Bǐbɛ́mɛ 30 - MAWUXÓWÉMA

¹ Ée Hlacɛ́li mɔ ɖɔ émí kún ɖo vǐ ji nú Jakɔ́bu wɛ ó ɔ́, é jɛ wǔ hwan nɔví tɔn jí, bó ɖɔ nú Jakɔ́bu ɖɔ: “A ma ji vǐ nú mì ǎ ɔ́, un ná kú.”

² Bɔ xomɛ tɔn sin Jakɔ́bu bɔ é ɖɔ: “Nyɛ wɛ ka nyí Mawu e má ná vǐ we ǎ é a?”

³ Bɔ Hlacɛ́li ɖɔ n'i ɖɔ: “Mɛsɛntɔ́ ce Biluha ɔ́ ɖíe; ɖǒ xó xá ɛ, bónú é ná ji vǐ, bɔ un ná hɛn akɔn, bɔ yě ná nyí vǐ nú nyɛ lɔmɔ̌.”

⁴ Énɛ́ ɔ́, é sɔ́ mɛsɛntɔ́ tɔn Biluha ɔ́ jó nú Jakɔ́bu, bɔ Jakɔ́bu ɖó xó xá ɛ.

⁵ Bɔ Biluha mɔ xo bó ji vǐ súnnu ɖokpó nú Jakɔ́bu,

⁶ bɔ Hlacɛ́li ɖɔ: “Mawu dó hwɛ gbɔ nú mì; é se vosisa ce bó ná vǐ súnnu ɖokpó mì.” Énɛ́ ɔ́ wú wɛ é sun nyǐ vǐ ɔ́ ɖɔ Dan. Dan sín tínmɛ wɛ nyí “Mawu gbo hwɛ”.

⁷ Mɛsɛntɔ́ ɔ́ lɛ́ mɔ xo ɖěvo bó ji vǐ súnnu wegɔ́ ɔ́ nú Jakɔ́bu.

⁸ Bɔ Hlacɛ́li ɖɔ: “Un li za xá nɔví ce bɔ é vɛ́ jlɛ́, bó ɖu ɖ'é jí.” Bɔ é sun nyǐ vǐ ɔ́ ɖɔ Nɛfutali. Nɛfutali sín tínmɛ wɛ nyí “Un li za”.

⁹ Lěya ɔ́, ée é mɔ ɖɔ émí kún sɔ́ ɖo vǐ ji wɛ ó ɔ́, é zé mɛsɛntɔ́ tɔn Zilupa jó nú Jakɔ́bu.

¹⁰ Mɛsɛntɔ́ Lěya tɔn Zilupa ji vǐ súnnu ɖokpó nú Jakɔ́bu,

¹¹ bɔ Lěya ɖɔ: “Nyɔ̌ná jɛ́n wá lě a?” Bó sun nyǐ vǐ ɔ́ ɖɔ Gadi. Gadi sín tínmɛ wɛ nyí “Nyɔ̌ná”.

¹² Mɛsɛntɔ́ ɔ́ lɛ́ ji vǐ súnnu wegɔ́ ɔ́ nú Jakɔ́bu.

¹³ Bɔ Lěya ɖɔ: “Nǔ nyɔ́ nú mì mɛ nya! Nǔgbó ɔ́, nyɔ̌nu lɛ́ɛ ná nɔ́ ylɔ́ mì ɖɔ nyɔ̌nánɔ.” Bó sun nyǐ vǐ ɔ́ ɖɔ Acɛ́ɛ. Acɛ́ɛ sín tínmɛ wɛ nyí “Nyɔ̌ná”.

¹⁴ Hwlibɛ́ni ka wá tɔ́n yi gle mɛ gbe ɖokpó nǔkún-yiya hwenu, bó mɔ atínsínsɛ́n e è nɔ ylɔ́ ɖɔ atínsínsɛ́n wǎn yíyí tɔn ɔ́, bó ba wá nú nɔ tɔn Lěya, bɔ Hlacɛ́li ɖɔ nú Lěya ɖɔ: “Kɛnklɛ́n bó ná atínsínsɛ́n wǎn yíyí tɔn vǐ towe tɔn ɔ́ ɖě mì.”

¹⁵ Bɔ Lěya yí gbe n'i ɖɔ: “Asú ce e a yǐ ɔ́ kpé we ǎ, bɔ a nǎ lɛ́ yí atínsínsɛ́n wǎn yíyí tɔn vǐ ce tɔn ɔ́ wɛ a?” Bɔ Hlacɛ́li yí gbe n'i ɖɔ: “É nyɔ́! Égbé zǎn mɛ ɔ́, asú towe ná wá xɔ nú we, ɖó atínsínsɛ́n wǎn yíyí tɔn vǐ towe tɔn e a nǎ ná mì ɔ́ nu.”

