Bǐbɛ́mɛ 31 - MAWUXÓWÉMA

¹ Gbe ɖokpó ká wá su bɔ Jakɔ́bu se ɖɔ Labáan sín vǐ lɛ́ɛ ɖo ɖiɖɔ wɛ ɖɔ: “Jakɔ́bu bɛ́ tɔ́ mǐtɔn sín nǔ lɛ́ɛ bǐ; nǔ énɛ́ lɛ́ɛ wɛ é dó jɛ dɔkun ná sɔ mɔ̌.”

² Jakɔ́bu lɔ ka mɔ ɖɔ Labáan kún sɔ́ nɔ́ sɔ́ nukún ɖagbe dó kpɔ́n émí ná ó. Labáan sɔ́ ɖó ninɔmɛ xóxó ɔ́ dó wǔ tɔn ǎ.

³ Énɛ́ ɔ́, Mawu Mavɔmavɔ ɖɔ nú Jakɔ́bu ɖɔ: “Lɛ̌ kɔ yi mɛ towe lɛ́ɛ gɔ́n, ɖo fí e è ji we ɖe ɔ́. Un ná nɔ kpɔ́ xá we.”

⁴ Jakɔ́bu sɛ́ mɛ dó bɔ è yi ylɔ́ Hlacɛ́li kpó Lěya kpó wá n'i ɖo gle mɛ ɖo gbɔ̌ tɔn lɛ́ɛ kɔn, ɖo amagbo mɛ.

⁵ Ée yě wá ɔ́, é ɖɔ nú yě ɖɔ: “Un mɔ ɖɔ tɔ́ mitɔn kún sɔ́ nɔ́ sɔ́ nukún ɖagbe dó kpɔ́n mì ná ó. Un mɔ ɖɔ é kún sɔ́ ɖó ninɔmɛ xóxó ɔ́ dó wǔ ce ó. Amɔ̌, Mawu tɔ́ ce tɔn ká ɖo kpɔ́ xá mì.

⁶ Mi ɖésú mi tunwun ɖɔ un zán hlɔ̌nhlɔ́n ce bǐ dó wa azɔ̌ nú tɔ́ mitɔn.

⁷ Bɔ tɔ́ mitɔn hízí mì, bó húzú axɔ́ e é ná sú mì ɔ́ azɔn mɔ̌kpán. Lo ɔ́, Mawu lɔn bɔ é wa nǔ nyanya ɖé xá mì ǎ.

⁸ Nú é ɖɔ: ‘Kanlin wlanwlan lɛ́ɛ wɛ ná nyí axɔ́ e un ná sú we’ ɔ́, vǐ e kanlin lɛ́ɛ nɔ ji lɛ́ɛ bǐ nɔ́ wlán; nú é ká ɖɔ kanlin hwɛkannɔ lɛ́ɛ wɛ ná nyí axɔ́ e un ná sú we ɔ́, vǐ e kanlin lɛ́ɛ nɔ ji lɛ́ɛ bǐ nɔ́ ɖó hwɛkan.

⁹ Énɛ́ ɔ́, Mawu yǐ tɔ́ mitɔn sín kanlin lɛ́ɛ bó ná mì.

¹⁰ Hwenu e gbɔ̌ lɛ́ɛ nɔ́ dó ava dó ɔ́ su ɔ́, nǔ e un nɔ mɔ ɖo dlɔ̌ mɛ ɔ́ ɖíe: gbǎgbá e nɔ́ dó ava nú gbɔ̌ lɛ́ɛ nɔ́ nyí hwɛkannɔ; yě nɔ́ nyí wlanwlan, yě nɔ́ kpa alǎwó.

¹¹ Bɔ wɛnsagun Mawu tɔn ylɔ́ mì ɖo dlɔ̌ mɛ, bó ɖɔ: ‘Jakɔ́bu!’ Bɔ un yí gbe n'i ɖɔ: ‘Wěyi!’

