Bǐbɛ́mɛ 24 - MAWUXÓWÉMA

Izáki da Hlebeka

¹ Ablaxámu ko kpo bǐ; xwe tɔn ko sɛ yi; Mawu Mavɔmavɔ ka kɔn nyɔ̌ná dó jǐ tɔn ɖo nǔ bǐ mɛ.

² Ablaxámu ɖɔ nú mɛsɛntɔ́ tɔn e nyí gǎn nú mɛsɛntɔ́ tɔn ɖě lɛ́ɛ bǐ, bó nɔ́ kpɔ́n nǔ tɔn lɛ́ɛ bǐ jí ɔ́ ɖɔ: “Sɔ́ alɔ towe dó asá ce glɔ́ .

³ Énɛ́ ɔ́, un ná ɖɔ bɔ a nǎ xwlé Mawu Mavɔmavɔ, Mawu e ɖó jǐnukúnsin kpódó ayǐkúngban kpó ɔ́ ɖɔ émí kún ná da Kanáanu e mɛ un ɖe lɛ́ɛ sín vǐ nyɔ̌nu nú vǐ ce ó.

⁴ Lo ɔ́, émí ná yi to e mɛ è ji mì ɖe ɔ́ mɛ, bó ná yi da asi sín dɔ̌n wá nú vǐ ce Izáki, ɖo hɛ̌nnu ce mɛ.”

⁵ Mɛsɛntɔ́ ɔ́ ká yí gbe n'i ɖɔ: “Nú nyɔ̌nu ɔ́ ká gbɛ́ ɖɔ émí kún ná xwedó mì wá tomɛ fí ó ɔ́, vǐ towe ɔ́ wɛ un nǎ kplá yi dɔ̌n a?”

⁶ Bɔ Ablaxámu ɖɔ n'i ɖɔ: “Gbeɖé, ma kplá vǐ ce hɛn yi dɔ̌n ó.

⁷ Mawu Mavɔmavɔ wɛ ɖó jǐnukúnsin; é wɛ kplá mì sín tɔ́ ce xwé; é kplá mì sín to ce mɛ; é wɛ ɖɔ xó nú mì, bó xwlé nǔ nú mì ɖɔ émí ná ná to élɔ́ kúnkan ce lɛ́ɛ; é ɖésúnɔ ná sɛ́ wɛnsagun tɔn dó, bɔ é ná nɔ nukɔn nú we, bɔ a nǎ yi da asi wá nú vǐ ce.

⁸ Ényí nyɔ̌nu ɔ́ má jló ná xwedó we ǎ hǔn, nǔ e un ɖɔ bɔ a xwlé ɔ́ sɔ́ ɖo kɔ nú we ǎ. Nǔ ɖokpó e ɖ'é mɛ ɔ́, ma kplá vǐ ce hɛn yi dɔ̌n ó.”

⁹ Hwe énɛ́ ɔ́ nu ɔ́, mɛsɛntɔ́ ɔ́ sɔ́ alɔ tɔn dó gǎn tɔn sín asá glɔ́, bó xwlé nǔ n'i ɖɔ émí ná bló nǔ e é ɖɔ é.

¹⁰ Mɛsɛntɔ́ ɔ́ fɔ lǎkúnmí wǒ ɖo gǎn tɔn sín lǎkúnmí lɛ́ɛ mɛ, bó hɛn nǔ ɖagbe ɖagbe tɛnmɛ tɛnmɛ e ɖo gǎn tɔn sín dɔkun mɛ lɛ́ɛ, bó ɖidó gǎn tɔn nɔví Naxɔ́ɔ sín tomɛ, ɖo Mɛzopotamíi.

¹¹ Hwenu e é ɖo toxo e mɛ é xwe ɔ́ sɛkpɔ́ wɛ ɔ́, é yi jɛ dotɔ ɖé kɔn, ɖo toxo ɔ́ kpá, bó ɖɔ bɔ lǎkúnmí lɛ́ɛ jɛ kpo ɖo fínɛ́. Hwe ko lɛ́ kɔ hwenɛ́nu, bɔ hwenu e nyɔ̌nu lɛ́ɛ nɔ́ wá dun sin dó ɔ́ kó su.

