɛ̌ a nɔ nyí?” Bɔ é yí gbe n'i ɖɔ: “Un nɔ nyí Jakɔ́bu.”

²⁹ Nya ɔ́ ɖɔ n'i ɖɔ: “È sɔ́ ná nɔ́ ylɔ́ we ɖɔ Jakɔ́bu ǎ; bɛ́ sín din ɔ́, Izlayɛ́li wɛ è nǎ nɔ́ ylɔ́ we ɖɔ, ɖó a dǒ alɔ xá Mawu, bó dó alɔ xá gbɛtɔ́ lɛ́ɛ bó ɖu ɖ'é jí.”

³⁰ Ée nya ɔ́ ɖɔ mɔ̌ ɔ́, Jakɔ́bu ɖɔ n'i ɖɔ: “Kɛnklɛ́n bó ɖɔ nyǐkɔ towe nú mì.” Bɔ nya ɔ́ kanbyɔ́ ɛ ɖɔ: “A tunwun nyǐkɔ ce ǎ wɛ a?” Ée é ɖɔ mɔ̌ ɔ́, é xo ɖɛ dó jǐ tɔn ɖo fínɛ́.

³¹ Jakɔ́bu sun nyǐ tɛn énɛ́ ɔ́ ɖɔ “Pɛnuwɛ́li”. Pɛnuwɛ́li sín tínmɛ wɛ nyí “Mawu sín nukún mɛ”. Đó é ɖo ɖiɖɔ wɛ ɖɔ: “Un mɔ Mawu nukún mɛ, bó lɛ́ kpo ɖo gbɛ.”

³² Hwenu e hwe ɖo tíntɔ́n wɛ é wɛ Jakɔ́bu ɖo Pɛnuwɛ́li gosín wɛ; é ká nɔ́ tɔn, ɖó alin tɔn wútu.

³³ Nǔ e wú Izlayɛ́li ví lɛ́ɛ má nɔ́ ɖu lan e ɖo alingó jí ɔ́ káká jɛ égbé ǎ ɔ́ nɛ́. Đó Mawu dó nǔ Jakɔ́bu dó alin.