Bǐbɛ́mɛ 25 - MAWUXÓWÉMA

Ablaxámu kú

¹ Ablaxámu lɛ́ da nyɔ̌nu ɖěvo bɔ é nɔ́ nyí Ketúla.

² Nyɔ̌nu énɛ́ ɔ́ ji Zimulani, Yokicáni, Mɛdani, Madiáani, Yicibaku kpódó Cuwáxi kpó.

³ Yokicáni ɔ́ ji Saba kpódó Dedáni kpó. Dedáni ɔ́, kúnkan tɔn lɛ́ɛ wɛ nyí Acúu ví lɛ́ɛ, Lɛtucíti lɛ́ɛ kpódó Lewumíti lɛ́ɛ kpó.

⁴ Madiáani ví lɛ́ɛ wɛ nyí Eyifa, Efɛ́ɛ, Hanɔki, Avida kpódó Ɛlidáa kpó. Yě mɛ énɛ́ lɛ́ɛ bǐ wɛ nyí vǐ súnnu Ketúla tɔn.

⁵ Ablaxámu jó nǔ e é ɖó lɛ́ɛ bǐ dó nú Izáki.

⁶ Lo ɔ́, hwenu e Ablaxámu ɖo gbɛ ɔ́, é ná nǔ asi tɔn ɖěvo lɛ́ɛ sín vǐ lɛ́ɛ, có bó nya yě yi zǎnzǎnhwe jí, dó zɔga nú vǐ tɔn Izáki.

⁷ Xwe kɛnnɛ afɔtɔn (175) wɛ Ablaxámu ɖó

⁸ bɔ gbɔjɛ tɔn xwɛ. Hǔn é nɔ kpikpoxɔmɛ ɖésú có gbɛ nyɔ́ n'i. É dɔ́ ji ɖésú cóbó yi mɔ tɔ́gbó tɔn lɛ́ɛ.

⁹ Vǐ tɔn Izáki kpódó Isimayɛ́li kpó ɖi i dó yɔdo e ɖo sóxo mɛ ɖo Makipela ɔ́ mɛ. Yɔdo ɔ́ ɖo Eflɔ́ni, Soháa ví ɔ́ sín gle mɛ, ɖo Mamulée kpá. Hitíti kún mɛ wɛ Eflɔ́ni jɔ ɖe.

¹⁰ Gle e Ablaxámu xɔ ɖo Hitíti lɛ́ɛ sí ɖ'ayǐ ɔ́ wɛ; gle ɔ́ mɛ wɛ è ɖi asi tɔn Sala lɔ dó.

¹¹ Ée Ablaxámu kú ɔ́, Mawu xo ɖɛ dó vǐ tɔn Izáki jí. Izáki ɔ́, Laxáyi-Hlɔyi sín tɔ ɔ́ kpá wɛ é nɔ́ nɔ.

Kúnkan Isimayɛ́li tɔn

¹² Hagáa nyɔ̌nu Ejípunu e nyí Sala sín mɛsɛntɔ́ ɔ́ lɔ ji vǐ nú Ablaxámu. Vǐ ɔ́ nɔ́ nyí Isimayɛ́li.

¹³ Isimayɛ́li ɔ́, vǐ tɔn lɛ́ɛ sín nyǐkɔ ɖíe: lě e è ji yě gbɔn ɖě bɔ dó ɖě wú ɔ́ wɛ è xwedó bó wlán nyǐkɔ lɛ́ɛ: Nɛbayɔ́ti, Kedáa, Adibeɛli, Mivusámu,

¹⁴ Micima, Duma, Masa,

¹⁵ Hadádi, Téma, Yetúu, Nafíci kpó Kedúma kpó.

¹⁶ Isimayɛ́li sín vǐ súnnu wěwe lɛ́ɛ sín nyǐkɔ nɛ́. Yě mɛ ɖokpó ɖokpó nyí akɔta ɖokpó ɖokpó sín gǎn. Yě ɖó nyǐkɔ yětɔn nú gletoxo yětɔn lɛ́ɛ kpódó fí e yě nɔ́ ɖó gɔnu gbɔn lɛ́ɛ kpó.

¹⁷ Xwe kantɔn afɔtɔn-nukún-we (137) wɛ Isimayɛ́li ɖó, bɔ gbɔjɛ tɔn xwɛ, bɔ é yi mɔ tɔ́gbó tɔn lɛ́ɛ.

¹⁸ Kúnkan tɔn lɛ́ɛ nɔ́ nɔ gbě ɖé jí ɖo Hawíla kpódó Cúu kpó tɛ́ntin. Cúu ɔ́ ɖo Ejípu kpá, ɖo zǎnzǎnhwe jí, ɖo Acúu wají. Yě ján dó kúnkan Ablaxámu tɔn ɖě lɛ́ɛ mɛ ǎ.