¹⁶ É jɛ gbadanu, bɔ Jakɔ́bu lɛ́ kɔ sín gle mɛ jǎwe, bɔ Lěya tɔ́n bó yi kpé e, bó ɖɔ n'i ɖɔ: “Xɔ ce mɛ wɛ a nǎ dɔ́ égbé; un ko zé atínsínsɛ́n wǎn yíyí tɔn vǐ ce tɔn ɔ́ jó ɖ'é nu.” Jakɔ́bu ɖó xó xá ɛ zǎn énɛ́ ɔ́ mɛ.

¹⁷ Bɔ Mawu yí Lěya sín ɖɛ, bɔ é mɔ xo bó ji vǐ súnnu atɔ́ɔ́ngɔ́ ɔ́ nú Jakɔ́bu.

¹⁸ Lěya ɖɔ: “Ée un zé mɛsɛntɔ́ ce jó nú asú ce ɔ́, Mawu sú axɔ́ mì, bó ná vǐ élɔ́ mì, bó sun nyǐ vǐ ɔ́ ɖɔ Isakáa.” Isakáa sín tínmɛ wɛ nyí “Le ɖo ajɔ̌ jí”.

¹⁹ Lěya lɛ́ mɔ xo bó ji vǐ súnnu ayizɛ́ngɔ́ ɔ́ nú Jakɔ́bu,

²⁰ bó ɖɔ: “Mawu ná nǔ ɖagbe ɖokpó mì; élɔ́ tɔn din ɔ́, asú ce ná nɔ́ wlí yɛ̌yi nú mì, ɖó vǐ súnnu ayizɛ́n nɛ́ un ji n'i nɛ́.” Bó sun nyǐ vǐ ɔ́ ɖɔ Zabulɔ́ɔn. Zabulɔ́ɔn sín tínmɛ wɛ nyí “Asú ce ná nɔ wlí yɛ̌yi nú mì”.

²¹ Énɛ́ ɔ́ gúdo ɔ́, é ji nyɔ̌nuví ɖokpó, bó sun nyǐ i ɖɔ Dina.

²² Mawu flín Hlacɛ́li, bó yí ɖɛ tɔn, bó bló bɔ é ná jɛ vǐ ji jí.

²³ É mɔ xo, bó ji vǐ súnnu ɖokpó, bó ɖɔ: “Mawu ɖe winnyá nú mì.”

²⁴ É sun nyǐ vǐ ɔ́ ɖɔ Jozɛ́fu; Jozɛ́fu sín tínmɛ wɛ nyí “Mawu Mavɔmavɔ ná gɔ́ ná”, bó ɖɔ: “Mawu Mavɔmavɔ ní ná súnnuví ɖěvo mì gɔ́ ná.”

Jakɔ́bu jɛ dɔkun

²⁵ Hwenu e Hlacɛ́li ji Jozɛ́fu ɔ́, Jakɔ́bu ɖɔ nú Labáan ɖɔ: “Jǒ mì dó má yi xwé, to ce mɛ.

²⁶ Jǒ asi ce lɛ́ɛ kpó vǐ ce lɛ́ɛ kpó nú mì bónú má yi. Yě wú wɛ un wa azɔ̌ nú we. Hwi ɖésú tunwun azɔ̌ e un wa nú we ɔ́ ganjí.”

²⁷ Bɔ Labáan ɖɔ n'i ɖɔ: “Kɛnklɛ́n se xó ce! Un kan nǔ, bó se ɖɔ Mawu Mavɔmavɔ xo ɖɛ dó jǐ ce ɖó hwi wú.

²⁸ Đɔ axɔ́ e un nǎ sú we ɔ́ bónú má sú we.”

²⁹ Jakɔ́bu ka ɖɔ n'i ɖɔ: “A tunwun lě e un wa azɔ̌ nú we gbɔn ɔ́; a mɔ lě e kanlin towe lɛ́ɛ wá sukpɔ́ gbɔn ɖó nyɛ wútu é.

³⁰ Đó kpɛ e ɖo así towe có nyɛ wá ɔ́, wá ji d'é jí kpɔ́ gégé. Mawu Mavɔmavɔ xo ɖɛ dó jǐ towe sín gbe e gbe un tɛ afɔ xwé towe gbe é. Hwenu su, nú má yi bló nyɛ ɖésúnɔ tɔn ɖě dó hɛn mɛ ce lɛ́ɛ ná ǎ cé?”

³¹ Labáan kanbyɔ́ Jakɔ́bu ɖɔ: “Étɛ́ wɛ un nǎ sú we?” Bɔ Jakɔ́bu yí gbe n'i ɖɔ: “A nǎ sú axɔ́ ɖěbǔ mì ǎ. Nú a yǐ gbe nú xó e ɖɔ nú we gbé un ja ɔ́, un ná lɛ́ nyi gbɔ̌ towe lɛ́ɛ, bó ná kpé nukún yě wú nú we.