¹² Bɔ é ɖɔ nú mì ɖɔ: ‘Kpɔ́n! Gbǎgbá e ɖo ava dó nú gbɔ̌ asi lɛ́ɛ wɛ ɔ́, nɔ nyí hwɛkannɔ; yě nɔ́ nyí wlanwlan, yě nɔ́ kpa alǎwó, ɖó un mɔ nǔ e wa xá we wɛ Labáan ɖe ɔ́ bǐ.

¹³ Nyɛ wɛ nyí Mawu e a kɔn ami dó awǐnnya jí ná ɖo Betɛ́li, bó d'akpá ná é. Din ɔ́, sɔ́ nǔ bó tɔ́n sín to élɔ́ mɛ, bó lɛ́ kɔ yi to e mɛ è ji we ɖe ɔ́ mɛ.’ ”

¹⁴ Hlacɛ́li kpódó Lěya kpó yí gbe n'i bó ɖɔ: “Nǔɖé sɔ́ kpo nú mǐ ɖo tɔ́ mǐtɔn xwé fí wɛ a? Mǐ sɔ́ ɖó gǔ ɖé ɖo fí bó ɖo nǎ ɖu wɛ a?

¹⁵ Jǒnɔ wɛ é nɔ sɔ́ mǐ dó mɔ ná din, ɖó è ko fɔ mǐ sa, bó kó ɖu akwɛ́ tɔn bǐ.

¹⁶ Dɔkun e Mawu yí sín tɔ́ mǐtɔn sí lɛ́ɛ bǐ wɛ nyí mǐ kpó vǐ mǐtɔn lɛ́ɛ kpó tɔn. Amɔ̌, égbé din ɔ́, blǒ nǔ e Mawu ɖɔ nú we ɔ́ bǐ.”

¹⁷ Jakɔ́bu sɔ́ nǔ bó bɛ́ vǐ tɔn lɛ́ɛ kpódó asi tɔn lɛ́ɛ kpó ɖó lǎkúnmí jí.

¹⁸ É kplá kanlin tɔn lɛ́ɛ bǐ, bó bɛ́ nǔ e é wa nǔ bó mɔ lɛ́ɛ bǐ, kanlin e é wa nǔ bó mɔ ɖo Mɛzopotamíi taligbé tɔn lɛ́ɛ bǐ, bó ɖidó tɔ́ tɔn xwé ɖo Kanáa.

¹⁹ Labáan ka ɖo fínɛ́ hwenɛ́nu ǎ; é yi fún kpa nú gbɔ̌ tɔn lɛ́ɛ gbé, bɔ vǐ tɔn Hlacɛ́li fin bǒcyɔ tɔn lɛ́ɛ .

²⁰ Jakɔ́bu gblé ɖo Labáan Alamunu ɔ́ sí, ɖó é ɖɔ xó ɖé n'i cóbó hɔn wá yi ǎ.

²¹ Énɛ́ ɔ́, Jakɔ́bu bɛ́ nǔ e é ɖó lɛ́ɛ bǐ bó hɔn. É sɔ́ nǔ bó zlɛ́ Efláti tɔ ɔ́, bó ɖidó Galadi só ɔ́ kɔn.

Labáan jɛ Jakɔ́bu gbé mɛ

²² Azǎn tɔn atɔngɔ́ ɔ́ gbe ɔ́, è yi ɖɔ nú Labáan ɖɔ Jakɔ́bu hɔn.

²³ Bɔ Labáan kplá mɛ tɔn lɛ́ɛ, bɔ yě jɛ Jakɔ́bu gbé mɛ. Yě ɖi zɔnlin xɔ azǎn tɛ́nwe, bó xwedó Jakɔ́bu wú, ɖo Galadi só ɔ́ kɔn.

²⁴ Lo ɔ́, Mawu xo dlɔ̌ Labáan Alamunu ɔ́ zǎn énɛ́ ɔ́ mɛ, bó ɖɔ n'i ɖɔ: “Cɔ́ hwiɖée dó Jakɔ́bu wú; ma kɛ nu dó wǔ tɔn vɔ́vɔ́ ó.”