JAKƆ́BU ( 25.19—36.43 ) Esawu kpódó Jakɔ́bu kpó

¹⁹ Izáki Ablaxámu ví ɔ́ sín tan ɖíe:

²⁰ Xwe kanɖé (40) wɛ Izáki ɖó bó da Hlebeka; Hlebeka ɔ́, Labáan sín nɔví wɛ, bó nyí Betuwɛ́li ví. Betuwɛ́li ɔ́, Alamunu wɛ é nyí. É nɔ́ nɔ Mɛzopotamíi taligbé tɔn.

²¹ Hlebeka ji vǐ nú Izáki ǎ; énɛ́ ɔ́, Izáki sa vo nú Mawu Mavɔmavɔ ɖó ta tɔn mɛ, bɔ Mawu Mavɔmavɔ yí ɖɛ tɔn, bɔ Hlebeka mɔ xo.

²² Vǐ e ɖo Hlebeka xomɛ lɛ́ɛ nɔ́ ɖo glǒ ya yěɖée wɛ, bɔ é ɖɔ: “Étɛ́ ká ɖo jijɛ wɛ?” Bɔ é yi kan nǔ byɔ́ Mawu Mavɔmavɔ.

²³ Bɔ Mawu Mavɔmavɔ yí gbe n'i ɖɔ: “Akɔta we wɛ ɖo adɔgo towe mɛ. Togun vovo we wɛ ná tɔ́n sín xo towe mɛ; togun ɔ́ ɖokpó ná ɖó hlɔ̌nhlɔ́n hú ɖokpó; mɛxó ɔ́ wɛ ká ná nɔ mɛ kpɛví ɔ́ glɔ́.”

²⁴ Nǔgbó ɔ́, ée é ja vǐ ji gbé ɔ́, é ji hǒxo.

²⁵ Vǐ nukɔntɔn e tɔ́n ɔ́ nyí vɔvɔ, bɔ fún kpé wǔ tɔn bǐ, awu ɖaxó fúnnɔ mɛ wɛ é ɖe ɖɔhun. È nɔ ylɔ́ vǐ ɔ́ ɖɔ Esawu.

²⁶ Ée éyɛ́ tɔ́n ɔ́, nɔví tɔn tɔ́n, bɔ alɔ tɔn hɛn Esawu sín afɔgbɛnnu. È nɔ ylɔ́ vǐ ɔ́ ɖɔ Jakɔ́bu. Xwe kanɖé ko (60) wɛ Izáki ɖó hwenu e é ji vǐ énɛ́ lɛ́ɛ é.

²⁷ Vǐ lɛ́ɛ ɖo susu wɛ. Esawu húzú gběnyatɔ́, bɔ alɔ tɔn se kpɛ́n ɖésú. É yí wǎn nú nǔkan mɛ gbingbɔn. Jakɔ́bu ɔ́ ká nyí mɛɖé bó nɔ nɔ xwíí xwíí; goxɔ mɛ jɛ́n é nɔ́ ɖe.

²⁸ Izáki yí wǎn nú Esawu, ɖó é yí wǎn nú gbělan; Hlebeka ká yí wǎn nú Jakɔ́bu.

²⁹ Jakɔ́bu ka ɖo nǔ ɖa wɛ gbe ɖokpó, bɔ Esawu gosín gbě wá; nǔ kó cikɔ n'i ɖésú.

³⁰ É ɖɔ nú Jakɔ́bu ɖɔ: “Gbɔ nú má yá wǔ nu nǔsúnnú towe vɔvɔ élɔ́ ɖě, ɖó nǔ cikɔ nú mì.” Énɛ́ ɔ́ wú wɛ è ɖǒ nyǐkɔ nú Esawu ɖɔ Edɔ́mu. Edɔ́mu sín tínmɛ wɛ nyí vɔvɔ.

³¹ Jakɔ́bu ka yí gbe n'i ɖɔ: “Bo to jó mɛxó e a nyǐ ɔ́ sín acɛ lɛ́ɛ nú mì hwɛ̌.”

³² Bɔ Esawu ɖɔ n'i ɖɔ: “Xovɛ́ ɖo nǎ hu mì wɛ; ani un nǎ sɔ́ mɛxó e un nyí ɔ́ sín acɛ dó wa?”

³³ Jakɔ́bu lɛ́ yí xó bó ɖɔ: “Xwlé nǔ hwɛ̌.” Énɛ́ ɔ́, Esawu xwlé nǔ bó ɖɔ émí jó mɛxó e émí nyí ɔ́ sín acɛ n'i.

³⁴ Bɔ Jakɔ́bu ná ɛ wɔ̌xúxú kpódó ayikún-núsúnnú ɔ́ kpó, bɔ é ɖu bó nu, bó sí te ɖidó. Lě e é dó vɛ̌ nú mɛxó e é nyí ɔ́ sín acɛ gbɔn ɔ́ nɛ́.