Bǐbɛ́mɛ 29 - MAWUXÓWÉMA

Jakɔ́bu mɔ Hlacɛ́li

¹ Jakɔ́bu wlí ali, bó yi mɛ e ɖo zǎnzǎnhwe jí lɛ́ɛ sín tomɛ.

² Ée é ɖo yiyi wɛ ɔ́, é wá jɛ gbe ɖokpó bɔ é mɔ tɔ ɖokpó ɖo gbě ɔ́ jí. Gbɔ̌hwan atɔn ɖo tɔ ɔ́ nu, bó ɖo gbigbɔjɛ́ wɛ; tɔ énɛ́ ɔ́ sín sin wɛ è nɔ ná kanlin lɛ́ɛ. È zě awǐnnya ɖaxó ɖé dó sú tɔ ɔ́.

³ Kanlin lɛ́ɛ bǐ nɔ́ kplé ɖo fínɛ́, bɔ è nɔ blí awǐnnya ɔ́ sín tɔ ɔ́ nu, bó nɔ́ ná sin yě, bó nɔ́ lɛ́ blí ɖ'é nu.

⁴ Jakɔ́bu kanbyɔ́ lɛ̌ngbɔ́nyitɔ́ lɛ́ɛ ɖɔ: “Nɔví ce lɛ́ɛ e mi, fítɛ́ nu wɛ mi nyí?” Bɔ yě yí gbe n'i ɖɔ: “Haláaninu wɛ mǐ nyǐ.”

⁵ É lɛ́ kanbyɔ́ yě ɖɔ: “Mi tunwun Labáan Naxɔ́ɔ ví ɔ́ a?” Bɔ yě yí gbe n'i ɖɔ: “Ɛɛn, mǐ tunwun i.”

⁶ É lɛ́ kanbyɔ́ yě ɖɔ: “É ɖo ɖagbe a?” Bɔ yě yí gbe n'i ɖɔ: “Ɛɛn, é ɖo ɖagbe. Kpɔ́n! Vǐ tɔn Hlacɛ́li ɔ́ nɛ́ kplá gbɔ̌ tɔn lɛ́ɛ jǎwe nɛ́.”

⁷ Jakɔ́bu lɛ́ ɖɔ: “Kéze kpo ɖo te; hwenu e è nǎ kplé kanlin lɛ́ɛ dó ɔ́ kó su ǎ. Mi ná sin yě, bó kplá yě yi nǔ ɖu gbé.”

⁸ Bɔ yě yí gbe n'i ɖɔ: “Mǐ sixú ǎ; kanlin lɛ́ɛ bǐ jɛ́n ná wá kplé hwɛ̌ cóbɔ è nǎ blí awǐnnya ɔ́ sín tɔ ɔ́ nu, bó ná ná sin yě.”

⁹ Xó ɔ́ ɖɔ nú yě wɛ é ɖe, bɔ Hlacɛ́li kplá tɔ́ tɔn sín gbɔ̌ lɛ́ɛ wá; kanlin wɛ é nɔ́ nyi.

¹⁰ Ée Jakɔ́bu mɔ nylɔ tɔn Labáan sín vǐ Hlacɛ́li, lobo mɔ gbɔ̌ tɔn lɛ́ɛ tlóló ɔ́, é sɛ yi tɔ ɔ́ kɔn, bó blí awǐnnya ɔ́ sín tɔ ɔ́ nu, bó ná sin gbɔ̌ tɔn lɛ́ɛ.

¹¹ Énɛ́ ɔ́ gúdo ɔ́, é kí si nú Hlacɛ́li, lobo wlí avǐ.

¹² Jakɔ́bu ɖɔ nú Hlacɛ́li ɖɔ tɔ́ tɔn sín mɛ wɛ émí nyí; Hlebeka sín vǐ wɛ émí nyí, bɔ Hlacɛ́li kán wezun bó yi ɖɔ nú tɔ́ tɔn.

¹³ Ée Labáan se nɔví tɔn nyɔ̌nu sín vǐ Jakɔ́bu sín xó lě tlóló ɔ́, é kán wezun bó yi kpé e, bó zunfán ɛ, bó kí si n'i, bó kplá ɛ yi xwé tɔn gbe. Jakɔ́bu ka wlí nǔ e jɛ lɛ́ɛ bǐ ɖɔ nú Labáan.

¹⁴ Bɔ Labáan ɖɔ nú Jakɔ́bu ɖɔ: “Mɛ ce wɛ a nyǐ nǔgbó; hun ce ɖíe.” Ée Jakɔ́bu bló sun ɖokpó ɖo Labáan xwé ɔ́,

Hlacɛ́li kpó Lěya kpó

¹⁵ Labáan ɖɔ n'i gbe ɖokpó ɖɔ: “Ée a nyǐ mɛ ce ɔ́ wú wɛ a nǎ wa azɔ̌ nú mì yǎyá ǎ. Đɔ nabí e un nǎ nɔ́ sú we ɔ́ nú mì.”

¹⁶ Labáan ka ɖó nyɔ̌nuví we: nukɔngbéví tɔn nyí Lěya, mɛ e jɛ Lěya nɛgbé ɔ́ nɔ nyí Hlacɛ́li.

¹⁷ Lěya ɔ́ ɖó nukún fítíí, Hlacɛ́li ka nyɔ́ ɖɛkpɛ ɖésú.

¹⁸ Jakɔ́bu ká yí wǎn nú Hlacɛ́li; énɛ́ ɔ́, é yí gbe nú Labáan ɖɔ: “Un ná wa azɔ̌ nú we nú xwe tɛ́nwe, bɔ a nǎ ná vǐ towe Hlacɛ́li ɔ́ mì, bɔ un ná da.”