²⁵ Ée Labáan xwedó Jakɔ́bu wú ɔ́, Jakɔ́bu kó dó goxɔ tɔn nyi Galadi só ɔ́ jí, bɔ Labáan kpó mɛ tɔn lɛ́ɛ kpó dó yětɔn nyi fínɛ́.

²⁶ Énɛ́ ɔ́, Labáan ylɔ́ Jakɔ́bu bó kanbyɔ́ ɛ ɖɔ: “Étɛ́ a ka wa mɔ̌ nɛ́? Étɛ́wú a kplá vǐ ce lɛ́ɛ ahwanwlíkannumɔ ɖɔhun? Nǔ énɛ́ e a blǒ ɔ́, a gblě ɖo así ce.

²⁷ Étɛ́wú wɛ a ka bɛ bó hɔn wá yi? Étɛ́wú a ma ɖɔ xó ɖé nú mì ǎ bó hɔn? Nú ɖɔ wɛ a ko ɖɔ nú mì ɔ́, un ná jó we dó bɔ a nǎ yi; awǎjijɛ mɛ wɛ a nǎ zɔn. È nǎ ɖo han ji wɛ, bó ɖo hǔn xo wɛ, bó ɖo agǐdigbo xo wɛ.

²⁸ A sɔ́ gbɔ nú má kplá así kɔ nú vǐ ce lɛ́ɛ kpó vǐ ce ví lɛ́ɛ kpó hwɛ̌ ǎ. A wa nǔ xlonɔ ɖɔhun.

²⁹ Un ɖó hlɔ̌nhlɔ́n bó ná wa nǔ nyanya xá mi, lo ɔ́, Mawu tɔ́ towe tɔn ɖɔ nú mì ɖɔ nyɛ ní cɔ́ nyɛɖée, bó má kɛ nu dó wǔ towe vɔ́vɔ́ ó.

³⁰ Din e a xweyǐgbe bǐ ɖó tɔ́ towe xwé ɖo jlǒjló we wɛ dín ɔ́, aniwú a ka fin bǒcyɔ ce lɛ́ɛ?”

³¹ Jakɔ́bu yí gbe nú Labáan ɖɔ: “Xɛsi wɛ ɖi mì, ɖó un lin ɖɔ afɔ nyɔ́ ɔ́, a nǎ yí vǐ towe lɛ́ɛ sín así ce; énɛ́ ɔ́ wú wɛ un hɔn.

³² Amɔ̌, mɛ e sí a nǎ mɔ bǒcyɔ towe lɛ́ɛ ɖe ɔ́ ná sɔ́ ta d'é mɛ. Wǎ kíjé nǔ ce lɛ́ɛ kpɔ́n ɖo mɛ mǐtɔn lɛ́ɛ nukún mɛ, nú a mɔ nǔ towe ɖě ɖ'é mɛ hǔn, sɔ́.” Jakɔ́bu ɖɔ mɔ̌ ɖó é tunwun ɖɔ Hlacɛ́li wɛ fin bǒcyɔ lɛ́ɛ ǎ.

³³ Énɛ́ ɔ́, Labáan kíjé Jakɔ́bu sín goxɔ, bó kíjé Lěya sín goxɔ, bó kíjé mɛsɛntɔ́ we lɛ́ɛ sín goxɔ, é ka mɔ nǔ ɖěbǔ ǎ. É gosín Lěya sín goxɔ mɛ, bó wá yi Hlacɛ́li tɔn mɛ lo.

³⁴ Hlacɛ́li wɛ ka fin bǒcyɔ lɛ́ɛ, bó bɛ́ dó zinkpo e nɔ nɔ lǎkúnmí jí ɔ́ glɔ́, lobo jínjɔ́n jí. Labáan kíjé goxɔ tɔn bǐ, bó mɔ nǔ ɖěbǔ ǎ.