³² Égbé ɔ́, un nǎ gbɔn gbɔ̌ towe lɛ́ɛ bǐ jí, bó ná ɖe lɛ̌ngbɔ́ e nǔɖé va dó wǔ tɔn téwún téwún, abǐ gblogblo tɔn lɛ́ɛ ɖó vo; un ná ɖe éé nǔɖé kó va dó wǔ tɔn lɛ́ɛ, kpó gbɔ̌ e nǔɖé kó va dó wǔ tɔn téwún téwún, abǐ gblogblo tɔn lɛ́ɛ bǐ ɖó vo, bɔ é ná nyí axɔ́ e a sú mì é.”

³³ É kó wá yá ɔ́, a nǎ mɔ ɖɔ un kún nɔ́ hízí nǔ ó. Nú a wǎ mɔ gbɔ̌ e nǔɖé má va dó wǔ tɔn ǎ lɛ́ɛ ɖě ɖo gbɔ̌ e un ɖe ɖó vo lɛ́ɛ mɛ hǔn, tunwun ɖɔ ajo wɛ un ja.

³⁴ Bɔ Labáan ɖɔ n'i ɖɔ: “É nyɔ́! Ní bó nɔ lě e a ɖɔ ɖó é.”

³⁵ Gbe nɛ́ gbe ɔ́, Labáan gbɔn gǔdo, bɔ gbǎgbá e nǔɖé va dó wǔ yětɔn lɛ́ɛ, gbɔ̌ e nǔɖé va dó wǔ yětɔn lɛ́ɛ, lɛ̌ngbɔ́ e wiwi gbɔn mɛ lɛ́ɛ, ée wěwé gbɔn mɛ lɛ́ɛ ɔ́, é ɖe bǐ ɖó vo bó bɛ́ jó nú vǐ tɔn lɛ́ɛ.

³⁶ Bó sɛ́ yě dó zɔ nú Jakɔ́bu. Fí e yě ɖe ɔ́, è nǎ ɖi zɔnlin nú azǎn atɔn cóbó yi fí ɔ́. Jakɔ́bu ka ɖo Labáan sín kanlin e kpo lɛ́ɛ wú kpé nukún wɛ.

³⁷ É ba pepliyée kpó amadi kpó, kpódó platáni kpó sín ala. Atín lɛ́ɛ ɖo mǔ, bɔ é kɔ́n fló sín atín lɛ́ɛ wú gbɔn mɛ gbɔn mɛ, bɔ bǐ wlán, bɔ è mɔ fló ɔ́ ɖo fí ɖé ɔ́, é nɔ mɔ atín ɔ́ ɖésú ɖo fí ɖě.

³⁸ É to atín e sín wǔtu wlán lɛ́ɛ dó nǔ e mɛ kanlin lɛ́ɛ nɔ́ nu sin ɖe ɔ́ mɛ, bɔ kanlin lɛ́ɛ nɔ́ ɖo mimɔ wɛ. Hwenu e gbɔ̌ lɛ́ɛ wá sin nu gbé ɔ́ wɛ avadídó nɔ́ jló yě.

³⁹ Bɔ yě nɔ́ dó ava nú yěɖée ɖo fí e atín lɛ́ɛ ɖe é; énɛ́ ɔ́, yě nɔ́ ji vǐ hwɛkannɔ, bó nɔ́ ji vǐ wlanwlan, bɔ Jakɔ́bu nɔ ɖe yě ɖó vo.

⁴⁰ Gbɔ̌ e Jakɔ́bu ɖe ɖó vo lɛ́ɛ ɔ́, é nɔ bɛ́ yě ɖó Labáan sín kanlin e ɖó hwɛkan lɛ́ɛ nukɔn. É ɖe kanlin éyɛ́ tɔn lɛ́ɛ ɖó vo, bó nɔ́ lɔn bɔ yě nɔ́ byɔ́ Labáan sín kanlin lɛ́ɛ mɛ ǎ.

⁴¹ Nú avadídó jló gbɔ̌sú e dó ganjí lɛ́ɛ hweɖěbǔnu ɔ́, Jakɔ́bu nɔ to atín lɛ́ɛ dó nǔ e mɛ kanlin lɛ́ɛ nɔ́ nu sin ɖe ɔ́ mɛ, bónú yě ná dó ava ɖo atín lɛ́ɛ kɔn.

⁴² Nú é ká nyí ɖɔ gbɔ̌sú gǒxúxú lɛ́ɛ wɛ ɔ́, é nɔ́ bɛ́ atín lɛ́ɛ dó nǔ e mɛ kanlin lɛ́ɛ nɔ́ nu sin ɖe ɔ́ mɛ ǎ. Énɛ́ ɔ́, kanlin e xú gǒ lɛ́ɛ nɔ́ nyí Labáan tɔn, bɔ éé kló lɛ́ɛ nɔ́ nyí Jakɔ́bu tɔn.

⁴³ Énɛ́ ɔ́, Jakɔ́bu jɛ dɔkun ɖésú. É ɖó lɛ̌ngbɔ́ kpódó gbɔ̌ kpó kɔn nyi kpɔ́, bó ɖó mɛsɛntɔ́ nyɔ̌nu kpó súnnu kpó, bó ɖó lǎkúnmí kpó tócí kpó.