¹⁹ Bɔ Labáan ɖɔ: “Un sɔ́ ɛ ná we ɔ́, é nyɔ́ nú mì hú má sɔ́ ɛ ná mɛ ɖěvo; bó nɔ gɔ̌n ce.”

²⁰ Énɛ́ ɔ́, Jakɔ́bu wa azɔ̌ nú xwe tɛ́nwe bɔ Hlacɛ́li ná nyí étɔn. Đó Jakɔ́bu yí wǎn nú Hlacɛ́li wútu ɔ́, é mɔ xwe tɛ́nwe nɛ́ lɛ́ɛ dó mɔ azǎn ywɛywɛ ɖé ná.

²¹ Énɛ́ ɔ́ gúdo ɔ́, Jakɔ́bu ɖɔ nú Labáan ɖɔ: “Jǒ asi ce nú mì, nú nyɛ kpó é kpó ná ɖɔ éé ɖo mɔ̌ é, ɖó un ko bló xwe nabí e un ɖó ná bló ɔ́.”

²² Bɔ Labáan ylɔ́ agɔ̌ ɖaxó ɖokpó; é kplé mɛ e ɖo fínɛ́ lɛ́ɛ bǐ bɔ yě ɖu agɔ̌.

²³ Lo ɔ́, ée gbadanu su ɔ́, vǐ tɔn Lěya ɔ́ wɛ è kplá nú Jakɔ́bu bɔ é ɖó xó xá ɛ.

²⁴ Hwenu e Labáan kplá Lěya nú Jakɔ́bu ɔ́, é lɛ́ kplá mɛsɛntɔ́ tɔn Zilupa jó nú Lěya, bɔ é ná nyí mɛsɛntɔ́ tɔn.

²⁵ Ée ayǐ hɔ́n ɔ́, Jakɔ́bu wá mɔ ɖɔ Lěya wɛ, bó ɖɔ: “Lěya wɛ a?” Énɛ́ ɔ́, é kanbyɔ́ Labáan ɖɔ: “Étɛ́ a blǒ xá mì nɛ́? Hlacɛ́li wú wɛ un wa azɔ̌ nú we ǎ cé? Aniwú wɛ a flú mì?”

²⁶ Bɔ Labáan yí gbe n'i ɖɔ: “È nɔ bló mɔ̌ ɖo gbě mǐtɔn jí fí ǎ. È nɔ sɔ́ vǐ e gbɔn gǔdo ɔ́ ná asú jɛ nukɔn nú nukɔngbéví ɔ́ ǎ.

²⁷ Mǐ ní tó ɖu alɔwlíwlíxwe ɔ́ hwɛ̌; énɛ́ ɔ́ gúdo ɔ́, un nǎ ná mɛ ɖě ɔ́ lɔ we; amɔ̌, a nǎ lɛ́ wa azɔ̌ nú mì nú xwe tɛ́nwe ɖěvo.”

²⁸ Bɔ Jakɔ́bu fó alɔwlíwlíxwe ɔ́ xá Lěya, bɔ Labáan sɔ́ Hlacɛ́li n'i bɔ é húzú asi tɔn.

²⁹ Labáan kplá mɛsɛntɔ́ tɔn Biluha nú Hlacɛ́li, bɔ é ná nyí mɛsɛntɔ́ tɔn.

³⁰ Jakɔ́bu ɖó xó xá Hlacɛ́li lɔ. É yí wǎn n'i hú Lěya, bó lɛ́ wa azɔ̌ nú Labáan nú xwe tɛ́nwe ɖěvo.

Jakɔ́bu ví lɛ́ɛ

³¹ Ée Mawu Mavɔmavɔ mɔ ɖɔ Jakɔ́bu kún yí wǎn nú Lěya ó ɔ́, é ná vǐ i, bɔ é nɔ ji; Hlacɛ́li ka nɔ ji ɖě ǎ.

³² Énɛ́ ɔ́, Lěya mɔ xo bó ji vǐ súnnu ɖokpó, bó sun nyǐ i ɖɔ Hwlibɛ́ni, Hwlibɛ́ni sín tínmɛ wɛ nyí “É mɔ”, ɖó é ɖo ɖiɖɔ wɛ ɖɔ: “Mawu Mavɔmavɔ mɔ ɖɔ è ɖe mì kpo nǔgbó. Asú ce ná yí wǎn nú mì lo.”

³³ É lɛ́ mɔ xo ɖěvo bó ji vǐ súnnu ɖokpó. É ɖɔ: “Mawu Mavɔmavɔ mɔ ɖɔ è kún yí wǎn nú mì ɖ'ayǐ ó, bó lɛ́ ná vǐ élɔ́ mì.” É sun nyǐ vǐ ɔ́ ɖɔ Sinmɛnyɔ́ɔ; Sinmɛnyɔ́ɔ sín tínmɛ wɛ nyí “é se”.

³⁴ É lɛ́ mɔ xo ɖěvo, bó ji vǐ súnnu ɖokpó, bó ɖɔ: “Din ɔ́, asú ce ná tɛ́ dó wǔ ce, ɖó un ji vǐ súnnu atɔn n'i.” Énɛ́ wú wɛ é sun nyǐ vǐ ɔ́ ɖɔ Levíi. Levíi sín tínmɛ wɛ nyí “é tɛ́ dó”.

³⁵ É lɛ́ mɔ xo ɖěvo, bó ji vǐ súnnu ɖokpó, bó ɖɔ: “Din tɔn ɔ́, un ná kpa Mawu Mavɔmavɔ.” Énɛ́ wú wɛ é sun nyǐ vǐ ɔ́ ɖɔ Judáa; Judáa sín tínmɛ wɛ nyí “kpikpa”. Énɛ́ ɔ́ gúdo ɔ́, é sɔ́ ji vǐ ɖě ǎ.