³⁵ Hlacɛ́li ɖɔ nú tɔ́ tɔn ɖɔ: “Daá! Ma sin xomɛ ó; un jɛ gle gbe wú wɛ un mɔ we bó ma sixú sí te ǎ.” Labáan ba bǒcyɔ lɛ́ɛ káká bó ba kpo.

³⁶ Énɛ́ ɔ́, Jakɔ́bu sin xomɛ, bó jɛ jlɛ ɖɔ xá Labáan jí bó ɖɔ: “Hwɛ tɛ́ wɛ un hu? Ani wɛ un wa nyi do bɔ a jɛ gbě ce mɛ, bɔ zǐngídi ɖ'é nu sɔ mɔ̌?

³⁷ Ée a kíjé nǔ ce lɛ́ɛ bǐ ɔ́, a mɔ nǔ towe ɖě ɖ'é mɛ a? Nú a mɔ nǔ towe ɖě ɖ'é mɛ hǔn, zě xlɛ́ mɛ ce lɛ́ɛ kpódó mɛ towe lɛ́ɛ kpó, bónú yě ní gbo hwɛ nú mǐ.

³⁸ Xwe ko wɛ un bló ɖo gɔ̌n towe; gbɔ̌ towe lɛ́ɛ kpódó lɛ̌ngbɔ́ towe lɛ́ɛ kpó ɖě gblé xo kpɔ́n gbeɖé ǎ; un ka ɖu agbo towe lɛ́ɛ ɖě kpɔ́n gbeɖé ǎ.

³⁹ Nǔ wlí kanlin towe lɛ́ɛ ɖě ɖu bɔ un zé ɖukpo tɔn wá xlɛ́ we kpɔ́n gbeɖé ǎ; axɔ́ tɔn wɛ un nɔ sú we. È fin kanlin towe lɛ́ɛ ɖě dó mì kéze abǐ zǎn mɛ ɔ́, akwɛ́ tɔn wɛ a nɔ yí ɖo así ce.

⁴⁰ Kéze ɔ́, hwesivɔ́ gbe wɛ un nɔ nɔ, bɔ zǎn mɛ ɔ́, un nɔ nɔ avivɔ nu; un nɔ sixú dɔ́ amlɔ ǎ.

⁴¹ Xwe ko wɛ un bló ɖo xwé towe gbe; un wa azɔ̌ nú we xɔ xwe wǒ-ɛnɛ ɖó vǐ towe we e un da lɛ́ɛ tamɛ, bó wa azɔ̌ nú we xɔ xwe ayizɛ́n ɖó gbɔ̌ towe lɛ́ɛ tamɛ. Azɔn mɔ̌kpán wɛ a hǐzí mì bó ɖe axɔ́ e a nǎ sú mì ɔ́ kpo.

⁴² Nú é má nyí Mawu tɔ́ ce Ablaxámu tɔn, Mawu e nukɔn tɔ́ ce Izáki nɔ sísɔ́ ɖe ɔ́ wɛ ɖo gǔdo ce ǎ ɔ́, a nǎ kó nya mì din asígbá alɔgbá. É ká mɔ ya e un ji lɛ́ɛ, bó mɔ azɔ̌ e un wa ɔ́, bó gbo hwɛ nú mǐ sɔ zǎn mɛ.”

⁴³ Labáan ɖɔ nú Jakɔ́bu ɖɔ: “Nyɔ̌nuví nɛ́ lɛ́ɛ ɔ́, vǐ ce lɛ́ɛ wɛ yě nyǐ; kanlin nɛ́ lɛ́ɛ ɔ́, kanlin ce lɛ́ɛ wɛ; nǔ e mɔ wɛ a ɖe nɛ́ lɛ́ɛ bǐ wɛ nyí ce. Ani wɛ un sɔ́ sixú wa xá vǐ ce lɛ́ɛ, abǐ vǐ e yě ji lɛ́ɛ égbé din?