¹² Mɛsɛntɔ́ ɔ́ xo ɖɛ ɖɔ: “Mawu Mavɔmavɔ, Mawu gǎn ce Ablaxámu tɔn, kɛnklɛ́n bló bónú má mɔ mɛ e gbé un tɔ́n ɔ́ égbé; ɖe xomɛnyínyɔ́ towe xlɛ́ gǎn ce Ablaxámu.

¹³ Nyɛ ɖíe ɖo dotɔ ɔ́ kɔn e; ɖyɔ̌vǐ e ɖo toxo ɔ́ mɛ lɛ́ɛ ná wá dun sin.

¹⁴ Un ná byɔ́ ɖyɔ̌vǐ lɛ́ɛ ɖokpó ɖɔ é ní nya tɔyizɛ́n tɔn, bónú má nu sin. Nú é yí gbe nú mì ɖɔ: ‘Nu bónú má lɛ́ ná lǎkúnmí towe lɛ́ɛ lɔ nú yě ná nu’ ɔ́, ní nyí mɛ e a sɔ́ ɖó te nú mɛsɛntɔ́ towe Izáki é! Énɛ́ ɔ́, un ná tunwun ɖɔ a nyɔ̌ xomɛ dó gǎn ce wú.”

¹⁵ Mɛsɛntɔ́ ɔ́ kó ɖɔ xó ɔ́ fó có bó mɔ Hlebeka Betuwɛ́li ví ɔ́ jǎwe ǎ. Hlebeka ɔ́, Naxɔ́ɔ kpó asi tɔn Miluka ɔ́ kpó sín vǐvú wɛ. É hɛn tɔyizɛ́n tɔn abɔ̌ta. Betuwɛ́li ɔ́, Ablaxámu nɔví ká wɛ.

¹⁶ Hlebeka ɔ́, ɖyɔ̌vǐ ɖagbe ɖagbe ɖé wɛ; é ɖo alɔ jí; é tunwun súnnu kpɔ́n ǎ. É jɛ te wá tɔ ɔ́ nu bó dun sin gɔ́ tɔyizɛ́n tɔn bó ɖidó.

¹⁷ Bɔ mɛsɛntɔ́ ɔ́ kán wezun yi gɔ̌n tɔn, bó ɖɔ n'i ɖɔ: “Kɛnklɛ́n nǎ sin e ɖo tɔyizɛ́n towe mɛ ɔ́ kpɛɖé mì nú má nu.”

¹⁸ Bɔ ɖyɔ̌vǐ ɔ́ yí gbe n'i ɖɔ: “Nu sɛ́ ce.” Énɛ́ ɔ́, é nya tɔyizɛ́n ɔ́ ɖó kɛ́n bléwún, bó ná ɛ sin ɔ́ bɔ é nu.

¹⁹ Ée é ná ɛ sin ɔ́ bɔ é nu fó ɔ́, é ɖɔ n'i ɖɔ: “Un ná dun sin nú lǎkúnmí towe lɛ́ɛ lɔmɔ̌ bɔ yě ná nu bɔ é ná kpé yě.”

²⁰ É húzú sin e ɖo tɔyizɛ́n tɔn mɛ ɔ́ kɔn dó nǔ e mɛ kanlin lɛ́ɛ nɔ́ nu sin ɖe ɔ́ mɛ bléwún, bó lɛ́ kán wezun yi tɔ ɔ́ nu, bó lɛ́ dun sin ɔ́ ɖěvo. Énɛ́ ɔ́, é dun sin nú lǎkúnmí lɛ́ɛ bǐ.

²¹ Nya ɔ́ ká ɖo xwíí, bó ɖo kpínkpɔ́n ɛ wɛ, bó ɖo te bó ɖo kpínkpɔ́n wɛ ɖɔ Mawu Mavɔmavɔ ná bló bɔ to mɛ e émí wá ɔ́ ná kpa émí abǐ é ná gbɔ a jí.

²² Ée lǎkúnmí lɛ́ɛ nu sin fó ɔ́, nya ɔ́ zé sikálɔkɛ́ ɖokpó, bɔ é da glǎmu ayizɛ́n, bó zé sikálɔgan we, bɔ ɖokpó ɖokpó da hú glǎmu kanwe ko (100). É fɔ nǔ énɛ́ lɛ́ɛ bǐ jó nú ɖyɔ̌vǐ ɔ́,

²³ bó kanbyɔ́ ɛ ɖɔ: “Mɛ̌ ví ká nú we? Kɛnklɛ́n ɖɔ nú mì; tɛn ka ɖo tɔ́ towe xwé bɔ nyɛ kpó mɛ ce lɛ́ɛ kpó ná dɔ́ fínɛ́ a?”

²⁴ Bɔ ɖyɔ̌vǐ ɔ́ yí gbe n'i ɖɔ: “Betuwɛ́li ví wɛ nú mì. Miluka wɛ ji tɔ́ ce nú Naxɔ́ɔ.”

²⁵ É lɛ́ ɖɔ n'i ɖɔ: “Gběhan kpódó ama kpó e kanlin lɛ́ɛ ná ɖu ɔ́ ɖo xwé mǐtɔn gbe bó túnflá; fí e è nǎ dɔ́ ɔ́ lɛ́ ɖe.”

²⁶ Énɛ́ ɔ́, nya ɔ́ yi do bó ɖe kɔ́ nú Mawu Mavɔmavɔ,

²⁷ bó ɖɔ: “Un dó kú nú Mawu Mavɔmavɔ, Mawu gǎn ce Ablaxámu tɔn. É nɔ́ gɔn xomɛnyínyɔ́ tɔn kpódó gbejíninɔ tɔn kpó ɖe xlɛ́ gǎn ce ǎ. Mawu Mavɔmavɔ xlɛ́ ali mì, bó kplá mì káká wá gǎn ce nɔví lɛ́ɛ xwé.”

²⁸ Đyɔ̌vǐ ɔ́ ká kán wezun yi nɔ tɔn gɔ́n, bó wlí nǔ énɛ́ lɛ́ɛ bǐ ɖɔ n'i.

²⁹ Hlebeka ka ɖó nɔví súnnu ɖokpó bɔ é nɔ́ nyí Labáan. Labáan kán wezun tɔ́n sín xwé ɔ́ gbe, bó yi nya ɔ́ gɔ́n ɖo tɔ ɔ́ kɔn.

³⁰ Labáan mɔ alɔkɛ́ kpódó alɔgan kpó ɖo nɔví tɔn sín alɔ, bó se xó e nɔví tɔn Hlebeka ɖɔ nya ɔ́ wɛ ɖɔ nú émí ɔ́ bǐ. Ée é mɔ mɔ̌ ɔ́, é yi nya ɔ́ gɔ́n, bɔ nya ɔ́ ɖo te ɖo lǎkúnmí tɔn lɛ́ɛ kpá ɖo tɔ ɔ́ kɔn.

³¹ É ɖɔ n'i ɖɔ: “Wǎ, Mawu Mavɔmavɔ xo ɖɛ dó jǐ towe. Étɛ́wú a ka gbɛ́ xwé gbe wá, bó ɖo te gblǒlǒ mɛ? Un ko jlá tɛnmɛ ɖó ɖ'ayǐ nú we, bó kó jlá fí e lǎkúnmí towe lɛ́ɛ ná nɔ é ɖó.”

³² Énɛ́ ɔ́, nya ɔ́ xwedó Labáan yi xwé gbe, bɔ Labáan ɖe agban tɔn lɛ́ɛ sín lǎkúnmí lɛ́ɛ jí, bó ná yě gběhan kpó ama kpó. É wún sin bó klɔ́ afɔ nú nya ɔ́ kpódó mɛ e xwedó e lɛ́ɛ kpó.