⁴⁴ Din ɔ́, nyɛ kpó hwi kpó ná nu alɛ, bɔ mǐ ná sɔ́ nǔɖé ɖó te bɔ é ná nɔ́ flín alɛ e mǐ nu ɔ́ mǐ.”

⁴⁵ Énɛ́ ɔ́, Jakɔ́bu sɔ́ awǐnnya ɖokpó tun te, bónú é ná nyí flǐn nú yě.

⁴⁶ Énɛ́ ɔ́ gúdo ɔ́, Jakɔ́bu ɖɔ nú mɛ tɔn lɛ́ɛ ɖɔ yě ní cyán awǐnnya, bó kplé ɖó fí ɖokpó, bɔ yě ɖu nǔ ɖo awǐnnya e yě bɛ́ kplé ɔ́ jí.

⁴⁷ Labáan sun nyǐ fínɛ́ ɖɔ “Yegáa Saxaduta”. Jakɔ́bu ɔ́ ká sun nyǐ fínɛ́ ɖɔ “Galeɛdi”.

⁴⁸ Labáan ɖɔ: “Awǐnnya nɛ́ lɛ́ɛ e è bɛ̌ kplé ɔ́ ɖe kúnnu nú hwi kpódó nyɛ kpó égbé.” Énɛ́ ɔ́ wú wɛ è sun nyǐ fí ɔ́ ɖɔ “Galeɛdi”. Galeɛdi sín tínmɛ wɛ nyí “Awǐnnya kplékplé kúnnuɖiɖe tɔn”.

⁴⁹ È nɔ lɛ́ ylɔ́ fínɛ́ ɖɔ “Misipa”; ɖó Labáan ɖɔ: “Mawu Mavɔmavɔ ní cɔ́ nyɛ kpó hwi kpó hwenu e mǐ má sɔ́ ná mɔ mǐɖée ǎ é. Misipa sín tínmɛ wɛ nyí ‘Tɛn e mɛ è nɔ cɔ́ mɛ ɖe ɔ́’.

⁵⁰ Nú a dǒ ya nú vǐ ce lɛ́ɛ ɔ́, nú a da nyɔ̌nu ɖěvo lɛ́ɛ dó yě jí ɔ́, é sɔ́ ná nyí ɖɔ gbɛtɔ́ wɛ ná ɖɔ gbo nú mǐ ǎ; nɔ flín ɖɔ Mawu ɖo mǐ mɔ wɛ.”

⁵¹ Labáan lɛ́ ɖɔ nú Jakɔ́bu ɖɔ: “Awǐnnya e è bɛ̌ kplé ɔ́ nɛ́; awǐnnya e è tun te ɖo nyɛ kpó hwi kpó tɛ́ntin ɔ́ nɛ́.

⁵² Awǐnnya e è bɛ̌ kplé ɔ́ kpó ée è sɔ́ tun te ɔ́ kpó wɛ nyí xlɛ́ ɖɔ nyɛ kún ná zɛ awǐnnya kplékplé énɛ́ wú, kpódó ée è tun te ɔ́ kpó wú wá gɔ̌n towe, bó wa nyanya nú we ó. Hwi lɔ kún ká ná zɛ awǐnnya kplékplé ɔ́, kpódó ée è tun te ɔ́ kpó wú wá gɔ̌n ce, bó wa nyanya nú mì ó.

⁵³ Mawu Ablaxámu tɔn, Mawu Naxɔ́ɔ tɔn ní nɔ́ dó hwɛ gbɔ nú mǐ.” Bɔ Jakɔ́bu xwlé Mawu e nukɔn Izáki tɔ́ tɔn nɔ́ sísɔ́ ɖe é.

⁵⁴ Jakɔ́bu sá vɔ̌ ɖokpó nú Mawu ɖo só ɔ́ jí, bó ylɔ́ mɛ tɔn lɛ́ɛ ɖɔ yě ní wá ɖu nǔ, bɔ yě ɖu nǔ ɔ́ ɖo só ɔ́ ta nǔgbó, bó dɔ́ fínɛ́.