³³ Énɛ́ ɔ́, è sɔ́ nǔɖuɖu wá nú nya ɔ́; é ká gbɛ́ bó ɖɔ émí kún ɖo nǔ ná ɖu wɛ cóbó ná ɖɔ xó e ɖo nu émítɔn ɔ́ ó. Bɔ Labáan ɖɔ ní bó ɖɔ xó.

³⁴ Bɔ nya ɔ́ ɖɔ: “Mɛsɛntɔ́ Ablaxámu tɔn wɛ un nyí.

³⁵ Mawu Mavɔmavɔ kɔn nyɔ̌ná dó gǎn ce jí ɖésú, bɔ é jɛ dɔkun. Mawu Mavɔmavɔ ná ɛ gbɔ̌ kpɔ́, bó ná ɛ nyibú kpɔ́, é ná ɛ kpatágan, bó ná ɛ siká; é ná ɛ mɛsɛntɔ́ súnnu kpó nyɔ̌nu kpó, é ná ɛ lǎkúnmí kpó tócí kpó.

³⁶ Asi tɔn Sala ɔ́ ji vǐ súnnu ɖokpó n'i ɖo kpikpo hwenu tɔn; vǐ énɛ́ ɔ́ tɔn wɛ nyí nǔ e é ɖó lɛ́ɛ bǐ.

³⁷ Gǎn ce ɖɔ nú mì ɖɔ nyɛ ní má da asi nú vǐ émítɔn ɖo Kanáanu e sín to mɛ émí ɖe lɛ́ɛ sín vǐ lɛ́ɛ mɛ ó, lé nyɛ ní xwlé nǔ d'é jí,

³⁸ ɖɔ tɔ́ émítɔn xwé wɛ nyɛ ná yi, ɖo hɛ̌nnu émítɔn mɛ, bó ná da asi nú vǐ émítɔn.

³⁹ Bɔ un kanbyɔ́ ɛ ɖɔ nú nyɔ̌nu ɔ́ gbɛ́ ɖɔ émí kún ná xwedó mì ó ɔ́ lo?

⁴⁰ É ká ɖɔ nú mì ɖɔ: ‘Mawu Mavɔmavɔ wɛ un nɔ xwedó; é ná sɛ́ wɛnsagun tɔn dó, bɔ é ná kplá we yi. É ná bló bɔ to ɔ́ mɛ ná kpa we, bɔ a nǎ da asi nú vǐ ce ɖo hɛ̌nnu ce mɛ, ɖo tɔ́ ce xwé.

⁴¹ Nú a yi hɛ̌nnu ce mɛ bónú è ma ná nyɔ̌nu we ǎ hǔn, nǔ e un ɖɔ bɔ a xwlé ɔ́ sɔ́ ɖo kɔ nú we ǎ.’

⁴² Égbé wɛ un wá tɔ ɔ́ nu bó xo ɖɛ ɖɔ: ‘Mawu Mavɔmavɔ, Mawu gǎn ce Ablaxámu tɔn, kɛnklɛ́n bó bló bónú to e mɛ un wá ɔ́ ní kpa mì.

⁴³ Nyɛ ɖíe ɖo tɔ kɔn e; ɖyɔ̌vǐ e ná wá sin dun gbé, bɔ un ná ɖɔ n'i ɖɔ é ní kɛnklɛ́n bó ná sin e ɖo tɔyizɛ́n tɔn mɛ ɔ́ kpɛɖé mì má nu, bɔ é ná yí gbe nú mì ɖɔ

⁴⁴ nyɛ ní nu, bónú émí ná dun nú lǎkúnmí ce lɛ́ɛ lɔmɔ̌ ɔ́, ɖyɔ̌vǐ énɛ́ ɔ́ ní nyí asi e Mawu Mavɔmavɔ sɔ́ ɖó te nú gǎn ce sín vǐ é.’

⁴⁵ Cóbónú un ná ɖɔ xó énɛ́ ɔ́ dó xomɛ fó ɔ́, Hlebeka jɛ́n un mɔ tɔ́n sín dɔ̌n jǎwe, bɔ tɔyizɛ́n tɔn ɖo abɔ̌ tɔn ta; é wá jɛ te tɔ ɔ́ kɔn bó dun sin, bɔ un ɖɔ n'i ɖɔ: ‘Kɛnklɛ́n nǎ sin mì má nu.’

⁴⁶ É ká nya tɔyizɛ́n e ɖo abɔ̌ tɔn ta ɔ́ dó kɛ́n bléwún bó ɖɔ: ‘Nu bónú má ná lǎkúnmí towe lɛ́ɛ lɔ nú yě ná nu.’ Bɔ un nu, bɔ é ná lǎkúnmí ce lɛ́ɛ lɔ bɔ yě nu.

⁴⁷ Énɛ́ ɔ́, un kanbyɔ́ ɛ ɖɔ: ‘Mɛ̌ ví ká nú we?’ Bɔ é yí gbe nú mì ɖɔ: ‘Betuwɛ́li ví wɛ un nyí, bó nyí Naxɔ́ɔ kpó asi tɔn Miluka kpó sín vǐvú.’ Ée é ɖɔ mɔ̌ ɔ́, un dó alɔkɛ́ awɔntín n'i, bó dó alɔgan alɔ n'i.

⁴⁸ Énɛ́ ɔ́ gúdo ɔ́, un yi do bó ɖe kɔ́ nú Mawu Mavɔmavɔ, Mawu gǎn ce Ablaxámu tɔn, bó dó kú n'i, ɖó é wɛ xlɛ́ ali mì bɔ un wá da asi nú gǎn ce sín vǐ; gǎn ce nɔví sín vǐ wɛ un wá da n'i.

⁴⁹ Din ɔ́, ényí mi jló ná ɖe xomɛnyínyɔ́ mitɔn kpódó gbejíninɔ mitɔn kpó xlɛ́ gǎn ce hǔn, mi ɖɔ nú mì; mi ma ka jló ná bló mɔ̌ ǎ hǔn, mi lɛ́ ɖɔ nú mì. Énɛ́ ɔ́, un ná tunwun lě e un ná wa nǔ gbɔn é.”

⁵⁰ Labáan kpó Betuwɛ́li kpó ká yí gbe n'i ɖɔ: “Mawu Mavɔmavɔ gɔ́n wɛ xó énɛ́ ɔ́ gosín, mǐ sixú gbɛ́ ǎ.

⁵¹ Hlebeka ɔ́ nɛ́ ɖo nukɔn towe nɛ́; mǐ sixú gbɛ́ xó e Mawu Mavɔmavɔ ɖɔ ɔ́ ǎ; kplá ɛ nú mi yi, bónú é ní nyí asi nú gǎn towe sín vǐ lě e Mawu Mavɔmavɔ ɖɔ gbɔn é.”

⁵² Ée mɛsɛntɔ́ Ablaxámu tɔn se xó e yě ɖɔ lɛ́ɛ ɔ́, é ɖe kɔ́ nú Mawu Mavɔmavɔ,

⁵³ bó ɖe nǔ e è sɔ́ kpatágan dó bló ná lɛ́ɛ, ée è sɔ́ siká dó bló ná lɛ́ɛ, kpódó avɔ kpó tɔ́n, bó ná Hlebeka; é lɛ́ ná nǔ Hlebeka sín nɔví kpó nɔ tɔn kpó bɔ é fɛ́ wǔ.

⁵⁴ Énɛ́ ɔ́ gúdo ɔ́, mɛsɛntɔ́ Ablaxámu tɔn ɔ́ kpódó mɛ e kplá ɛ wá lɛ́ɛ kpó ɖu nǔ bó nu ahan, lobo dɔ́ ayǐ. Ée yě fɔ́n zǎnzǎn ɔ́, mɛsɛntɔ́ ɔ́ ɖɔ nú yě ɖɔ: “Mi ná gbe mì nú má lɛ́ kɔ yi gǎn ce gɔ́n.”

⁵⁵ Bɔ Hlebeka sín nɔví kpó nɔ tɔn kpó yí gbe n'i ɖɔ: “Nyɔ̌nu ɔ́ ní lɛ́ nɔ mǐ gɔ́n kpɛɖé; é ní nɔ mǐ gɔ́n nú azǎn wǒ ɖé, énɛ́ ɔ́, a nǎ yi.”

⁵⁶ Bɔ é yí gbe nú yě ɖɔ: “Mi ma hɛn mì ɖó te ó, ɖó Mawu Mavɔmavɔ ko bló bɔ tomɛ e un wá ɔ́ kpa mì, mi jó mì dó má yi gǎn ce gɔ́n.”

⁵⁷ Énɛ́ ɔ́, yě yí gbe n'i ɖɔ: “Mǐ ní bó ylɔ́ vǐ ɔ́ bó ná kan nǔ byɔ́ ɛ.”

⁵⁸ Bɔ yě ylɔ́ Hlebeka nǔgbó, bó kanbyɔ́ ɛ ɖɔ: “A jlǒ ná xwedó nya élɔ́ yi a?” Bɔ é yí gbe nú yě ɖɔ: “Ɛɛn, un nǎ yi.”

⁵⁹ Énɛ́ ɔ́, yě ná gbe Hlebeka nɔví yětɔn ɔ́, bɔ é kpódó mɛsɛntɔ́ nyɔ̌nu e hɛn ɛ ɖo vǔ ɔ́ kpó ná xwedó mɛsɛntɔ́ Ablaxámu tɔn ɔ́ kpódó mɛ e kpó é kpó zɔn wá lɛ́ɛ kpó, bɔ yě ná yi.

⁶⁰ Yě xo ɖɛ dó Hlebeka jí bó ɖɔ: “Hwi nɔví mǐtɔn ɔ́ ní húzú gbɛtɔ́ wɔ̌buwɔ́bú sín nɔ. Kúnkan towe lɛ́ɛ ní ɖu ɖo mɛ e gbɛ́ wǎn nú we lɛ́ɛ jí.”

⁶¹ Énɛ́ ɔ́, Hlebeka sɔ́ nǔ, é kpódó nyɔ̌nu mɛsɛntɔ́ tɔn lɛ́ɛ kpó, bɔ yě xá lǎkúnmí lɛ́ɛ jí, bɔ mɛsɛntɔ́ Ablaxámu tɔn ɔ́ kplá Hlebeka, bɔ yě ɖidó.

⁶² Izáki ka ko gosín Laxáyi-Hlɔyi tɔ ɔ́ kɔn hwenɛ́nu, bó wá ɖo Nɛgɛ́vu gbé jí.

⁶³ É tɔ́n gbe nɛ́ gbe gbadanu, bó ɖo sa ɖi wɛ, bɔ ajijimɛ kpowun ɔ́, é mɔ lǎkúnmí lɛ́ɛ sɛ́ dó jǎwe.

⁶⁴ Hlebeka lɔ mɔ Izáki sɛ́ dó, bó lɔ́n jɛ te sín lǎkúnmí tɔn jí,

⁶⁵ bó kanbyɔ́ mɛsɛntɔ́ Ablaxámu tɔn ɔ́ ɖɔ: “Mɛ̌ ká nyí mɛ énɛ́ ɔ́ e ja mǐ kpé gbé ɖo gblǒlǒ mɛ fí é?” Bɔ mɛsɛntɔ́ ɔ́ yí gbe n'i ɖɔ: “Gǎn ce wɛ.” Énɛ́ ɔ́, Hlebeka sɔ́ avɔ tɔn cyɔ́n ta.

⁶⁶ Ée yě wá ɔ́, mɛsɛntɔ́ ɔ́ wlí nǔ e é wa lɛ́ɛ bǐ ɖɔ nú Izáki.

⁶⁷ Izáki ka kplá Hlebeka yi goxɔ e mɛ nɔ tɔn Sala ko nɔ nɔ é mɛ, bɔ é húzú asi tɔn. É yí wǎn n'i. Ée é nyí ɖɔ Izáki sín nɔ ko kú ɔ́, lě e é zé Hlebeka dó dó gbɔ nú éɖée gbɔn é nɛ́.